Sîn bē bē-kì--tit
|
神bē bē記--tit |
|---|---|
| Tân Lûi | 陳雷 |
|
Khòaⁿ--khí-lâi sī pē-á-kiáⁿ hiaⁿ-tī, Kāng-khoán sàn kah kúi beh thoa--khì, Koah nâ-âu ê oan-siû, Ó͘ ba̍k-chiu-jîn ê chheh-hūn, Ùi tiâng-sî khai-sí ? |
看--起-來是父仔子兄弟， 共款散kah鬼beh拖--去， 割嚨喉ê冤仇， 挖目睭仁ê chheh恨， Ùi tiâng-時開始？ |
|
Soa-bô͘ ta-soaⁿ sī Ah-hu-gán (Afganistan) ê sèng-tē, Ta̍k-ji̍t kūi--lo̍h-khì pài-sîn ngō͘ piàn, Ki-tó hóe-sio-chhù ê chheh-hūn Kiông-kan cha-bó͘ ê oan-siû, Lú pài lú chē. |
沙漠礁山是Ah-hu-gán(Afganistan) ê聖地， 逐日跪落去拜神五遍， 祈禱火燒厝ê chheh恨， 強姦查某ê冤仇， 愈拜愈濟。 |
|
Sîn tī in tiong-kan ōe chi̍t-tiâu thi̍h-sòaⁿ, Lâng bē-tàng lâi-óng kiâⁿ--kòe, Kan-na chhèng-chí tōaⁿ bē-soah, Kap tōa-phàu pōng hō͘ in lóng-chóng sí. |
神tī in中間畫一條鐵線， 人bē當來往行--過， Kan-na銃chí tōaⁿ bē 煞， Kap大炮pōng hō͘ in攏總死。 |
|
Sí--khì-ê khòaⁿ--khí-lâi mā chin-sêng In pē-á-kiáⁿ hiaⁿ-tī, Seng pak hit-siang ê, Kiāu hit-ki kim chhùi-khí, Chheng-sǹg oan-siû ê khiàm-chè. |
死--去-ê看--起-來mā真成， In 父仔子兄弟， 先pak hit雙鞋， Kiāu hit支金嘴齒， 清算冤仇ê欠債。 |
|
Phòa-pò͘ pau ê sin-si Hō͘ Ah-hu-gán ê soa-hong chhoe ta--khì, Chiok-chē tēng-khok-khok un tī hia, Chhin-chhiūⁿ chò-hóe teh pài Ah-lah ê sîn : Sîn bē bē kì--tit, Lâng lóng bô iàu-kín. |
破布包ê身屍， Hō͘ Ah-hu-gán ê沙風吹礁--去， 足濟 tēng-khok-khok un tī hia, 親像做伙teh拜Ah-lah ê神： 神bē bē記--得， 人攏無要緊。 |
|
（Tâi-bûn-tong-sìn Tē 101 kî, 2002 nî 7 goe̍h)
|
（台文通訊第101期，2002年7月） |
