Tâi-oân cha̍p mn̄g
|
台灣十問 |
|---|---|
| Gân Sìn-seng | 顏信星 |
|
Tâi-oân-lâng siáⁿ-mi̍h sî-chūn ōe siūⁿ beh gia̍h thâu lâi khòaⁿ thiⁿ, Tâi-oân-lâng siáⁿ-mi̍h sî-chūn ōe siūⁿ beh chhun chhiú lâi bong chit tè thó͘-tē, Tâi-oân-lâng hoaⁿ-hí ê sî lóng teh chhiùⁿ siáⁿ-mi̍h khoán ê koa, Tâi-oân-lâng iu-siong ê sî lóng teh khàu siáⁿ-mi̍h khoán ê tiāu, Tâi-oân-lâng ū chîⁿ ê sî lóng khai tùi tó-ūi khì, |
台灣人啥mi̍h時陣會想beh gia̍h頭來看天， 台灣人啥mi̍h時陣會想beh伸手來摸這塊土地， 台灣人歡喜ê時攏teh唱啥mi̍h款ê歌， 台灣人憂傷ê時攏teh哭啥mi̍h款ê調， 台灣人有錢ê時攏khai tùi tó位去， |
|
Tâi-oân-lâng bô chîⁿ ê sî lóng teh pìⁿ siáⁿ-mi̍h lián, Tâi-oân-lâng ji̍t--sî bô-êng-chhi̍h-chhi̍h ūi-tio̍h siáⁿ-hòe teh cháu-chông, Tâi-oân-lâng mî--sî tó tī chhn̂g-ni̍h lóng teh chò siáⁿ khoán bîn-bāng, Tâi-oân-lâng siⁿ chêng siōng ài chek-chū-ê sī siáⁿ-mi̍h, Tâi-oân-lâng sí āu lâu siáⁿ hòe hō͘ i ê kiáⁿ-sun. |
台灣人無錢ê時攏teh變啥mi̍h lián, 台灣人日--時無閒chhi̍h-chhi̍h為著啥hòe teh走chông, 台灣人暝--時倒tī床--ni̍h攏teh做啥款眠夢， 台灣人生前上愛積聚--ê是啥mi̍h， 台灣人死後流啥hòe hō͘伊ê子孫。 |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
