Sim-hiân_5
|
心弦 (5) |
| Gân Sìn-seng |
顏信星 |
|
Ha-má-seng kàu Kî-āu ê hóe-chûn-á, bat chài kòe góa ná n̂g-kim chi̍t-poaⁿ ê liân-siàu, chheng-chhun, saⁿ-cha̍p gōa tang chêng, góa kap gín-á phōaⁿ, tiāⁿ-tiāⁿ tī lé-pài-ji̍t ê ē-po͘, chē chûn kòe Kî-āu kòng-kiû, khòaⁿ ji̍t-lo̍h, kìⁿ-nā chiūⁿ chûn tō khai-sí chhiùⁿ-koa, bîn-iâu, koa-iâu, sèng-koa, bû-só͘-put-chí chhiùⁿ, àn chiūⁿ chûn chhiùⁿ kàu lo̍h chûn, iân-lō͘ chhiâ chiò ê se̍k-iông, hái-chiáu ê kiò siaⁿ, ūi goán phó͘ chhut it-seng lân-bōng ê hô-im.
|
哈瑪星到旗後ê火船仔，bat載過我若黃金一般ê年少青春。三十外冬前，我kap囡仔伴，定定tī禮拜日ê e晡，坐船過旗後槓球、看日落。見若上船tō開始唱歌，民謠、歌謠、聖歌，無所不止唱；àn上船唱到落船，沿路斜照ê夕陽，海鳥ê叫聲，為阮譜出一生難忘ê和音。 |
|
Góa chin ài chē tiàm hóe-chûn-á ê gōa-iân hn̄g-hn̄g khòaⁿ káng-chhùi, chi̍t-bīn khòaⁿ chi̍t-bīn chò bāng, phah hōaⁿ ê lōng-hoa, siám-si̍h ê chúi-iáⁿ, siông-siông chiong góa ê sim-sū tòa kàu chin hn̄g chin hn̄g ê sè-kài, kiâm-sip-bī ê hái hong chhin-chhiūⁿ lēng gōa chi̍t-chióng ê bó-gú, ta̍uh-ta̍uh teh tùi góa kóng-ōe, ōe-kì-tit ū chi̍t-tang ê nî-bóe-ji̍t, góa kap chi̍t-ê tng-sî iáu teh tha̍k tāi-ha̍k ê pêng-iú, sio-chio tī hit-àm khì chē hóe-chûn-á, tùi ē-àm peh-tiám chē kàu cha̍p-it tiám, chiah ta̍h tio̍h chhiú tiong bô poe sim iā chùi ê kha-pō͘, tò-tńg-khì chhù-ni̍h khùn.
|
我真愛坐tiàm火船仔ê外緣遠遠看港嘴，一面看一面做夢。扑岸ê浪花，閃si̍h ê水影，常常將我ê心事帶到真遠真遠ê世界。鹹濕味ê海風親像另外一種ê母語，ta̍uh-ta̍uh teh 對我講話。會記得有一冬ê年尾日，我kap一個當時iáu teh讀大學ê朋友，相招tī hit暗去坐火船仔。Tùi e暗八點坐到十一點，才踏著手中無杯心也醉ê腳步，倒轉去厝--ni̍h睏。 |
|
Bô lâng ū khùi-la̍t thang chiong kong-im se̍h tò-tńg, chóng-sī tng sìⁿ-miā ê hûn-jiah phah-tāng sim-hiân ê sî, góa siūⁿ, kòe-khì, hiān-chāi kap bī-lâi sī thiàu-iāu tī kâng chi̍t-ê ga̍k-chiong téng-koân ê im-hû.
|
無人有氣力thang將光陰se̍h倒轉。總--是當生命ê痕跡扑動心弦ê時，我想，過去、現在kap未來是跳躍tī共一個樂章頂懸ê音符。 |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
