Tâi-oân-káu-á chiàⁿ-miâ ūn-tōng
|
台灣狗仔正名運動 |
| Siau Lah-ji̍h |
蕭Lah-ji̍h |
|
1 tīn Tâi-oân pún-thó͘-káu-á chò-hóe leh chhit-thô, êng-êng bóng phò-tāu .
|
一陣台灣本土狗仔作伙leh chhit-thô,閒閒bóng phò-tāu。 |
|
O͘-káu--ê kóng : " Gún chú-lâng hit-ji̍t kap lâng khì Tâi-pak giâ kî-á kiam chhiàng-siaⁿ, tńg-lâi kàu chhù--ni̍h it-ti̍t hoah thiám, m̄-koh sim-chêng chin khin-sang, mā it-ti̍t hoah-kóng : 'Tâi-oân-kok bān-sòe !', hoah-kah thiong kah ."
|
烏狗仔--ê講：『阮主人hit日kap人去台北giâ旗á兼chhiàng聲，轉來到厝--裡一直喝thiám,m̄-koh心情真輕鬆，mā一直喝講：『台灣萬歲！ 』，喝kah thiòng kah。 |
|
Theh-li̍h kóng : " Lán mā su-iàu lâi chiàⁿ-miâ--1-ê chiah-tio̍h ."
|
Theh-li̍h講：『咱mā需要來正名--1-個才tio̍h。』 |
|
Pà-piu--ê kóng : " Ná-tio̍h chiàⁿ siáⁿ-mi̍h miâ, chāi-lâi Lán 'Tâi-oân-thó͘-káu-á ' tiō chin chhut-miâ : Sàu-to-bóe, Kiuⁿ-á-kha, Ū chi̍h8-pan, siáⁿ-lâng m̄-chai Lán ê phín-chéng tē 1 miâ, 'Tâi-oân-thó͘-kau' hó-miâ-siaⁿ, ná-tio̍h chiàⁿ siáⁿ-mi̍h-miâ .”
|
豹彪--ê講：『Ná-tio̍h正啥物名，在來咱「台灣土狗仔」tiō真出名：掃刀尾、獐仔腳、有舌斑，啥人m̄知咱品種第一名，「台灣土狗」好名聲，ná-tio̍h正啥物名。』 |
|
O͘-káu--ê hun-sek kóng : " 'Tâi-oân-thó͘-káu' ū-iáⁿ hó-miâ-siaⁿ, m̄-koh Lán tio̍h tòe Lán chú-lâng kiâⁿ m̄-chiah-tio̍h, chú-lâng beh chiàⁿ-miâ, Lán mā-tio̍h chiàⁿ-miâ, án-ni m̄-chiah sī tiong-sim ê Tâi-oân-káu-cho̍k ."
|
烏狗--ê分析講：『「台灣土狗」有影好名聲，m̄-koh咱tio̍h tòe咱主人行m̄-chiah-tio̍h,主人beh正名，咱mā-tio̍h正名，按呢m̄-chiah是忠心ê台灣狗族。』 |
|
Pà-piu--ê kóng : "Án-ni kóng sī ū tō-lí , ah bô beh kiò siáⁿ-mi̍h miâ ? "
|
豹彪--ê講：『按呢講是有道理，ah無beh叫啥物名？』 |
|
O͘-káu--ê kóng : "Chin kán-tan, kā 'thó͘' the̍h-tiāu, kui-khì kiò-chò Tâi-oân-káu-á tiō OK . "
|
烏狗--ê講：『 真簡單，kā「土」the̍h掉，規去叫做台灣狗á tiō OK。』 |
|
Pà-piu--ê kóng : "Kan-nā chha 1 jī 'thó͘', kám ū siáⁿ-mi̍h bô-kāng ? "
|
豹彪--ê講：『Kan-nā差一字「土」，敢有啥物無仝？ 』 |
|
O͘-káu--ê kóng : "Heh chha--chē leh nò͘ ! Lí kā siūⁿ-khòaⁿ-māi, Lán nā-sī 'Tâi-oân-thó͘-káu', ah Lán ê chú-lâng m̄-tiō-sī 'Tâi-oân-thó͘-lâng'--lò͘."
|
烏狗--ê講：『Heh 差--chē leh nò͘ ！你kā想看māi,咱若是「台灣土狗」，ah咱ê主人m̄-tiō是「台灣土人」--lò͘ 。』 |
