Phō͘-á phah--chi̍t-ē
|
簿仔拍一下 |
|---|---|
| Bô Chù-bêng | 無注明 |
|
A-pô khì iû-kio̍k, the̍h chûn-khoán phō͘-á beh hō͘ sió-chiá tǹg ìn-á.
|
阿婆去郵局，the̍h存款簿仔 beh hō͘小姐tǹg印á。 |
|
A-pô kā sió-chiá kóng :“Sió-chiá, chhiáⁿ lí phō͘-á kā góa phah--chi̍t-ē.”
|
阿婆kā小姐講：『小姐，請你簿仔 kā 我拍一下。』 |
|
Sió-chiá chiâⁿ-si̍t phah chi̍t-ê pho̍k-á-siaⁿ, khó-sioh a-pô bô thiaⁿ--tio̍h. A-pô koh kā sió-chiá kóng --chi̍t-piàn:
|
小姐成實拍一個pho̍k-á聲，可惜阿婆無聽--著。阿婆koh kā小姐講一--遍： |
|
“Kám ē-sái khah-kín phō͘-á kā góa phah--chi̍t-ē, góa teh kóaⁿ sî-kan.”
|
『敢會使khah緊簿仔kā我拍--一下，我teh 趕時間。』 |
|
Sió-chiá tō koh tōa-siaⁿ phah chi̍t-ê pho̍k-á siaⁿ, a-pô hīⁿ-khang tāng, iáu-sī bô thiaⁿ--tio̍h.
|
小姐koh 大聲拍一個pho̍k-á聲，阿婆耳孔重，猶是無聽--著。 |
|
A-pô lún bē-tiâu, khí bô hoaⁿ-hí, kóng: “Lín ê ho̍k-bū thài-tō͘ si̍t-chāi ū kàu chha neh, kan-na kiò lín phō͘-á kā góa phah--chi̍t-ē iā m̄ !”
|
阿婆忍bē-tiâu，起無歡喜，講：「 lín ê服務態度實在有夠差neh，kan-na叫 lín 簿仔kā我拍一下也m̄。」 |
|
Kàu chia lâi, sió-chiá chôaⁿ-á kui-khì khiā--khí-lâi, tùi kong-si ê tông-jîn kóng: “Lâi! Ta̍k-ê thiaⁿ góa ê kháu-lēng, ‘ài ê kó͘-lē chò-hóe lâi’, pho̍k pho̍k pho̍k pho̍k pho̍k pho̍k pho̍k pho̍k!”.
|
到chia來，小姐chôaⁿ-á 規氣khiā--起-來，對公司ê同仁講：『來！逐家聽我ê口令，『愛ê鼓勵作伙來』，pho̍k pho̍k pho̍k pho̍k pho̍k pho̍k pho̍k pho̍k!』。 |
