Chài-hòe ê ji̍t-chí
|
載貨ê日子 |
| Tân Ui-chì |
陳威志 |
|
Chài-hòe ê ji̍t-chí ū-kàu hó kòe, 1 kang 2~3 chōa tō kòe--a, chò it-poaⁿ ki-chân lô-tōng-chiá ê ji̍t-chí tō-sī án-ne kòe.
|
載貨ê日子有夠好過, 1工2~3 chōa就過--a, 做一般基層勞動者ê日子就是án-ne過. |
|
Ū ê lâng án-ne tō boán-chiok--a, chhiūⁿ goán sió-tī ê pêng-iú, ji̍t--sî chò khang-khòe, àm-sî phah Game, se̍h iā-chhī.
|
有ê人án-ne就滿足--a, 像goán小弟ê朋友, 日--時做khang-khòe, 暗時phah Game, se̍h夜市. |
|
Tī in thâu-khak lāi bô siáⁿ-mi̍h ì-sek hêng-thài, mā bô lí-sióng hām hi-bāng, che sī tha̍k-chheh-lâng teh Care--ê, tha̍k-chheh-lâng ē siōⁿ chûn-chāi ê ì-gī, lô-tōng-chiá m̄-bián siōⁿ che, mā siōⁿ bē kàu hia, seng-oa̍h tō-sī seng-oa̍h, kám ū hiah chē tōa tō-lí? Kàu bóe--á, seng-chûn kan-taⁿ sī tōng-bu̍t pún- lêng ê piáu-hiān. Lâng, bô èng-kai sī án-ne niā-tiāⁿ.
|
Tī in頭殼內無siáⁿ-mi̍h意識型態, mā無理想hām希望, che是讀冊人teh Care--ê, 讀冊人會想存在ê意義, 勞動者m̄免想chē, mā想bē到hia, 生活就是生活, kám有hiah chē大道理? 到尾--á, 生存kan-taⁿ是動物本能ê表現. 人, 無應該是án-ne niā-tiāⁿ. |
|
Tha̍k-chheh-lâng siōⁿ liáu siuⁿ chē soah chhiau-hiān-si̍t, ū ê būn-tê tī chheh téng-bīn ū, tī hiān-si̍t siā-hōe--ni̍h bô, lâng, m̄-bián hiah giâ-kê, bô tāi-chì chhōe tāi-chì chò.
|
讀冊人想了siuⁿ chē soah超現實, 有ê問題tī冊頂面有, tī現實社會--ni̍h無, 人, m̄免hiah giâ-kê, 無tāi-chì chhōe tāi-chì做. |
|
Lán beh chiâⁿ-chò toh 1-khoán Style ê lâng? Siā-hōe--ni̍h chit 2-khoán lâng pun kah chiok chheng-chhó͘, nā bô-ài--ê, beh án-chóaⁿ?
|
Lán beh chiâⁿ做toh 1款Style ê人? 社會--ni̍h這2款人分kah chiok清楚, 若無愛--ê, beh án-chóaⁿ? |
|
Lán, beh án-chóaⁿ khah ē-tàng mài hō͘ chú-liû siā-hōe kā lán kái-piàn?
|
Lán, beh án-chóaⁿ khah會tàng mài hō͘主流社會kā lán改變? |
|
(TGB Thong-sìn tē 30 kî, 2002 nî 3 goe̍h)
|
(TGB通訊第30期，2002年3月) |
