Góa ê tiān-ōe phō͘-á
|
Góa ê電話簿á |
| Lîm Gî-hūi |
林宜慧 |
|
Ū lâng kóng góa chin sioh-chêng, khòaⁿ-tio̍h góa ê tiān-ōe phō͘-á lóng ū chi̍t-kóa ì-kiàn kap būn-tê: “Lí kám ē kì-tit chiah-nī chē lâng?” “Lí khām in kám lóng ū teh liân-lo̍k?”
|
有人講góa真惜情, 看tio̍h góa ê電話簿á lóng有1-kóa意見kap問題:「Lí kám會記得chiah-nī chē人?」「Lí khām in kám lóng有teh聯絡?」 |
|
Chū sè-hàn, góa ū chi̍t-chióng koàn-sì, tō-sī m̄-koán kap góa sī siáⁿ-mi̍h koan-hē ê lâng, góa lóng ē chīn-liōng kì tīphō͘-á, jî-chhiáⁿ kā tùi ta̍k-ê lâng ê kám-kak siá--khí-li̍h.
|
自細hàn, góa有1種慣勢, 就是m̄管kap góa是siáⁿ-mi̍h關係ê人, góa lóng會盡量記tī簿á, 而且kā對ta̍k-ê人ê感覺寫--起-li̍h. |
|
M̄-koh lang teh tōa-hàn jîn-sò͘ cheng-ka, lōe-iông mā ē tiāⁿ-tiāⁿ ōaⁿ, ta̍k-kái têng-siá têng-chhau lóng chin hùi-khì, ū lâng ōaⁿ tiān-ōe hoan-hō, e-mail, chhiú-ki-á ê sî, góa tō ē khì siūⁿ chit-ê lâng teh chò siáⁿ-mi̍h, tō chhin-chhiūⁿ teh khòaⁿ ka-tī ê sêng-tióng kòe-têng.
|
M̄-koh人teh大hàn人數增加, 內容mā會tiāⁿ-tiāⁿ換, ta̍k-kái重寫重抄lóng真費氣, 有人換電話番號, e-mail, 手機á ê時, góa就會去想這個人teh做siáⁿ-mi̍h, 就親像teh看ka-tī ê成長過程. |
|
Í-chêng góa teh hun-lūi, sī ùi kok-sió, kok-tiong, ko-tiong, im-ga̍k-pan, mô͘-pit-pan, Eng-gí-pan......kàu tāi-ha̍k liáu-āu, chham-ka siā-thoân, tha̍k-chheh-hōe kap iâⁿ-tūi, bat ê lâng ke chiok chē, nî-hòe mā chha chin chē, ū gín-á mā ū lāu-lâng.
|
以前góa teh分類, 是ùi國小, 國中, 高中, 音樂班, 毛筆班, 英語班......到大學了後, 參加社團, 讀冊會kap營隊, bat ê人加chiok chē, 年歲mā差真chē, 有gín-á mā有老人. |
|
Ū lâng chhiò góa kóng: :Lí lâng-bīn chin khoah, í-āu chhut-lâi soán tāi-piáu--lah!” Che m̄-sī góa ê bo̍k-te̍k, kan-taⁿ sī beh iōng ka-tī ê lêng-le̍k khì chò tāi-chì niā-tiāⁿ, chò siáⁿ-mi̍h pēng bô tiōng-iàu.
|
有人笑góa講:「Lí人面真闊, 以後出來選代表--lah!」Che m̄是góa ê目的, kan-taⁿ是beh用ka-tī ê能力去做tāi-chì niā-tiāⁿ, 做siáⁿ-mi̍h並無重要. |
|
Pêng-iú tō-sī ài hō͘-siong tàu-saⁿ-kāng, sui-jiân lī chin hn̄g, m̄-koh m̄-koán siáⁿ-mi̍h sî-kan iah-sī siáⁿ-mi̍h só͘-chāi, goa lóng chin jia̍t-sim, chin-sim teh kau pêng-iú. Se̍k-sái bô it-tēng kú-tn̂g, mā ū khó-lêng sī “kòe-kheh” niā-tiāⁿ, m̄-koh góa tú-tio̍h chin chē kùi-jîn.
|
朋友就是ài互相tàu-saⁿ-kāng, 雖然離真hn̄g, m̄-koh m̄管siáⁿ-mi̍h時間iah是siáⁿ-mi̍h所在，goa lóng真熱心, 真心teh交朋友. 熟sái無一定久長, mā有可能是『過客』niā-tiāⁿ, m̄-koh góa tú-tio̍h真chē貴人. |
|
Ū sî-chūn, tùi-hong hoān-sè m̄ chai-iáⁿ góa bat--i, iah-sī i í-keng bē kì-tit góa--a, m̄-koh góa jīn-lâng jīn-lō͘ ê lêng-le̍k koh bē bái. Góa ê kò-sèng khah ke-pô, kok-sió, kok-tiong, ko-tiong ê tông-chhong-hōe lóng sī góa teh pān, liân poaⁿ-chhù ê tông-o̍h mā hō͘ góa chhōe--tio̍h, m̄-chiah in lóng kiò góa『阿亮慧』.
|
有時chūn, 對方hoān-sè m̄知iáⁿ góa bat--i, iah是i已經bē記得góa--a, m̄-koh góa認人認路ê能力koh bē bái. Góa ê個性khah雞婆, 國小, 國中, 高中ê同窗會lóng是góa teh辦, 連搬厝ê同學mā hō͘ góa chhōe--tio̍h, m̄-chiah in lóng叫góa『阿亮慧』. |
|
Góa bat siūⁿ--kòe, góa ê miâ sī-m̄-sī tī pa̍t-lâng ê sèⁿ-miā tiong Delete--khì-a? Chin kám-siā ta̍k-ê tī góa sèⁿ-miā tiong chhut-hiān--kòe ê lâng, ta̍k-ê sū-kiāⁿ kap kò͘-sū, lóng ē kam chit-pún tiān-ōe phō͘-á kì-lo̍k--khí-lâi.
|
Góa bat想--過, góa ê名是m̄是tī別人ê性命中Delete--去-a? 真感謝ta̍k-ê tī góa性命中出現--過ê人, ta̍k-ê事件kap故事, lóng會kám這本電話簿á記錄--起-來. |
|
(TGB Thong-sìn tē 29 kî, 2002 nî 2 goe̍h)
|
(TGB通訊第29期，2002年2月) |
