Kò͘-hiong ê A-pà
|
故鄉ê A-pà |
| Lîm Gāi-soan |
林艾萱 |
|
Lī-khui góa ê kò͘-hiong Gô͘-chhe í-keng ū kúi-á-nî--a, chū kok-tiong khai-sí, góa tiō chhut-lâi gōa-kháu tha̍k-chheh--a! Tī Tām-chúi tha̍k-chheh kàu taⁿ, put-sî ē ū lâng hoâi-gî góa kám sī chiàⁿ-káng ê hái-kháu-lâng? Sī án-chóaⁿ tiāⁿ beh chai-iáⁿ góa ê khiuⁿ-kháu ū hái-kháu-khiuⁿ--bô? In mā ē mn̄g Tâi-pak ê Tām-chúi kap Tâi-tiong ê Gô͘-chhe, toh 1-ê só͘-chāi khah kôaⁿ? Tī góa lōe-sim, Tām-chúi sī seng-khu ê léng; Gô͘-chhe sī lōe-sim ê léng.
|
離開góa ê故鄉梧棲已經有幾á年--a, 自國中開始, góa就出來外口讀冊--a! Tī淡水讀冊到taⁿ, 不時會有人懷疑góa kám是正港ê海口人? 是án-chóaⁿ tiāⁿ beh知iáⁿ góa ê腔口有海口腔--無? In mā會問台北ê淡水kap台中ê梧棲, toh 1-ê所在khah kôaⁿ? Tī góa內心, 淡水是身軀ê冷; 梧棲是內心ê冷. |
|
Tām-chúi ta̍k-nî lóng ū siōng kē-un ê sî, m̄-koh Tām-chúi koh án-chóaⁿ léng, mā pí bōe kòe góa kò͘-hiong ê a-pà.
|
淡水ta̍k年lóng有siōng低溫ê時, m̄-koh淡水koh án-chóaⁿ冷, mā比bōe過góa故鄉ê a-pà. |
|
A-pà ê khang-khòe sī ta̍k-kang thàu-chá thiⁿ bē kng, tio̍h-ài chhut-mn̂g “pun pò-chóa”, kui-nî-thàng- thiⁿ kan-taⁿ kòe-nî ē-sái hioh-khùn niâ. Gōa-kháu thiⁿ iáu-bē kng ê sî, a-pà tio̍h-ài khí-chhn̂g choh-sit, bô-lūn gōa-bīn o͘-sô-sô, thàu-hong lo̍h-hō͘, hân-sng léng-sún-sún ah sī joa̍h--lâng ji̍t-thâu chhut--lâi liáu-āu, khiâ o͘to͘bai pha̍k kah o͘-mà-mà, a-pà tńg-lâi chhù--ni̍h, saⁿ-á-khò͘ lóng tâm- kô͘-kô͘.
|
A-pà ê khang-khòe是ta̍k工thàu早天bē光, tio̍h-ài出門「分報紙」, kui年thàng天kan-taⁿ過年會sái hioh-khùn niâ. 外口天iáu-bē光ê時, a-pà tio̍h-ài起床作sit, 無論外面烏sô-sô, thàu風落雨, 寒霜冷sún-sún ah是熱--人日頭出--來了後, khiâ o͘to͘bai pha̍k kah烏mà-mà, a-pà tńg來厝--ni̍h, 衫á褲lóng tâm-kô͘-kô͘. |
|
Ē kì-tit sòe-hàn ū 1-pái, a-pà in-ūi ba̍k-chiu siū-siong khui-to, i-seng kóng ba̍k-chiu ài ke hioh-khùn, bōe-sái pha̍k ji̍t-thâu. Ah m̄-koh, a-pà kian-chhî beh chhut-mn̂g choh-sit, i kóng: “Iáu ū chin chōe lâng teh tán in ê pò-chóa!” A-pà chhut-mn̂g thàn-chîⁿ, sī ūi-tio̍h beh hō͘ gún tha̍k-chheh.
|
會記得細hàn有1-pái, a-pà因為目chiu受傷開刀, 醫生講目chiu ài ke hioh-khùn, bōe-sái pha̍k日頭. Ah m̄-koh, a-pà堅持beh出門作sit, i講:「Iáu有真chōe人teh等in ê報紙!」A-pà出門thàn錢, 是為tio̍h beh hō͘ gún讀冊. |
|
Chit-má, gín-á lóng tōa-hàn--a, a-pà mā 60 kúi hòe--a, kiò a-pà mài koh choh-sit, tī chhù--ni̍h hioh-khùn, a-pà kóng siàu-liân-sî choh-sit sī 1-chióng chek-jīm, chit-má tùi i lâi kóng, sī 1-chióng ūn-tōng. Sui-bóng a-pà chhùi--ni̍h án-ne kóng, góa chai-iáⁿ sī ūi-tio̍h beh kā gún an-ùi, in-ūi, ta̍k-piàn a-pà chhut-mn̂g ê sî, góa ê sim tiō pí kôaⁿ--lâng khah léng, pí joa̍h--lâng khah joa̍h.
|
Chit-má, gín-á lóng大hàn--a, a-pà mā 60幾歲--a, 叫a-pà mài koh作sit, tī厝--ni̍h hioh-khùn, a-pà講少年時作sit是1種責任, chit-má對i來講, 是1種運動. 雖bóng a-pà嘴--ni̍h án-ne講, góa知iáⁿ是為tio̍h beh kā gún安慰, 因為, ta̍k-piàn a-pà出門ê時, góa ê心就比kôaⁿ--人khah冷, 比熱--人khah熱. |
|
(TGB Thong-sìn tē 39 kî, 2002 nî 12 goe̍h)
|
(TGB通訊第39期，2002年12月) |
