A-bú ê sim-siaⁿ
|
A母ê心聲 |
| Chhòa Ngá-kî |
蔡雅祺 |
|
Iáu ē kì-tit 2000 nî hit 1-tang, Tâi-oân siā-hōe ūi-tio̍h soán chóng-thóng ê tāi-chì lāu-jia̍t kún-kún, hit tong-sî-á goán tau mā án-ne, ta̍k-ê lâng lóng ū ka-tī ê siūⁿ-hoat, chhù--ni̍h tiāⁿ-tiāⁿ lóng ē ū chin chōe thó-lūn.
|
Iáu會記得2000年hit 1冬, 台灣社會為tio̍h選總統ê tāi-chì鬧熱滾滾, hit當時á goán tau mā án-ne, ta̍k-ê人lóng有ka-tī ê想法, 厝--ni̍h tiāⁿ-tiāⁿ lóng會有真chōe討論. |
|
Hit-chūn, góa tú teh chún-pī khó tāi-ha̍k, sim-chêng chin bái, tú-tio̍h soán-kí ê tāi-chì hóe-khì tō chin tōa, a-pà kap a-bú lóng sī chi-chhî A-píⁿ--á-ê, góa sī bô siáⁿ-mi̍h chhù-bī, kan-taⁿ khòaⁿ in teh Crazy. Hit tang-chūn, góa ē kì-tit a-bú sì-kòe khà tiān-ōe hō͘--lâng, kiò in tio̍h-ài chi-chhî Tân Chúi-píⁿ. Góa bô hoat-tō͘ kóng chhut hit-chūn a-bú sī ū jōa hoaⁿ-hí.
|
Hit-chūn, góa tú teh準備考大學, 心情真bái, tú-tio̍h選舉ê tāi-chì火氣就真大, a-pà kap a母lóng是支持A扁--á-ê, góa是無siáⁿ-mi̍h趣味, kan-taⁿ看in teh Crazy. Hit tang-chūn, góa會記得a母sì-kòe khà電話hō͘--人, 叫in tio̍h-ài支持陳水扁. Góa無法tō͘講出hit-chūn a母是有jōa歡喜. |
|
Ū 1-kang àm-sî-á, góa àn ha̍k-hāu tò-tńg--lâi, tī koe-á-téng khòaⁿ-tio̍h Tân Chúi-píⁿ ê thoân-toaⁿ sì-kòe poe, tú-á-hó góa sim-chêng bô kài hó, tńg kàu chhù--ni̍h tō kap a-bú sio-mā, chhá kah kui chhù-piⁿ lóng chai-iáⁿ, góa kā a-bú kóng ài khì Tân Chúi-píⁿ ê kēng-soán chóng-pō͘ kiò in chhú-lí, siōng bô, mā ài kiò in kā thoân-toaⁿ khioh hō͘ chheng-khì. Bóe--á, a-bú 1-ê lâng bô kóng siáⁿ tō cháu--chhut-khì-a, chiâⁿ kú lóng bô khòaⁿ-tio̍h i tńg--lâi, sió-tī chin hoân-ló, kín tòe chhut-khì khòaⁿ, chiah chai-iáⁿ a-bú 1-ê lâng ta̍uh-ta̍uh-á tī koe-á khioh thoân-toaⁿ.
|
有1工暗時á, góa àn學校tò-tńg--來, tī街á頂看tio̍h陳水扁ê傳單sì-kòe飛, tú-á好góa心情無kài好, tńg到厝--ni̍h就kap a母相罵, 吵kah kui厝邊lóng知iáⁿ, góa kā a母講ài去陳水扁ê競選總部叫in處理, siōng無, mā ài叫in kā傳單khioh hō͘ chheng-khì. 尾--á, a母1-ê人無講siáⁿ就走--出-去-a, chiâⁿ久lóng無看tio̍h i tńg--來, 小弟真煩惱, 緊tòe出去看, chiah知iáⁿ a母1-ê人ta̍uh-ta̍uh-á tī街á khioh傳單. |
|
Chit-má Tân Chúi-píⁿ tòng-soán--a, a-bú soah bô koh khah hoaⁿ-hí, i tī chhài-chhī-á bōe mi̍h-kiāⁿ, seng-lí soah jú lâi jú bái, m̄-koh iû-goân m̄-bat thiaⁿ-tio̍h a-bú leh mā Tân Chúi-píⁿ, i kan-taⁿ tiām-tiām bô beh koh kóng chèng-tī ê tāi-chì, góa siūⁿ, i èng-kai tùi sin chèng-hú koh ū 1-kóa hi-bāng, m̄-koh chit-ê hi-bāng m̄-chai tang-sî chiah ē-tàng oân-sêng.
|
Chit-má陳水扁當選--a, a母soah無koh khah歡喜, i tī菜市á賣mi̍h-kiāⁿ, seng-lí soah愈來愈bái, m̄-koh猶原m̄-bat聽tio̍h a母leh罵陳水扁, i kan-taⁿ tiām-tiām無beh koh講政治ê tāi-chì, góa想, i應該對新政府koh有1-kóa希望, m̄-koh chit-ê希望m̄知tang時chiah會tàng完成. |
|
(TGB Thong-sìn tē 40 kî, 2003 nî 1 goe̍h)
|
(TGB通訊第40期，2003年1月) |
