A-kong kap a-má ê kò͘-sū_02
|
A公kap a-má ê故事(2) |
| Ông Iàn |
王曣 |
|
Goán a-kong sī 1909 nî chhut-sì--ê, i keng-kòe Chheng-kok chèng-hú, Ji̍t-pún chèng-hú kap Tiong-hôa Bîn-kok chèng-hú saⁿ ê bô-kāng chèng-koân ê thóng-tī. (Chòe-kīn kà Tâi-oân keng-chè hoat-tián-sú ê lāu-su kiò goán ài kā kóng “Ji̍t-kì sî-tāi” chit-ê koàn-sì kái--koe-lâi, i ǹg-bāng goán sêng-jīn ji̍t-pún hit-chūn khak-si̍t ū thóng-tī Tâi-oân ê hoat-lu̍t kin-kù kap chèng-tong-sèng, mài koh siū tōa Tiong-kok su-sióng chit-ê pēⁿ-to̍k sé-náu)
|
Goán a公是1909年出世--ê, i經過清國政府, 日本政府kap中華民國政府3 ê無kāng政權ê統治. (最近教台灣經濟發展史ê老師叫goán ài kā講「日據時代」chit-ê慣勢改--過-來, i ǹg望goán承認日本hit-chūn確實有統治台灣ê法律根據kap正當性, mài koh受大中國思想chit-ê病毒洗腦) |
|
Góa iáu ē kì-tit i tiāⁿ-tiāⁿ kā góa kóng, i sè-hàn ê sî ū lâu-kòe Chheng-kok ê ti-bóe-liu (『辮子頭』), thâu-chêng pòaⁿ-pêng ê thâu-chang ài thì-kng-kng, āu-piah pòaⁿ-pêng ài pa̍k-chò thâu-chang-bóe (『辮子』), thâu-chang-bóe nā seⁿ-kàu ē chō-chiâⁿ bô hong-piān ê sî, tio̍h-ài kā pôaⁿ tī thâu-khak-téng, chhiūⁿ kâu-chê-thiⁿ Sun Gō͘-khong ê kim-kho͘-á kāng-khoán. I ná kóng koh ē ná khiú góa ê nn̄g-sok thâu-chang-bóe, tī góa thâu-khak téng pí lâi pí khì. Góa siùⁿ kau4, a-kong chiok ài iōng “kâu” lâi kap góa kóng-sńg-chhiò, koh ē kā góa kà chiok chē kap kâu ū koan-hē ê sio̍k-gí, tiāⁿ kóng kah goán chó͘-sun-á nn̄g-ê chhiò kah chhia-pùn-táu.
|
Góa iáu ē記得i tiāⁿ-tiāⁿ kā góa講, i細hàn ê時有留過清國ê豬尾liu(『辮子頭』), 頭前半pêng ê頭鬃ài thì光光, 後piah半pêng ài縛做頭鬃尾(『辮子』), 頭鬃尾若生到ē造chiâⁿ無方便ê時, tio̍h-ài kā盤tī頭殼頂, 像猴齊天孫悟空ê金箍á kāng款. I ná講koh ē ná khiú góa ê 2束頭鬃尾, tī góa頭殼頂比來比去. Góa siùⁿ猴, a公chiok愛用「猴」來kap góa講sńg笑, koh ē kā góa教chiok chē kap猴有關係ê俗語, tiāⁿ講kah goán祖孫á 2 ê笑kah chhia-pùn-táu. |
|
(TGB Thong-sìn tē 45 kî, 2003 nî 6 goe̍h)
|
(TGB通訊第45期，2003年6月) |
