Sim-hiân_2
|
心弦 (2) |
| Gân Sìn-seng |
顏信星 |
|
Àn chhut-sì kàu ji̍p Tâi-lâm Sîn-ha̍k-īⁿ tha̍k-chheh, góa lóng tòa tī Ko-hiông ê Ha-má-seng, iā chiū sī Siū-san soaⁿ kha óa káng-chhùi, tē-it hō bé-thâu ê só͘-chāi tē. Sè-hàn ê sî chhù-piⁿ-keh-piah, chhin-chiâⁿ-gō͘-cha̍p ū chi̍t-pòaⁿ khah ke lóng sī thó-hái lâng, sui-jiân tī hit ê kan-khó͘ thó-thàn ê nî-tāi, seng-oa̍h bô chin hó kòe, chóng-sī goán iû-goân ū chin chōe ta̍t-tit siàu-liām ê gín-á-nî.
|
Àn出世到入台南神學院讀冊，我攏tòa tī高雄ê哈瑪星，也就是壽山山腳倚港嘴，第一號碼頭ê所在地。細漢ê時厝邊隔壁，親情五十有一半較加攏是討海人，雖然tī hit個艱苦討趁ê年代，生活無真好過，總--是阮猶原有真濟值得數念ê囡仔年。 |
|
Chhin-chhiūⁿ ū sin chûn lo̍h chúi ê sî, sio chio khì khioh môa-chî, á-sī tòe sī-tōa-lâng khì Se-á-oân ê hái-kîⁿ khà chhiⁿ-ô-á, hiān khà hiān chia̍h, á-sī ē-àm khut tī biō-kháu thiaⁿ hûn-iû-sù-hái ê Ông-lo̍k-á-sian kóng kò͘-sū, phah-kûn bē ko-io̍h, á-sī ngiâ lāu-jia̍t ê sî giâ í-á chiàm ūi, chiú tiàm hì-pêⁿ kha chiú kui mî, m̄ bián khai hùi pòaⁿ-sián-chîⁿ, goán ê gín-á-nî chiàu siông kòe kah ū sek, ū chu-bī.
|
親像有新船落水ê時，相招去拾麻薯；抑是tòe序大人去西仔灣ê海墘khà鮮蚵仔，現khà現食；抑是e暗屈tī廟口聽雲遊四海ê王祿仔仙講故事，扑拳賣膏藥；抑是迎鬧熱ê時giâ椅仔佔位，守tiàm戲棚腳守歸暝，m̄免khai費半sián錢，阮ê囡仔年照常過kah有色、有滋味。 |
|
Chòe-kīn jī-cha̍p kúi nî lâi, góa bat khì kòe chin chōe só͘-chāi, Hiong-káng, Thài-kok, Má-lâi-se-a, Sin-ka-pho, Bí-kok, Ka-ná-tāi, Nô͘-ui, Tan-be̍h, Sūi-tián, Hun-lân, Tek-kok, Eng-kok, Hoat-kok, Ò-tē-lī, to-chhái-to-chu ê ī-pang bûn-hòa, m̄ sī bô phah tāng kòe góa ê sim-lêng, chóng-sī bô-lūn in jōa khip-ín góa, tō bōe chhin-chhiūⁿ góa ta̍k-pái tò-tńg-khì Ha-má-seng ê sî hit-chióng kám-kak, sui-jiân hái-kîⁿ ê chúi í-keng piàn chhàu, ke lō͘ ê phòa-siùⁿ ū ke bô kiám, sim tiong ê hit-tiâu hiân khiok án-chóaⁿ tō tòng-bōe-tiâu, ti̍t-ti̍t tiô-khí-lâi, han-chî miā tō sī han-chî miā, lī-khui thô͘, góa siūⁿ góa ōe pìⁿ chò “M̄-chiâⁿ-kiáⁿ”
|
最近二十幾年來，我bat去過真濟所在，香港、泰國、馬來西亞、新加坡、美國、加拿大、挪威、丹麥、瑞典、芬蘭、德國、英國、法國、奧地利，多彩多姿ê異邦文化，m̄是無扑動過我ê心靈，總是無論in偌吸引我，tō bōe親像我逐擺倒轉去哈瑪星ê時hit種感覺。雖然海墘ê水已經變臭，街路ê破相有加無減，心中ê hit條弦卻án-chóaⁿ tō擋bōe-tiâu,直直tiô--起來。蕃薯命tō是蕃薯命，離開塗，我想我會變做「M̄成子」！ |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
