Si̍p-jī-lō͘ kháu ê gio̍k-lân hoe
|
十字路口ê玉蘭花 |
|---|---|
| Gân Sìn-seng | 顏信星 |
|
Gio̍k-lân hoe! gio̍k-lân hoe! saⁿ-lúi cha̍p-kho͘ sio̍k-sio̍k bē, Kòe lō͘ ê lâng-kheh! bāng lí saⁿ thê-hê, Ū iân lâi sio-tú, ná m̄ chhiáⁿ goán ji̍p khì chē, Gio̍k-lân-hoe! gio̍k-lân-hoe! saⁿ-lúi cha̍p-kho͘ sio̍k-sio̍k bē. |
玉蘭花！玉蘭花！三蕊十箍俗俗賣， 過路ê人客！望你相提攜， 有緣來相tú,那m̄請阮入去坐， 玉蘭花！玉蘭花！三蕊十箍俗俗賣。 |
|
M̄-sī goán bô kè, sī goán hó chò-hóe. Chiah tī si̍p-jī-lō͘ kháu kap lí lâi siong-hōe. Sè-hong ji̍t-ji̍t hā, pêng-iú oh kau-pôe, Siā-hōe ji̍t-ji̍t chhian, jîn-chêng iū khoài se, Put-jû lâu goán chheng-phang, pôe lí tang-sai-lâm-pak, Hûn-iû sì-kòe se̍h. |
M̄是阮無價，是阮好做伙。 才tī十字路口kap你來相會。 世風日日下，朋友oh交陪， 社會日日遷，人情又快疏， 不如留阮清芳，陪你東西南北， 雲遊四界se̍h。 |
|
Gio̍k-lân hoe! gio̍k-lân hoe! saⁿ-lúi cha̍p-kho͘ sio̍k-sio̍k bē. M̄-sī goán bô kè, sī goán hó chò-hóe. Chiah tī si̍p-jī-lō͘ kháu kap lí lâi siong-hōe. |
玉蘭花！玉蘭花！三蕊十箍俗俗賣。 M̄是阮無價，是阮好做伙。 才tī十字路口kap你來相會。 |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
