Tháu-pàng
|
Tháu-pàng |
| Noya |
Noya |
|
Chêng 1-chām-á chêng-sû bô jōa ún-tēng, mā éng-hióng tio̍h ka-tī ê seng-oa̍h. chèng-keng kóng--khí-lâi, ùi 8--goe̍h khai-sí chia̍h thâu-lō͘, ka-tī pún-té ê ha̍k-seng sim-thài tō it-ti̍t bô thiâu-chéng--kòe-lâi, ta̍k-kang thàu-chá lóng chiok oàn-chheh--ê.
|
前1-chām-á情緒無jōa穩定, mā影響tio̍h ka-tī ê生活. 正經講--起-來, ùi 8--月開始食thâu-lō͘, ka-tī本底ê學生心態就一直無調整--過-來, ta̍k工thàu早lóng chiok怨chheh--ê. |
|
Sī án-chóaⁿ tio̍h-ài khì siōng-pan? Sī án-chóaⁿ tio̍h-ài hông chhau gah beh sí? Sī án-chóaⁿ hā-pan tńg--lâi lóng bô cheng-sîn? Sī án-chóaⁿ ài chò ê tāi-chì 1-hāng to bô chò--tio̍h? Sī án-chóaⁿ siūⁿ beh kái-piàn soah lóng goân-chāi án-ne?
|
是án-chóaⁿ tio̍h-ài去上班? 是án-chóaⁿ tio̍h-ài hông操gah beh死? 是án-chóaⁿ下班tńg--來lóng無精神? 是án-chóaⁿ ài做ê tāi-chì 1項都無做--tio̍h? 是án-chóaⁿ想beh改變soah lóng原在án-ne? |
|
Kui goe̍h-ji̍t lo̍h--lâi, lóng kiu tī ka-tī o͘-àm ê siū lāi-té, it-ti̍t kàu ke teh thî chiáu teh kiò, tē 1 lo̍h kng-sòaⁿ chhiō--lo̍h-lâi ê sî, chiah chai-iáⁿ, m̄-tāⁿ ài tháu-pàng ka-tī ê kòe-khì, koh ài tháu-pàng ka-tī ê sim.
|
Kui月日落--來, lóng kiu tī ka-tī烏暗ê siū內底, 一直到雞teh啼鳥teh叫, 第1 lo̍h光線chhiō--落-來ê時, chiah知iáⁿ, m̄-tāⁿ ài解放ka-tī ê過去, koh ài解放ka-tī ê心. |
|
Chit-chām-á sim chēng--lo̍h-lâi, ta̍uh-ta̍uh-á kiâⁿ ji̍p-khì ka-tī ê sim, kā ka-tī ê choân-pō͘ lóng ó͘--chhut-lâi, pho͘ tī ji̍t-thâu ē-kha pha̍k. Tī chia, ū 1-kóa sī ka-tī m̄-goān khì bīn-tùi--ê, in-ūi ē kiaⁿ-hiâⁿ ē kiàn-siàu. M̄-koh chim-chiok hoán-séng kiám-thó liáu-āu ē hoat-hiān, kiaⁿ-lâng--ê kā se̍h--kòe liáu-āu, tō-sī 1-ê sin ê khai-sí.
|
這chām-á心靜--落-來, ta̍uh-ta̍uh-á行入去ka-tī ê心, kā ka-tī ê全部lóng挖--出-來, 鋪tī日頭下kha pha̍k. Tī chia, 有1-kóa是ka-tī m̄願去面對--ê, 因為會驚惶會kiàn-siàu. M̄-koh斟酌反省檢討了後會發現, 驚人--ê kā se̍h--過了後, 就是1個新ê開始. |
|
Chin-chiàⁿ bīn-tùi ka-tī ê o͘-àm, chiah ū châi-tiāu kiâⁿ ǹg kong-bêng.
|
真正面對ka-tī ê烏暗, chiah有才tiāu行ǹg光明. |
|
Chit kúi kang, thàu-chá khí--lâi ê sî, sim-chêng hoat-seng hòa-ha̍k piàn-hòa, piàn gah kap éng-kòe bô kāng-khoán. Chit-chūn góa chiah hoat-hiān, chò-lâng siōng oh mā siōng kán-tan--ê, tō-sī thiāu-chiàn ka-tī, hō͘ lêng-hûn chhin-chhiūⁿ hái-éng, hō͘ bah-thé chhin-chhiūⁿ koân-soaⁿ, hō͘ sîn-keng chhin-chhiūⁿ kùi-hong, hiah-nī bín-kám ióng-chāi ǹg chêng chhiong--khì.
|
這幾工, thàu早起--來ê時, 心情發生化學變化, 變gah kap éng過無kāng款. 這chūn góa chiah發現, 做人上oh mā上簡單--ê, 就是挑戰ka-tī, hō͘靈魂親像海湧, hō͘肉體親像koân山, hō͘神經親像季風, hiah-nī敏感勇在ǹg前衝--去. |
|
Góa chiok ài chit-má ê ka-tī, sui-bóng koh ū kóa khi̍h-kak, tán góa kā pó͘ hō͘ oân-boán.
|
Góa chiok愛chit-má ê ka-tī, 雖bóng koh有kóa khi̍h角, 等góa kā補hō͘圓滿. |
|
(TGB Thong-sìn tē 30 kî, 2002 nî 3 goe̍h)
|
(TGB通訊第30期，2002年3月) |
