NIVEA
|
NIVEA |
| Tân Ui-chì |
陳威志 |
|
Un-tō͘ kàng kàu 14 tō͘, chit-lō chiah gàn ê thiⁿ, chhoán-khùi phīⁿ-khang to ē thiàⁿ, kiaⁿ bīn pit--khì, chhut-mn̂g chìn-chêng lóng ē boah kóa NIVEA.
|
溫度降到14度, 這lō chiah gàn ê天, 喘氣鼻孔都會疼, 驚面pit--去, 出門chìn前lóng會抹kóa NIVEA. |
|
“O͘-siông sa̍h-suh” tùi chin chē lâng lâi kóng, sī phōaⁿ in sêng-tióng chiok tiōng-iàu ê kì-tì, NIVEA tùi góa mā ū kāng-khoán ê ì-gī, pau-hâm mama tùi goán ê koan-sim.
|
「黑松沙士」對真chē人來講, 是伴in成長chiok重要ê記tì, NIVEA對góa mā有kāng款ê意義, 包含mama對goán ê關心. |
|
Tha̍k kok-hāu-á ê sî, piān-nā kàu kôaⁿ--lâng, chái-khí-sî-á mama beh chài goán khì tha̍k-chheh ê sî, lóng ē kā goán boah NIVEA. Góa bô ài bīn-á iû-iû, i chhiú nā lâi góa tō siám, kiàn-pái lóng bú kah i hong-hóe-to̍h, kā góa ê thâu chhi̍h8--leh, chhiú kā tōa-tōa-la̍t hôe lo̍h chhùi-phóe kap thâu-khak-hia̍h-á, boah liáu tō koh tì mn̂g-bō-á, hit-ê sî-chūn góa bô kah-ì NIVEA ê bī, kô͘ iû-iû hō͘ góa chiok bô sóng-khoài, tiāⁿ-tiāⁿ tán chē khí o͘to͘bai téng, tō sûi iōng mn̂g-ba8-n2 chò bīn-kin, kā bīn-á ê iû chhit chheng-khì.
|
讀國校á ê時, 便若到kôaⁿ--人, chái 起時á mama beh載goán去讀冊ê時, lóng會kā goán抹NIVEA. Góa無愛面á油油, i手若來我就閃, kiàn-pái lóng bú kah i風火to̍h, kā góa ê頭chhi̍h8--leh, 手kā大大力hôe落嘴phóe kap額頭, 抹了就koh tì毛帽, hit-ê時chūn góa無kah意NIVEA ê味, kô͘油油hō͘ góa chiok無爽快, tiāⁿ-tiāⁿ等坐起o͘to͘bai頂, 就隨用毛帽做面巾, kā面á ê油chhit清khì. |
|
Ū boah ke-kiám ū chha, jî-chhiáⁿ ē-káng ê kôaⁿ--lâng khah bô hiah khok-hêng, sui-bóng lóng kā NIVEA hôe hôe tiāu, bīn sī lóng bô khì pit--tio̍h.
|
有抹加減有差, 而且下港ê kôaⁿ--人khah無hiah酷刑, 雖bóng lóng kā NIVEA hôe hôe掉, 面是lóng無去pit--tio̍h. |
|
Tōa-hàn lâi-kàu hō͘-chúi kāu sip-khì tāng ê Tâi-pak, ū 1-kiàn tńg Tâi-lâm, hō͘ mama khòaⁿ tio̍h góa ê bīn pit--khì-a, i ná kā góa liām, oat--leh tō chhut-khì kā góa bé 1-ap NIVEA, kāng-khoán ê pau-chong, sio-siâng ê khì-bī, mama ê koan-sim mā iû-goân bô piàn. I chhùi--ni̍h kau-tài góa ài ka-tī chiàu-kò͘ ka-tī, tōa-lâng tōa-chéng--a, mama sī bē-ēng leh tòe tī lí sin-khu-piⁿ.
|
大hàn來到雨水kāu濕氣重ê台北, 有1-kiàn tńg台南, hō͘ mama看tio̍h góa ê面pit--去-a, i ná kā góa唸, oat--leh就出去kā góa買1盒NIVEA, kāng款ê包裝, 相siâng ê氣味, mama ê關心mā iû-goân無變. I嘴--ni̍h交帶góa ài ka-tī照顧ka-tī, 大人大種--a, mama是bē用leh tòe tī lí身軀邊邊. |
|
Góa chiok pháiⁿ-sè, tio̍h koh hō͘ mama hoân-ló, koh khì khòaⁿ-tio̍h i bô-êng chhut--lâi, bak-chúi sé-óaⁿ, sé-saⁿ, lóng kā kha-chhiú lōng kah pit--khì-a, ū tang-chūn koh ē lâu-hoeh, chin m̄-kam. Kiò i m̄-thang taⁿ-á kò͘ lāu(pē) kò͘ sè(goán), ka-tī m̄ tio̍h-ài ē-hiáu pó-ióng…
|
Góa chiok pháiⁿ-sè, tio̍h koh hō͘ mama煩惱, koh去看tio̍h i無閒出--來, bak水洗碗, 洗衫, lóng kā kha手弄kah pit--去-a, 有tang-chūn koh會流血, 真m̄甘. 叫i m̄-thang taⁿ-á顧老(爸)顧細(goán), ka-tī m̄ tio̍h-ài會hiáu保養…… |
|
Khòaⁿ khǹg tī toh-á-kak ê NIVEA, siūⁿ-tio̍h kò͘-hiong ê mama, mama, lí ū boah NIVEA--bô? Tio̍h chhēng khah sio--leh, m̄-thang kôaⁿ--tio̍h. Ū 1-kang, mama lāu--a, góa mā ē kā boah NIVEA!
|
看khǹg tī桌á角ê NIVEA, 想tio̍h故鄉ê mama, mama, lí有抹NIVEA--無? Tio̍h穿khah燒--leh, m̄-thang kôaⁿ--tio̍h. 有1工, mama老--a, góa mā會kā抹NIVEA! |
|
(TGB Thong-sìn tē 32 kî, 2002 nî 5 goe̍h)
|
(TGB通訊第32期，2002年5月) |
