Siāu-kài ka-kī
|
紹介家己 |
| Siau Lah-ji̍h |
蕭Lah-ji̍h |
|
Kok-ūi A-hiaⁿ A-ché: Ta̍k-ê pêng-an! Siau Lah-ji̍h, Chhân-tiong lâng (Chiong-hòa koān Tiân-tiong-tìn), 1941 nî seⁿ, ti̍h-beh kòe 1 kah-chí ê sèⁿ-miā, iáu-sī bóe-á chit 10 tang oa̍h-liáu khah-ū ì-gī. Chhut-sì tī phok-si̍t ê chng-kha, chò 1 ê bô tha̍k-chheh choh-chhân-lâng ê chú-tē, koai-koai-á thiaⁿ-ōe, gōng-gōng-á tha̍k-chheh, tha̍k-chheh beh chhòng-siáⁿ? Kan-nā chai-iáⁿ beh bat-jī niā-niā, chhun--ê tiō-sī tōa-lâng kóng-siáⁿ, lāu-su kóng-siáⁿ, góa tiō thiaⁿ-siáⁿ, chin-koai chin-khiáu tiō-sī Siau Lah-ji̍h gín-á siàu-liân sî-tāi ê siá-chin. chit-má siūⁿ khí--lâi, kî-si̍t sī gû-gōng ê 1 ê.
|
各位阿兄阿姐：逐個平安！蕭Lah-ji̍h，田中人（彰化縣田中鎮），1941年生，ti̍h-beh過1甲子ê生命，iáu是尾仔這10冬活了較有意義。出世tī樸實ê庄腳，做 1個無讀冊作田人ê子弟，乖乖仔聽話，憨憨仔讀冊。讀冊beh創啥？Kan-nā知影beh bat字niā-niā,chhun--ê就是大人講啥，老師講啥，我就聽啥，真乖真巧著是蕭Lah-ji̍h囡仔少年時代ê寫真。Chit-má想--起-來，其實是愚憨ê一個。 |
|
Chū kok-hāu kàu su-hoān kàu chhut siā-hōe chò lāu-su, lóng it-ti̍t jīn-ûi sī Tiong-kok-lâng, sui-jiân tùi Tiong-kok ê le̍k-sú tē-lí bô chhù-bī, mā it-ti̍t leh jīn-chin phah-piàⁿ tha̍k, khó-sioh tha̍k-bô siáⁿ-mi̍h sêng-chek, kàu taⁿ chiah chai-iáⁿ goân-lâi he m̄-sī góa ka-kī ê mi̍h-kiāⁿ, kan-nā beh khò sí-kì ngē-liām lâi kì-tì, pēng m̄-sī góa ê khiáu-khì, bo̍k-koài khah án-chóaⁿ tha̍k, khah án-chóaⁿ kì, tiō-sī tha̍k-bô.
|
自國校到師範到出社會做老師，攏一直認為是中國人。雖然對中國ê歷史、地理無趣味，mā一直leh認真扑拚讀，可惜讀無啥mi̍h成績。到今才知影原來he m̄是我家己ê物件，kan-nā beh靠死記硬唸來記智，並m̄是我ê巧器，莫怪khah án-chóaⁿ讀，khah án-chóaⁿ記，就是讀無。 |
|
Chū sè-hàn tiō bô chhù-bī gí-giân ê mi̍h-kiāⁿ, ha̍k-seng sî-tāi siōng hoân-ló ê tāi-chì, tiō-sī chok-bûn kap káng-ián, te̍k-pia̍t he kap góa bô-tī-tāi ê tê-ba̍k, tiō siá bô lō͘-lí-lâi, kóng bē kui-chhut, kok-hāu sî-tāi, bat hō͘ lāu-su tiám-miâ chham-ka káng-ián, kiat-kó hāi góa ké pak-tó͘-thiàⁿ m̄ khì tha̍k-chheh, si̍t-chāi ū-kàu iàn-khì bô-lō͘-iōng. kóng--khí-lâi m̄-kiaⁿ lín chhiò, kàu kah chit-kú, nā-sī beh kiò góa tī chiòng-lâng bīn-chêng piáu-ta̍t kúi-kù-á, iáu-hoân-ná sī kám-kak ùi-ùi, put-kò nā-sī su-té-hā phò͘-tāu gī-niū, ū-tang-sî-á tiō chin kāu-ōe.
|
自細漢就無趣味語言ê物件。學生時代上煩惱ê代誌，就是作文kap講演，特別he kap我無治代ê題目，就寫無路理來，講bē歸齣。國校時代，bat hō͘老師點名參加講演，結果害我假腹肚痛m̄去讀冊，實在有夠iàn氣無路用。講--起-來m̄驚lín笑，到kah這久，若是beh叫我tī眾人面前表達幾句--仔，iáu-hoân-ná是感覺畏畏，不過若是私底下phò͘-tāu gī-niū,有tang時仔就真厚話。 |
|
Ū 1 hāng hō͘ góa kám-kak khah ū chū-sìn ê tāi-chì, tiō-sī o̍h Tâi-gí-bûn, chū-chiông ē-hiáu siá Tâi-gí liáu-āu, sim-chêng chiâu khin-sang, khǹg-tiàm thâu-khak-lāi kúi nā cha̍p nî ê kì-tì, khai-sí tit-tio̍h tháu-pàng, siūⁿ siáⁿ kóng siáⁿ, siūⁿ siáⁿ siá siáⁿ, ū Tâi-oân-jī ê chō͘-la̍t, Hàn-jī í-keng pa̍k góa bē-tiâu; iû-kî o̍h ē-hiáu phah tiān-náu, ka-siōng HOTSYSR kap Taiwanese Package su-ji̍p-hoat ê pang-chān, ná-leh chē phùn-siā-ki--leh, siu̍h-siu̍h-kiò, jōa sóng Lí kám chai.
|
有一項hō͘我感覺較有自信ê代誌，就是學台語文。自從會曉寫台語了後，心情齊輕鬆，囥tiàm頭殼內幾若十年ê記智，開始得著tháu放，想啥講啥，想啥寫啥。有台灣字ê助力，漢字已經縛我bē-tiâu。尤其學會曉扑電腦，加上Hochys kap Taiwanese Package 輸入法ê幫贊，若leh坐噴射機--leh，siu̍h-siu̍h叫，偌爽你kám知。 |
|
Ài-ho͘hN Tâi-gí-bûn ê pêng-iú, kóaⁿ-kín lâi, Ta̍k-ke kóaⁿ-kín lâi siá Tâi-gí, chit-chūn sī siōng-kài-hó ê sî-ki, kok-chióng ê kang-khū kā Lán chhoân piān-piān, Ta̍k-ke jīn-chin lâi siá, iah beh tháu-pàng sim-lāi hoaⁿ-hí kap ut-chut, iah beh pó-chûn Lán-ê bûn-hòa, iah beh ūi āu-tāi kiáⁿ-sun chò kong-tek, kám m̄-sī chin ū ì-gī ê tāi-chì.
|
愛護台語文ê朋友，趕緊來，逐家趕緊來寫台語，這陣是上kài好ê時機。各種ê工具kā咱chhoân便便，逐家認真來寫，亦beh tháu放心內歡喜kap鬱卒，亦beh保存咱ê文化，亦beh為後代子孫做功德，kám m̄是真有意義ê代誌。 |
