Sim-hiân_4
|
心弦 (4) |
| Gân Sìn-seng |
顏信星 |
|
It-kiú-lio̍k-jī nî káu-goe̍h jī-cha̍p-peh ji̍t, a-pa ê chûn tī se̍h kòe Hêng-chhun chìn ji̍p Tâi-oân hái-kiap ê sî lâi sit-chong, saⁿ-cha̍p kúi nî lâi, liân lâng kap chûn lóng bô pòaⁿ-ti̍h siau-sit, it-kiú-lio̍k-lio̍k nî gō͘-goe̍h tiong-sûn, a-hiaⁿ ê chûn Thian-pó-lûn tī chi̍t-ê hong-thai-thiⁿ kóaⁿ bōe hù thang ji̍p káng, phiau àn Chhâ-soaⁿ ê soaⁿ kha lâi lê-ta, hit chūn góa tú chhut gōa tha̍k-chheh, thiaⁿ tio̍h siau-sit kóaⁿ khì Chhâ-soaⁿ khiā tiàm hái kîⁿ khòaⁿ a-hiaⁿ ê chûn tī hong-ú tiong iô-iô-pái-pái kap miā-ūn teh phok-tàu, (chûn í-keng kiông beh tn̄g chò N̄g-chat, î-it liân chiap ê sī kà-sú-sek, só͘ ū ê chûn-goân lóng kheh tī hia), sim tiong ū kóng bōe-chhut ê kan-khó͘, chûn kap hái hōaⁿ kan-taⁿ N̄g-pah gōa kong-chhioh nā-tiāⁿ, khiok bû-lêng-ûi-le̍k, che chiū sī Tâi-oân thó-hái lâng ê miā-ūn.
|
1962年9月28日，阿爸ê船tī se̍h過恆春進入台灣海峽ê時來失蹤。三十幾年來，連人kap船攏無半滴消息。1966年5月中旬，阿兄ê船「天寶輪」tī一個風颱天趕bōe赴thang入港，漂àn柴山ê山腳來犁礁。Hit陣我tú出外讀冊，聽著消息趕去柴山企tiàm海墘看阿兄ê船tī風雨中搖搖擺擺kap命運teh搏鬥，（船已經強beh斷做兩截，唯一連接--ê是駕駛室，所有ê船員攏kheh tī hia)，心中有講bōe出ê艱苦，船kap海岸kan-taⁿ兩百外公尺nā-tiāⁿ，卻無能為力。Che就是台灣討海人ê命運。 |
|
A-hiaⁿ khah hēng-ūn, gô kòe chi̍t ê kiò thiⁿ thiⁿ-bōe-ìn, kiò tē tē put-lêng ê o͘-àm-mî, keh-ji̍t kèng-jiân hong-pêng-lōng-chēng, khioh tio̍h sìⁿ-miā tńg-lâi ê a-hiaⁿ, siang-kha ta̍h chiūⁿ bé-thâu, sin-khu kan-taⁿ chhun chi̍t-niá lāi-saⁿ-khò͘, tī sit-khì a-pa liáu ê sì-tang āu koh tú-tio̍h chit-khoán tāi-chì, a-bú ê sim-chêng thó͘ siūⁿ mā chai, kóng-khí-lâi hó chhiò, a-hiaⁿ ê pôe-siông-hùi kèng-jiân chí-ū gō͘-chheng gō͘-pah kho͘ nā-tiāⁿ, a-hiaⁿ ēng gō͘-pah kho͘ khì bé chi̍t-ki sió-thê-khîm sàng góa, hō͘ góa chia̍h-lāu-chhut-phia̍h, the̍h tńg-khì ha̍k-hāu ê sok-sià ngē-sí kù, hit ki sió-thê-khîm tòa hō͘ góa ê tông-o̍h chōe-chōe ê khùn-jiáu, khiok phah khui góa im-ga̍k ê sim-mn̂g, nā sī góa kin-á-ji̍t tī im-ga̍k ê téng-koân ū tām-po̍h-á ōe phīⁿ tit ê sêng-chiū, kóng i sī a-hiaⁿ ēng i ê sìⁿ-miā ōaⁿ-lâi-ê, mā bô kòe hūn.
|
阿兄較幸運，熬過一個叫天天bōe應，叫地地不靈ê烏暗暝。隔日竟然風平浪靜，拾著生命轉來ê阿兄，雙腳踏上碼頭，身軀kan-taⁿ chhun一領內衫褲。Tī失去阿爸了ê四冬後koh tú著這款代誌，阿母ê心情土想mā知。講--起來好笑，阿兄ê賠償費竟然只有五千五百箍nā-tiāⁿ。阿兄用五百箍去買一支小提琴送我，hō͘我食老出癖，提轉去學校ê宿舍硬死鋸。Hit支小提琴帶hō͘我ê同學濟濟ê困擾，卻扑開我音樂ê心門。若是我今仔日tī音樂ê頂懸有淡薄仔會鼻--得ê成就，講伊是阿兄用伊ê生命換來--ê,mā無過份。 |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
