A-píⁿ-peh-á
|
A扁伯--á |
| Tēⁿ Gio̍k-hōng |
鄭玉鳳 |
|
A-kong kiat nn̄g-pái hun, goán a-pà ê hiaⁿ-tī chí-mōe chin ho̍k-cha̍p, a-pà ū chi̍t-ê kāng-bú kò͘-pē ê a-hiaⁿ, mā ū saⁿ-ê kāng-pē kò͘-bú ê sió-tī, koh ū nn̄g-ê bô kāng pē-bú ê sió-tī kap sió-mōe, goán nn̄g-ê a-má kè hō͘ a-kong chìn-chêng lóng ū kè kòe ang, chhin-a-má sí-ang, súi a-má lī-iân, in ê gín-á kap a-pà kāng-khoán iōng hiaⁿ-tī chí-mōe hō͘-siong chheng-ho͘. A-pà sī a-kong chin-siⁿ ê tōa-kiáⁿ, a-má kòe-sin ê sî a-pà chiah chit-hòe, m̄-koh tòe a-má lâi ê hāu-seⁿ í-keng 20 hòe, góa kiò I “A-píⁿ peh--á”.
|
A公結2 pái婚, goán a-pà ê兄弟姊妹真複雜, a-pà有1-ê kāng母kò͘-pē ê a兄, mā有3 ê kāng-pē kò͘母ê小弟, koh有2 ê無kāng pē母ê小弟kap小妹, goán 2 ê a-má嫁hō͘ a公chìn前lóng有嫁過ang, 親a-má死ang, súi a-má離緣, in ê gín-á kap a-pà kāng款用兄弟姊妹互相稱呼. A-pà是a公親生ê大kiáⁿ, a-má過身ê時a-pà chiah 7歲, m̄-koh tòe a-má來ê後生已經20歲, 我叫i「A扁伯--á」. |
|
A-píⁿ peh--á sī a-kong chi̍t-sì-lâng to chin bô hoat-tō͘ liōng-kái ê lâng, a-kong kóng i chhiâⁿ-ióng A-píⁿ peh--á 10 nî, sui-bóng m̄ sī chhin-siⁿ--ê, m̄-koh a̍h bô hō͘ iau--tio̍h léng--tio̍h, siáng chai, lāu-bú sí liáu-āu, I tō chū-li̍p mn̂g-hō͘, oân-choân bô tài-liām pē-á-kiáⁿ 10 nî ê chêng. A-kong kóng, hit-chūn chhù--ni̍h bô cha-bó͘-lâng, chi̍t-ke-hóe-á loān-chhau-chhau, A-píⁿ peh--á sûi lī-khui chhù, a-kong chin bē-tàng liōng-kái. bóe--á a-kong chiah chai-iáⁿ, sī A-píⁿ peh--á ê a-kū kiò i tio̍h-ài chū-li̍p mn̂g-hō͘, kap a-kong thoat-lī koan-hē.
|
A扁伯--á是a公1世人都真無法tō͘諒解ê人, a公講i chhiâⁿ養A扁伯--á 10年, 雖bóng m̄是親生--ê, m̄-koh a̍h無hō͘ iau--tio̍h冷--tio̍h, siáng知, 老母死了後, i就自立門戶, 完全無tài念pē-á-kiáⁿ 10年ê情. A公講, hit-chūn厝--ni̍h無cha-bó͘人, 1家伙á亂chhau-chhau, A扁伯--á隨離開厝, a公真bē-tàng諒解. 尾--á a公chiah知iáⁿ, 是A扁伯--á ê a舅叫i tio̍h-ài自立門戶, kap a公脫離關係. |
|
A-píⁿ peh--á lī-khui liáu-āu, miā-ūn iû-goân chiâⁿ khám-khek, lī-khui a-kong ê chhù, A-píⁿ peh--á phah-piàⁿ thàn-chîⁿ, bé-tē khí-chhù, kiàn-li̍p ka-tī ê ka-têng.
|
A扁伯--á離開了後, 命運猶原chiâⁿ坎坷, 離開a公ê厝, A扁伯--á phah拚趁錢, 買地起厝, 建立ka-tī ê家庭. |
|
Chin put-hēng, A-píⁿ peh--á tē-it-pái ê hun-in choân-sī pi-kio̍k kap thòng-khó͘, i ê khan-chhiú sin-thé bô hó, tiāⁿ-tiāⁿ phòa-pēⁿ, seⁿ ê gín-á mā lóng iáu-bōe tōa-hàn tō phah-sńg--khì, bóe--á liân A-píⁿ ḿ--á mā kòe-sin--khì, A-píⁿ peh--á soah ka-phò jîn-bông. Lī-khui siong-sim ê kò͘-hiong, A-píⁿ peh--á bat khì āu-soaⁿ Hoa-lian ó͘ tāi-lí-chio̍h thàn-chîⁿ, āu--lâi koh chhōa-bó͘, seⁿ saⁿ-ê hāu-seⁿ, bóe--á poaⁿ tńg-lâi goán keh-piah-chng----Un-té, seⁿ-kin thòaⁿ-hio̍h.
|
真不幸, A扁伯--á第1 pái ê婚姻全是悲劇kap痛苦, i ê牽手身體無好, tiāⁿ-tiāⁿ phòa病, 生ê gín-á mā lóng iáu-bōe大hàn就拍損--去, 尾--á連A扁ḿ--á mā過身--去, A扁伯--á soah家破人亡. 離開傷心ê故鄉, A扁伯--á bat去後山花蓮ó͘大理石趁錢, 後--來koh娶bó͘, 生3 ê後生, 尾--á搬tńg來goán隔piah庄──塭底, 生根thòaⁿ葉. |
|
Pêng-hoân tiām-chēng kòe 20 nî ê seng-oa̍h, tōa-hàn hāu-seⁿ----A-chúi--á kiat-hun seⁿ-kiáⁿ, 50 hòe tō chò a-kong, A-píⁿ peh--á chiok hoaⁿ-hí, chiok boán-chiok--ê, kui-sì-lâng khám-khám khek-khek, khí-khí lo̍h-lo̍h, chóng-sǹg kòe--khì-loh, I bián thoa lāu-miā--a. M̄-koh, a-kong kóng, A-píⁿ peh--á pháiⁿ-miā-keh, beh hiáng-siū ê sî, soah tio̍h kan-gâm bóe-kî.
|
平凡tiām靜過20年ê生活, 大hàn後生──A水--á結婚生kiáⁿ, 50歲就做a公, A扁伯--á chiok歡喜, chiok滿足--ê, kui世人坎坎坷坷, 起起落落, 總算過--去-loh, i免拖老命--a. M̄-koh, a公講, A扁伯--á pháiⁿ命格, beh享受ê時, soah tio̍h肝癌尾期. |
|
Goán jī-chí hō͘ A-píⁿ peh--á kōaⁿ-chúi-bí (khè-cha-bó͘-kiáⁿ), A-píⁿ peh--á tòa-īⁿ ê sî, góa bat kap jī-chí chò-hóe khì kā khòaⁿ, A-píⁿ peh--á it-ti̍t kóng i m̄ kam-goān, kan-khó͘ chi̍t-sì-lâng, kàu-bóe soah chi̍t-tiûⁿ khang, lâi chit-ê sè-kan sī lâi siū thoa-bôa ke kan-khó͘--ê, I kóng kah chin ke̍k-tōng, koh tōa-siaⁿ háu--chhut-lâi. Góa kap jī-chí khiā tī piⁿ--á tiām-tiām lâu-ba̍k-sái, m̄-chai beh án-chóaⁿ kā an-ùi. Kúi goe̍h-ji̍t liáu-āu, A-píⁿ peh--á tō tit-tio̍h kái-thoat, lī-khui sè-kan.
|
Goán二姐hō͘ A扁伯--á kōaⁿ水米(khè-cha-bó͘-kiáⁿ), A扁伯--á tòa院ê時, 我bat kap二姐做夥去kā看, A扁伯--á一直講i m̄甘願, 艱苦1世人, 到尾soah 1場空, 來chit-ê世間是來受拖磨加艱苦--ê, i講kah真激動, koh大聲háu--出-來. 我kap二姐khiā tī邊--á tiām-tiām流目屎, m̄知beh án-chóaⁿ kā安慰. 幾月日了後, A扁伯--á就得tio̍h解脫, 離開世間. |
|
(TGB Thong-sìn tē 39 kî, 2002 nî 12 goe̍h)
|
(TGB通訊第39期，2002年12月) |
