Tīm-kiuⁿ-bah
|
燉薑肉 |
| Tân Ui-chì |
陳威志 |
|
Chòe-kīn tú-á thiⁿ-khì bô ún-tēng, liam-mi-á joa̍h, liam-mi-á kôaⁿ, chá-àm khì-un piàn-hòa chin tōa, ū bē chió lâng tō án-ne khì kám--tio̍h kôaⁿ--tio̍h-a, che kám--tio̍h siōng kiaⁿ siáⁿ? Bô m̄ tio̍h, sī「sàu」! Sàu tō m̄-thang thoa, pòaⁿ-mî ná khùn ná sàu, ka-tī kan-khó͘, chhù--ni̍h ê lâng thiaⁿ--tio̍h mā sim-sng.
|
最近tú-á天氣真無穩定, liam-mi-á熱，liam-mi-á kôaⁿ, eng早暗氣溫變化真大, 有bē少人就án-ne去感--著kôaⁿ--著-a, che感--著上驚siáⁿ? 無m̄ tio̍h, 是「sàu」! Sàu就m̄通拖, 半瞑ná睏ná sàu, ka-tī艱苦, 厝--ni̍h ê人聽--著mā心酸. |
|
Kā lí siāu-kài 1-bī “tīm-kiuⁿ-bah”, pó-chèng chia̍h liáu chí-sàu kò͘-hì-kńg, koh ē-tàng pó͘-chhiong thé-la̍t.
|
Kā你紹介1味「燉薑肉」, 保證食了止sàu顧肺管, koh會tàng補充體力. |
|
Tāi-seng, khì chhī-á bé kóa sam-chân kap kiuⁿ-bó, 2-hāng lóng kā chhiat-phìⁿ, khǹg tī óaⁿ-kong lāi, khǹg ê sî-chūn ài 1-chân bah thia̍p 1-chân kiuⁿ, án-ne bah-chiap chiah ē ū kiuⁿ ê hiam-bī, chhòng hó liáu-āu kā hē lo̍h tiān-oe, óaⁿ-kong téng koh khàm 1-tè pôaⁿ-á, gōa-oe khǹg chha-put-to 1-kóng chúi, óaⁿ--ni̍h kap lāi-oe lóng bián, tán tiān-oe phiak--khí-lâi, chin-chiàⁿ sī phang-kòng-kòng koh kòng-kòng-phang, kan-taⁿ he kiuⁿ-bó ê bī, tō hō͘ lí that phīⁿ-khang--a, kōaⁿ sûi tō chhèng--chhut-lâi, m̄-thang kò͘ chia̍h bah, siōng tiōng-iàu sī kiuⁿ-bó kap bah piak--chhut-lâi ê bah-chiap, tō sī leh kò͘ hì-kńg--ê-lah!
|
Tāi先, 去市á買kóa sam-chân kap薑母, 2項lóng kā切片, khǹg tī碗公內, khǹg ê時chūn ài 1層肉疊 1層薑, án-ne肉汁chiah會有薑ê hiam味, chhòng好了後kā hē落電鍋, 碗公頂koh khàm 1塊盤á, 外鍋khǹg差不多1 kóng水, 碗--ni̍h kap內鍋lóng免, 等電鍋phiak--起-來, 真正是phang-kòng-kòng koh kòng-kòng-phang, kan-taⁿ he薑母ê味, 就hō͘你塞鼻孔--a, 汗隨就chhèng--出-來, m̄通顧食肉, 上重要是薑母kap肉piak--出-來ê肉汁, 就是leh顧肺管--ê-lah! |
|
Chia̍h chit-bī tīm-kiuⁿ-bah, bîn-á-chài ê khùi-la̍t, kin-á-ji̍t tō kā lí chhoân-piān-piān!
|
食這味燉薑肉, bîn-á-chài ê氣力, 今á日就kā你chhoân便便! |
|
(TGB Thong-sìn tē 31 kî, 2002 nî 4 goe̍h)
|
(TGB通訊第31期，2002年4月) |
