Í-keng Tiàu-oán ê Ji̍t-chí
|
已經tiàu遠ê日子 |
| Hoanya kc |
Hoanya kc |
|
Kok-bîn ha̍k-hāu 6-nî ē-sái kóng sī kàu taⁿ ê jîn-seng siōng kài hó-sńg ê ji̍t-chí. Tī ha̍k-hāu í-keng sī siōng lāu chu-keh, siōng tōa-bóe..ê. Khì kàu tó-ūi lóng ū kē-nî-kip ê lâng lâi kiâⁿ-lé âi-sat-chuh. Chhèng kah!
|
國民學校6年會使講是到今ê人生上kài好sńg ê日子。Tī學校已經是上老資格、上大尾--ê。去到tó位攏有低年級ê人來行禮âi-sat-chuh。 Chhèng kah！ |
|
Koh ū teh tam-tng kiú-chhâ-tūi ê khang-khòe, múi-ji̍t chá-sî chhēng kim-sek ê ká-á, tī tōa-lō͘-kháu ēng tōa ki thôe-á pa̍k n̂g-sek ê 3 kak kî, cha̍h-chhia ín-chhōa kē-nî ê tông-ha̍k kòe-lō͘ ji̍p-lâi ha̍k-hāu. Koh ē lûn-tio̍h khì kā hit tè Chhia-lián-á kî, chhiūⁿ-khí-khì thi̍h-ko téng. Choân-hāu lāi ē-tāng..ê, ē-thî..ê, tùi hāu-tiúⁿ, lāu-su, kang-iú, a-sáng, koân-kē-nî-kip ê ha̍k-seng, kàu hāu-kang hit kúi chiah chhī lâi beh chia̍h ê o͘-káu, tē-chiūⁿ ê si̍h-sut-á, teh poe ê o͘-bui-á, lóng ài tiām-tiām hioh teh gîn hit kho͘ chhia-lián. Chiâⁿ-chò chhiūⁿ-chhia-lián-chhiú sui-bóng chit-sî khòaⁿ--khí--lâi bô teh jōa kong-êng, m̄-koh tong-sî sī iāng kah lia̍h bē tiâu.
|
Koh有teh擔當糾察隊ê工課，每日早時穿金色ê ká仔，tī大路口用大支thôe仔綁黃色ê 3角旗，cha̍h車引chhōa低年級ê同學過路入來學校。Koh會輪著去kā hit tè車輪仔旗，chhiūⁿ起去鐵ko頂。全校內會動--ê、會啼--ê,tùi校長、老師、工友、阿sáng、懸低年級ê學生，到校工hit幾隻飼來beh食ê烏狗、地上ê蟋蟀仔、teh飛ê烏bui仔，攏ài恬恬歇teh gîn hit箍車輪。成做chhiūⁿ車輪手雖罔這時看--起--來無teh jōa光榮，m̄-koh當時是iāng kah掠bē tiâu。 |
|
Tiong-tàu-sî-á kāng-khoán long hit niá pha-li̍h pha-li̍h ê ká-á, tōa-pān tōa-pān kiâⁿ-ji̍p-khì sûn hiah-ê kē-tiong-nî-kip ê tông-ha̍k ū koai-koai-á phak teh khùn bô. (Hit5 ê nî-tāi, kok-bîn-ha̍k-hāu ke̍k-kî chù-tiōng khùn tàu, ná-chhiūⁿ ū hit-hō choân-bîn khùn tiong-tàu kiàn-kok ūn-tōng ê khoán.) Nā kui-pan ū khùn kah khô͘-khô͘-kiò, tio̍h hún-pit sa--khí--lâi phiat chit-kù "chhoân-siáu chóe-hâu-pan". Ta̍k-kò-goe̍h lóng ū kè-sǹg, phêng-tēng kok pan-kip ê sêng-chek, tī chá-hōe sî hō͘ hāu-tiúⁿ o-ló. Nā-chún ū kúi chiah niau bô ài khùn, thâu phak tī toh-téng, bīn sòa oat-kòe kap keh-piah ê lâng thâu-thâu-á ōe-sian, tio̍h lâu 3-jī "chóe-hoái-pan" tī o͘-pang téng. Thèng-hāu lāu-su ē-po͘ lâi hō͘ tāi-ke "hó-khòaⁿ". Tōa-siaⁿ lé sī tek-khak ū, nā lāu-su khí-mo͘ bái, koh ē thàn phôe-thiàⁿ. Sī po á-sī mē, lóng pîn kiú-chhâ-tūi ê 1-kù-ōe.
|
中晝時仔共款long hit領pha-li̍h pha-li̍h ê ká仔，大pān大pān行入去巡hiah-ê低中年級 ê 同學有乖乖仔仆teh睏無。（Hit ê年代，國民學校極其注重睏晝，若像有hit-hō全民睏中晝建國運動ê款。）若歸班有睏kah khô͘-khô͘叫，著粉筆sa--起--來phiat 1句「全校最好班」。逐個月攏有計算，評定各班級ê成績，tī早會時hō͘校長o-ló。若準有幾隻貓無ài睏，頭仆tī桌頂，面煞越過kap隔壁ê人偷偷仔話仙，著留3字「最壞班」tī烏板頂。聽候老師e晡來hō͘大家「好看」。大聲lé是的確有，若老師khí-mo͘歹，koh會趁皮疼。是褒抑是mē,攏憑糾察隊ê 1句話。 |
|
Chit khoán chêng-hêng kài chhin-chhiūⁿ thóng-tī-chiá ê pō͘-sò͘. "Kó͘-kin Tâi-gōa" thóng-tī-chiá tiāⁿ-tiāⁿ tī pī-thóng-tī-chiá tiong-kan kéng-soán sim-sèng bô kian-tēng..ê, "chia̍h pē óa pē, chia̍h bó óa bó" hit khoán..ê, lâi kàm-sī kap thong-pò. "Ēng Tâi-oân-lâng thóng-tī Tâi-oân-lâng" hāu-kó siōng kài chán. Lūn-chin kóng, 6-nî ê kâu-sí gín-á bat sím-mi̍h, ka-kī ê sèng-tē iû-koh chhóng-pōng, phî-khì iáu bô tiāⁿ-tio̍h, beh án-chóaⁿ ē-thang kā kāng iù-chíⁿ ê lâng pêng-hun, séng-chhat--leh? Chit-khoán chò-hoa̍t hō͘ hông chhú-hoat ê kē-nî-kip sim-lāi oàn-tò͘, put-sî teh phàn teh bāng, āu-ji̍t chiâⁿ-chò koân-nî-kip ê sî, ē-tit-thang chau-that sin-lâi ê lâng. Chit-khoán "jiàu-pê-á" bûn-hòa kā goân-pún chhin-chhin-ài-ài ê tong-chhong-chêng lóng phah-pháiⁿ liáu-liáu. Tông-o̍h tiong-kan hō͘-siōng kàm-sī, kan-kè saⁿ-kau-hō͘. Chēng sè-hàn tio̍h giâu-gî saⁿ-tùi, bo̍k-koài Tâi-oân siā-hōe sim-lêng kiaⁿ-hiâⁿ, tùi chheⁿ-hūn-lâng bô sìn-jīm. Chit-khoán sèng-chit tek-khak ē pāi-hāi hiān-tāi chhī-bîn siā-hōe (civil society) ê kiàn-li̍p.
|
這款情形kài親像統治者ê步數。「古今台外」統治者定定tī被統治者中間揀選心性無堅定--ê,「食父倚父，食母倚母」hit款--ê,來監視kap通報。「用台灣人統治台灣人」效果上 kài chán。論真講，6年ê猴死囡仔bat甚mi̍h，家己ê性地iáu koh chhóng-pōng,脾氣iáu無定著，beh án-chóaⁿ會thang kā共幼chíⁿ ê人評分、省察--leh？這款做法hō͘ hông處罰ê低年級心內怨妒，不時teh盼teh望，後日成做懸年級ê時，會得thang糟踢新來ê人。這款「jiàu-pê-á」文化kā原本親親愛愛ê同窗情攏扑歹了了。 同學中間互相監視，奸計相交hō͘。從細漢著giâu疑相對，莫怪台灣社會心靈驚惶，tùi生份人無信任。這款性質的確會敗害現代市民社會（civil society）ê建立。 |
|
Góa ê 4, 5, 6 nî-kip ê kip-jīm lóng sī Lîm Lāu-su, i seⁿ-chò sán-thiu koh ū la̍t-thâu. I chhōa ha̍k-seng ê tiōng-tiám tio̍h-sī sin-thé lô-tōng, sim-lêng hoa̍t-phoat. Múi lé-pài chun-chiàu ha̍k-hāu kui-tēng, it-tēng ài ū 4 chiat ê thé-io̍k-khò. Lim lāu-su m̄-nā bô kap hiah-ê chu-iu-pan kāng-khoán, the̍h-lâi tha̍k sò͘-ha̍k, "kok-gú", tian-tò kā 1-kóa khò sóa-lâi chhōa ha̍k-seng ūn-tōng. Só͘-í tùi thé-chhau(pha-lìn-táu, tò-thâu-chai, tiô thiàu-siuⁿ, hàiⁿ tan-kǹg), cháu-pio(tn̂g, té lō͘), thiàu-koâiⁿ, phah-kiû(pâi-kiû, siám-bi̍h-kiû, kha-lúi-kiû) lóng-chóng ū kà goán sńg--kòe. I ê iau-kiû siong-tong giâm-keh, ta̍k-hāng tōng-chok lóng-ài chèng-khak, chiâu-chn̂g, bē-sái má-má hu-hu--tit. M̄-koh i iā hui-siông thiàⁿ ha̍k-seng, bat khòaⁿ-tio̍h góa ê chńg-thâu-á iù-siù sè-ki-kut, kiò góa m̄-thang phah pâi-kiû, kiaⁿ-liáu siong--tio̍h.
|
我ê 4、5、6年級ê級任攏是林老師，伊生做sán-thiu koh有力頭。 伊chhōa學生ê重點著是身體勞動、心靈活潑。 每禮拜遵照學校規定，一定ài有4節ê體育課。林老師m̄-nā無kap hiah-ê資優班共款，提來讀數學、「國語」，顛倒kā 1寡課徙來chhōa學生運動。所以tùi體操（pha-lìn斗、倒頭栽、tiô跳箱、hàiⁿ單槓）、走標（長、短路）、跳懸、扑球（排球、閃bi̍h球、腳壘球）攏總有教阮sńg--過。伊ê要求相當嚴格，逐項動作攏ài正確、chiâu-chn̂g,bē使馬馬虎虎--tit。M̄-koh伊也非常疼學生，bat看著我ê chéng頭仔幼秀細支骨，叫我m̄-thang扑排球，驚了傷--著。 |
|
M̄-chai kiám-sī án-ne, tông-o̍h tāi-ke lóng ióng-béng ná hó͘. Múi-ji̍t tiong-tàu-sî chia̍h pá kàu hioh-khùn ū 30 hun ê chū-iû sî-kan, lóng ē tī ūn-tōng-tiâⁿ khòaⁿ-tio̍h 6-nî 1-pan ê eng-hiông hó-hàn liú-lia̍h ê hêng-iáⁿ. Kúi 10 ê lâng, jiok 1-lia̍p kha-kiû, hoān-nā the̍h-tio̍h kiû ê lâng, tio̍h chhut-la̍t tùi thiⁿ-téng khí kha that, khòaⁿ sím-mi̍h lâng that khah koân. Tī 2-lâu téng koh ū cha-bó͘-pan ê gín-á-ché teh hoah-hiàm ka-iû. Kiàn-pái lóng-sī goán-pan teh chhut-thâu, put-sî ē chiap-tio̍h cha-bó͘ gín-á loân-bō͘ ê chêng-phoe. Tùi 10-thóng hòe ê sè-hàn gín-á, sè-kài bô koh ū khah kiau-ngō͘ chit-chân ê tāi-chì--lah.
|
M̄知kiám是án-ne,同學大家攏勇猛若虎。每日中晝時食飽到歇睏有30分ê自由時間，攏會tī運動埕看著6年1班ê英雄好漢liú-lia̍h ê形影。幾10個人，jiok 1粒腳球，hoān-nā提著球ê人，著出力tùi天頂起腳踢，看甚mi̍h人踢較懸。Tī 2樓頂koh有查某班ê囡仔姊teh喝hiàm加油。Kiàn擺攏是阮班teh出頭，不時會接著查某囡仔戀慕ê情批。Tùi 10-thóng歲ê細漢囡仔，世界無koh有較驕傲這層ê代誌--lah。 |
|
Koh in-ūi án-ne, bat kap pan--n̍i̍h ê lēng-gōa 1-ê tông-o̍h A-chhòng khì "do͘ble dates". Tùi-hong sī 2-ê 6-nî 7-pan ê gín-á-ché, sîn-koân 165, seⁿ-chò iau-kiau pá-chúi. Kóng--khí--lâi mā hó chhiò, hit-sî góa kap hit-ê A-chhòng..a mā chiah 145 nā-tiāⁿ, kiàn-pái ēng 2-lián-chhia chài in 2-ê, ná chhin-chhiūⁿ sió-tī tòe tōa-chí--leh. Bat khì Sian-kiong hì-hn̂g khòaⁿ hit-chhut秦漢kap林鳳嬌chú-ián ê籃球情人夢. M̄-sī kóng hit-chūn jōa ài phah nâ-kiû chiah khì khòaⁿ (Hit-sî tāi-ke siáu iá-kiû. Tâi-oân iá-kiû-tūi chhèng-kàu Bí-kok--khì.), si̍t-chāi sī bô lâng beh hip "棒球”情人夢hō͘ Tâi-oân-lâng khòaⁿ. Kàu taⁿ oân-choân bē-kì-tit hit-chhut tiān-iáⁿ teh poaⁿ sím-mi̍h, tú-a ē kì-tit hit 2 tiám-cheng tī àm-bong-bong ê hì-hn̂g--n̍i̍h, 2 lâng lóng bô teh khòaⁿ tiān-iáⁿ, kan-ta 4 lúi ba̍k-chiu saⁿ-siòng, chhiú la̍k chò-hóe, sim-thâu-íⁿ-á tîⁿ-tîⁿ-tîⁿ. Soah-tiûⁿ liáu-āu, kui-ki chhiú-tê-á tâm-kô͘-kô͘, chhúi-tê-á-hûn kha̍h kah choân sian, iáu m̄-kam khì sé-tiāu.
|
Koh因為án-ne,bat kap班--n̍i̍h ê另外1個同學阿chhòng去「do͘ble dates」。對方是2個6年7班ê囡仔姊，身懸165，生做妖嬌飽水。講--起--來mā好笑，hit時我kap hit-ê 阿chhòng..a mā才145 nā-tiāⁿ，kiàn擺用2輪車載in 2個，若親像小弟tòe大姊--leh。Bat去仙宮戲園看hit齣秦漢kap林鳳嬌主演ê籃球情人夢。M̄是講hit-chūn jōa ài扑籃球才去看（Hit時大家痟野球。台灣野球隊chhèng到美國--去。）實在是無人beh hip「棒球」情人夢hō͘台灣人看。到今完全bē記得hit齣電影teh搬甚mi̍h，tú-a會記得hit 2點鐘tī暗bong-bong ê戲園--n̍i̍h,2人攏無teh看電影，kan-taⁿ 4蕊目珠相siòng,手la̍k做伙，心頭íⁿ-á tîⁿ-tîⁿ-tîⁿ。煞場了後，歸支手tê仔tâm糊糊，手tê仔痕kha̍h kah全sian、iáu m̄甘去洗掉。 |
|
Tiōng-sī sin-thé lô-tōng, sim-lêng hoa̍t-phoat ê pan-kip m̄-sī lóng hó-khang..ê. Goán hit-pan ê sêng-chek sī nōa kô͘-kô͘. Ta̍k-pái goe̍h-khó liáu-āu chiū-sī lāu-su ba̍k-thâu kat-kat ê sî. Pa̍t-lâng pan choân-pan pêng-kun 99, 98 tiám, goán hit-pan chiah ū 80 kúi tiám, chha lâng ū kàu chē. Lau-su chù-tiōng sin-thé, sim-lêng, chū-jiân ha̍k-seng ê sêng-chek chiū tòe bē-tio̍h hiah-ê chu-iu-pan.
|
重視身體勞動、心靈活潑ê班級m̄是攏好空--ê。阮hit班ê成績是爛糊糊。逐擺月考了後就是老師目頭結結ê時。別人班全班平均99、98點，阮hit班才有80幾點，差人有夠濟。老師注重身體、心靈，自然學生ê成績就tòe bē著hiah-ê資優班。 |
|
Góa ū 1-pái chham-ka choân-hāu ê sò͘-ha̍k khó-chhì. Lāi-bīn ū chi̍t-tiâu tê-bo̍k sī án-ne: A-Chak kin-nî 20-hòe, tú-chiah chhōa-bó͘. Lāu-pē hō͘ i 1,000 kho͘ chò chhōa-bó͘ ê só͘-hùi. I kā chiah-ê chîⁿ khiām-ji̍p-khì gîn-hâng. Gîn-hâng ê lī-sek 1-nî sī 5%. A-Chak chún-pī kā chîⁿ kià 20 tang beh chò āu-pái kiáⁿ-jî ê kàu-io̍k ki-kim. Chhiáⁿ mn̄g A-Chak tī 20 nî āu, liân pún-kim ke lī-sek, lóng-chóng ē-sái niá jōa chē?
|
我有1擺參加全校ê數學考試。內面有1條題目是án-ne: 阿Chak今年20歲，tú-chiah娶某。老父hō͘伊1,000箍做娶某ê所費。伊kā chiah-ê錢khiām入去銀行。銀行ê利息1年是 5%。阿Chak準備kā錢寄20冬beh做後擺子兒ê教育基金。請問阿Chak tī 20年後，連本金加利息，攏總會使領偌濟？ |
|
Khòaⁿ-tio̍h chit-ê būn-tê, góa siūⁿ kóng kán-tan. 1,000 kho͘ pún-kim, 1-nî lī-sek 5%, ē-sái the̍h-tio̍h 50 kho͘. 20 nî āu sī 50x20 téng-î 1,000 kho͘. Koh ke pún-kim 1,000, lóng-chóng 2,000 kho͘.
|
看著這個問題，我想講簡單。1,000箍本金，1年利息 5%，會sái提著50箍。20年後是50x20等於1,000箍。Koh加本金1,000，攏總2,000箍。 |
|
Kiat-kó sī hông phah-m̄-tio̍h. In kóng tāi-chì m̄-sī án-ne. Tē-1-nî kòe-liáu, pún-kim ke tē-1-nî ê lī-sek piàn-chò tē-2-nî ê pún-kim. Án-ne 1-nî kòe--khì tio̍h ài kā téng-nî ê lī-sek ka-ji̍p khì pún-kim chò-hóe sǹg. Ho̍͘h, mā khah pài-thok--leh, ài kè-sǹg 20-pái. To m̄-sī tú-á chò hit-tiâu tê-bo̍k tio̍h-hó (lóng-chóng ū 15-tiâu, chò 50-hun), khah ē ū hit-khoán Bí-kok sî-kan kā sǹg 20 pái--leh. Khó-chhì khó-liáu ū thiaⁿ pa̍t-pan..ê teh kóng, hit-khoán tê-bo̍k m̄-bián 1-nî 1-nî sǹg. In lāu-su ū kà kong-sek ē-sái tāi. In koh chhiò goán hit-pan lāu-su lióng-kong, ha̍k-seng pūn-tháng, liân chit-khoán chiah kán-tan ê tê-bo̍k iā bē hiáu chò. Hit-sî thiaⁿ kah chhùi khui-khui, m̄-chai sè-kan ū chiah-n̍i̍h chhim ê sò͘-ha̍k kong-sek ē-sái kái-koat chiah-n̍i̍h oh ê būn-tê. Góa chin put-ho̍k, siūⁿ-kóng ka-kī kiám-ū hiah gōng, tio̍h beh kā in mn̄g 1-ê siông-sè. In kóng chai-iáⁿ hiah chē beh chhòng-siáⁿ, ē-hiáu tāi kong-sek chò tê-bo̍k the̍h hun-sò͘ khah tiōng-iàu. Hit-piàn khó-chhì ê kiat-kó m̄-bián kóng mā chai, sī àu-kô͘-kô͘. Khòaⁿ-tio̍h hiah-ê bô jōa-gâu ê chu-iu-pan ê ha̍k-seng teh niá-chióng, sim-lāi ū tām-po̍h-á ut-chut, oàn-tò͘.
|
結果是hông扑m̄著。In講代誌m̄是án-ne。第1年過了，本金加第1年ê利息變做第2年ê本金。Án-ne 1年過--去著 ài kā頂年ê利息加入去本金做伙算。Ho̍͘h,mā較拜託--leh，ài計算20擺。To m̄是tú-á做hit條題目著好（攏總有15條，做50分），khah 會有hit款美國時間kā算20擺--leh。考試考了有聽別班--ê teh講：「Hit款題目m̄免1年1年算，in老師有教公式會使代。」In koh笑阮hit班老師lióng-kong、學生笨桶，連這款chiah簡單ê題目也bē曉做。Hit時聽kah嘴開開，m̄知世間有chiah-n̍i̍h深ê數學公式會使解決chiah-n̍i̍h難ê問題。我真不服，想講家己kiám有hiah憨，著 beh kā in問1個詳細。In講知影hiah濟beh創啥，會曉代公式做題目提分數較重要。Hit遍考試ê結果m̄免講mā知，是àu-kô͘-kô͘。看著hiah-ê 無jōa-gâu ê資優班ê學生teh領獎，心內有淡薄仔鬱卒、怨妒。 |
|
Bóe--á khì tha̍k chho͘-tiong chiah chai, hit-khoán ê chêng-hêng kiò-chò "複利", ài-ēng "等比數列" ê sò͘-ha̍k kái-koat. Koh ū thiaⁿ-kóng tōa sò͘-ha̍k-ka Go͘-suh (Gauss) sè-hàn sî ū 1-pái i ê lāu-su khòaⁿ in hit-pan m̄-sī khoán, hoat in tùi 1+2+3........ it-ti̍t ka-kàu 1,000, koh kā in kóng bô sǹg-liáu bē-sái hioh-o̍h. Chiah kā tê-bo̍k kóng-liáu bô kàu 5-hun-cheng, Go͘-suh tio̍h kōaⁿ chheh-pau beh tńg--khì. Lāu-su kiaⁿ 1-tiô, siūⁿ-kóng chit-ê gín-á m̄-siū-kà, beh kā i tia̍p. Go͘-suh kóng góa sǹg--chhut--lâi..ah, lí siáⁿ-sū beh phah..góa? Lāu-su 1-ē-khòaⁿ, i ê tap-àn oân-choân chèng-khak, koh mn̄g i án-chóaⁿ chò. Go͘-suh kóng, “Góa kā 1,2,3,..... pâi kàu 1,000, koh kā tò-péng pâi, tùi 1000, 999, 998,..... pâi kàu 1. Tē-1 pâi ê tē-1 ê sò͘-jī, 1 kap tē-2 pâi ê tē 1 ê sò͘-jī 1,000 ka-ka--khí--lâi, án-ne sī 1,001. Nā kā tē-1 pâi ê tē-2 ê sò͘-jī, 2 kap tē-2 pâi ê tē-2 ê sò͘-jī 999 ka-ka--khí--lâi, án-ne iā-sī 1,001. Ē-bīn chiàu án-ne ê ka-hoat tē-3 ke tē-3, tē-4 ke tē 4,........kàu tē-1,000 ke tē-1000, lóng-sī 1,001. Chit-2 lia̍t nā choân-pō͘ ke-ke--khí--lâi, ū 1,000 ê 1,001, 1,000x1,001=1,001,000. In-ūi ū 2 lia̍t só͘-í ài tû 2, 1,001,000/2=500,500. Thiaⁿ kàu chia, lāu-su bīn gāng-gāng, chhùi khui-khui, kóng bē chhut ōe, Ko͘-suh tio̍h hoaⁿ-hoaⁿ hí-hí tńg--khì.
|
尾--仔去讀初中才知，hit款ê情形叫做「複利」，ài用「等比數列」ê數學解決。Koh有聽講大數學家Ko͘-suh（Gauss）細漢時有1擺伊ê老師看in hit班m̄是款，罰in tùi 1+2+3........ 一直加到1,000，koh kā in講無算了bē-sái歇學。Chiah kā題目講了無到5分鐘，Ko͘-suh 著 kōaⁿ冊包beh轉--去。老師驚1-tiô,想講這個囡仔m̄受教，beh kā伊tia̍p。Ko͘-suh講我算--出--來--ah，你啥事beh扑--我？老師1下看，伊ê答案完全正確，koh問伊án-chóaⁿ做。Ko͘-suh講：「我kā 1,2,3,.....排到1,000，koh kā倒péng排，tùi 1000、999、998、.....排到1。第1排ê第1個數字1 kap第2排ê第1個數字1,000加加--起--來，án-ne是1,001。若kā第1排ê第2個數字2 kap第2排ê第2個數字999加加--起--來，án-ne也是1,001。 下面照án-ne ê加法第3加第3、第4加第4，........到第1,000加第1,000，攏是1,001。這2列若全部加加--起--來，有1,000個1,001，1,000×1,001=1,001,000。因為有2列所以ài除2，1,001,000÷2=500,500。」 聽到chia,老師面gāng-gāng、嘴開開，講bē出話，Ko͘-suh 著歡歡喜喜轉--去。 |
|
Sui-bóng goán hit-pan bô tī 6-nî ê sî, o̍h-tio̍h (eng-kai kóng bô pōe--tio̍h chiah tio̍h) ho̍k-lī ê kong-sek, m̄-koh Lāu-su hō͘..goán..ê sī ióng-béng-béng ê khùi-la̍t kap oa̍h-thiàu-thiàu ê sim-lêng. Chiah-ê hō͘ goán ū chiok-gia̍h ê châi-tiāu lâi tō͘-kòe í-āu ê jîn-seng. Bóe--a, tāi-ke koh tú-bīn, kóng-khí Lāu-su hit-sî ê kà-sī, lóng chin kám-un.
|
雖罔阮hit班無tī 6年ê時，學著（應該講無背--著才著）福利ê公式，m̄-koh老師hō͘--阮--ê是勇猛猛ê氣力kap活跳跳ê心靈。 Chiah-ê hō͘阮有足額ê 才調來度過以後ê人生。尾--仔，大家koh tú面，講起老師hit時ê教示，攏真感恩。 |
|
(Tâi-oân-jī Cha̍p-chì Tē 13 kî, 2002 nî 5 ge̍h)
|
(台灣字雜誌第13期，2002年5月) |
