Phì-jū Soaⁿ-ah
|
譬如山鴨 |
| Phian-chip-sek |
編輯室 |
|
Tī So͘-kek-lân ū chi̍t ji̍t chi̍t ê choh- sit lâng tī soaⁿ-n̍i̍h kiâⁿ-iû, khòaⁿ-kìⁿ chi̍t chiah soaⁿ-ah ê siū, chiông-tiong ū nn̄g tī-teh. I chiong chiah ê nn̄g tòa-tò-khì chhòng hō͘ chi̍t chiah ke khì pū. Pū-liáu chhut ah-á-kiáⁿ. Múi ji̍t ke-bó chiū chhōa hiah ê ah-á khì chhù-chêng chhù-āu sì- kè thit-thô, kàu tǹg chiū chhōa in tò-lâi hō͘ chú-ka chhī, chhī-liáu chiū ta̍k-mê sòa chhōa ji̍p tiâu, kap kî-û ke-ah chò- hóe hioh. Lâng khòaⁿ hiah ê ah-á bô phài-phoe in sī soaⁿ-ah.
|
Tī蘇格蘭有一日1 ê做穡人tī山裡行遊，看見1隻山鴨ê siū,從中有卵tī-teh。伊將chia ê卵帶轉去創hō͘ 一隻機器孵。孵了出鴨仔子。 每日雞母就chhōa hiah ê鴨仔去厝前厝後四kè thit-thô,到tǹg就chhōa in 倒來hō͘主家飼，飼了就逐暝續chhōa入tiâu,kap其餘ê雞仔做伙歇。 人看hia ê 鴨仔無phai-phoe in是山鴨。 |
|
Ū le̍k-kòe kúi-nā lé-pài chiū hiah ê ah-á chiām-chiām tōa, in ê iù-mn̂g pìⁿ- chò chho͘-mn̂g. Ta̍k ji̍t in khì khe-á siû chúi, āu-lâi lo̍h khe-a siû chhut tōa hô. Chóng-sī ta̍k-mê iû-goân tò-lâi chia̍h sòa khì hioh. Kàu āu-lâi in chiū kan-ta chheⁿ-kông chia̍h, sòa bô ài ji̍p tiâu keh mê. Ū-sî chia̍h-liáu chiū chò in cháu, thàu mê bô ji̍p-lâi; ū-sî hō͘ chú-ka lia̍h- tio̍h sòa kā in koaiⁿ-teh. Chóng-sī ná- kú ná-pháiⁿ lia̍h, kàu hā-thiⁿ ê sî in ka- tī khì thó chia̍h ē pá, chiū lóng bô koh tò-tńg-lâi. Kàu hit-tia̍p chiâu-chiâu pìⁿ-chò soaⁿ-ah. Hiah ê ah-á sui-jiân chhut- sì tī lâng ê ke-lāi, chóng-sī in sī soaⁿ-ah ê chéng.
|
有歷過幾仔禮拜就hiah ê鴨仔漸漸大 in ê 幼毛變做粗毛。逐日in 去溪仔siû水，後來落溪仔siû出大河。總是逐暝猶原倒來chia 續去歇。到後來in 就kan-ta 青狂食，續無愛入tiâu隔暝。有時食了就做in走，透暝無入內；有時hō͘主家掠著續kā in關teh。總是那久那歹掠，到夏天ê時in 家己去討食會飽，就攏無koh倒傳來。到hit-tia̍p chiâu-chiâu變做山鴨。Hiah ê鴨仔雖然出世tī人ê家內，總是in是山鴨ê 種。 |
|
Taⁿ lín chiah ê gín-á chha-put-to chhin-chhiūⁿ hiah ê ah-á. Kiám-chhái lín pē-bó sī sio̍k Chú ê lâng, lín ke-lāi ia̍h thàn Chú ê kui-kí. M̄-kú lín ê pún- goân m̄ sī chū-jiân sio̍k Chú, chhin-chhiūⁿ hiah ê soaⁿ-ah m̄ sī jîn-ke chū- jiân ê chéng. Lín liōng-pit káⁿ bô ài chò soaⁿ-ah. Chóng-sī ū soaⁿ-ah ê chéng tī-teh. Siat-sú nā bô siū kàu-hùn chek- tok, kiaⁿ-liáu chiong-lâi bē-bián-tit khì kui hit téng-lūi.
|
今 lín chiah ê囡仔差不多親像hiah ê 鴨仔。Kiám知lín父母是屬主ê人，lín家內也趁主ê規矩。M̄-kú lín ê 本源m̄是自然屬主，親像hiah ê 山鴨m̄是人家自然ê 種。Lín 量必káⁿ無愛做山鴨。總是有山鴨ê種tī-teh。設使那無受教訓責督，驚了將來bē免tit去歸hit等類。 |
|
(Tâi-lâm Hú-siâⁿ Kàu-hōe-pò tē 126 koàn, 1895 nî 9 ge̍h)
|
(台南府城教會報第126卷，1895年9月) |
