Pôe-iúⁿ Gín-ná
|
培養囡仔 |
| Phian-chip-sek |
編輯室 |
|
Hoān gín-ná tn̄g-ni ê sî bē-tit-thang it-chīn siāng khoán . Chóng-tio̍h khòaⁿ bó-sin kap gín-ná ê seng-khu àn-cháiⁿ-iūⁿ. Siat-sú chò bó ê lâng sin-thé bô ióng-kiāⁿ, chiū eng-kai tio̍h chá tn̄g-ni khah hó; tāi-iok nā kàu peh káu goe̍h chiū thang kā i tn̄g . Nā-sī bó-sin khì- le̍k chhiong-chiok, gín-ná loán-jio̍k,tio̍h thèng-hāu khah bān,chiah thang.Hoān- nā gín-ná taⁿ-chiah hoat chhùi-khí , m̄- thang tn̄g-ni , chhùi-khí nā bān hoat ,iā m̄-thang tn̄g-ni, tāi-khài tio̍h kàu tō͘-chè chiah lâi tn̄g , in-ūi chi̍t-nî liáu-āu, bó ê ni chiām-chiām bô la̍t , bē-ē pôe-iúⁿ gín-ná. Nā beh tn̄g-ni iā m̄-thang hut- jiân-kan , tio̍h tāi-seng kà i chia̍h pa̍t- mi̍h koàn-sì, tùi chiām-chiām kàu chū- jiân . Hoān chhit-goe̍h ji̍t ê gín-ná ,múi ji̍t nn̄g-pái tio̍h ēng hó ê gû-leng hō͘ i chia̍h , kap chúi kiáu-chiâu ; liân-āu chúi thang chiām-chiām kiám khah chió; á-sī hô tām-po̍h mī-hún chú hō͘ i chia̍h, á-sī bí-môe iā thang . Nā beh tn̄g-ni tio̍h tn̄g mê-sî, kan-ta ji̍t--sî chá-àm nn̄g-pái hō͘ i chia̍h , kì-jiân chia̍h bô lōa-chē , ni-chiap iā tùi án-ni ná chió . Kiám-chhái gín-ná m̄-khéng chia̍h pa̍t-mi̍h , put-hông tán- hāu i iau chiah hō͘ i chia̍h, môe pn̄g mī-pau lóng thang, to̍k-to̍k gín-ná tī cha̍p-peh goe̍h ji̍t ê tāi-seng , tek-khak tio̍h ēng ni chò kin-pún , it-khài chhiⁿ-chho , iû-jī, chhài-se, kóe-chí , iàu-kín m̄-thang hō͘ i chia̍h . Ū chò pē-bó ê lâng, put-lūn chhìn-chhái mi̍h lóng hō͘ gín-ná chia̍h, tì-kàu ū-sî bē siau-hòa, phòa-pīⁿ sòa sí, he̍k-sī bô tn̂g hòe-siū . Ū-sî làu-sià ê chèng-thâu lóng sī tùi chit-hō chhut--lâi . In-ūi ēng tōa-lâng ê si̍t-bu̍t hō͘ gín-ná chia̍h. Ná-chhin-chhiūⁿ chiong tōa-lâng ê kang hō͘ gín-ná chò , tek-khak sī chò bô hoat , tek-khak ē siū siong . Só͘-í it-khài tê kap ka-pi lóng m̄-sī ha̍h chia̍h ni gín-ná ê lō͘-ēng . Chhin-chhiūⁿ chiú sī koh khah lī-hāi , chò pē-bó--ê kap chiàu- kò͘ gín-ná ê lâng tio̍h kín-sīn kéng-kài .
|
凡囡仔斷乳 ê時bē-tit-thang一盡共款。總著看母身佮囡仔 ê 身軀àn怎樣。設使做母 ê 人身體無勇健，就應該著早斷乳較好；大約若到8、9月就thang kā伊斷。若是母身氣力充足，囡仔軟弱，著聽候較慢，才thang。凡若囡仔今才發嘴齒，m̄-thang斷乳。嘴齒若慢發，也m̄-thang斷乳，大概著到度晬才來斷。因為一年了後，母ê 乳漸漸無力，bē 會培養囡仔。若beh 斷乳也 m̄-thang忽然間，著代先教伊食別物慣勢，tùi 漸漸到自然。凡7月日 ê 囡仔，每日兩擺著用好ê 牛乳 hō͘ 伊食，佮水攪齊，然後水thang漸漸減較少；抑是和淡薄麵粉煮hō͘伊食，抑是米糜也thang。若beh 斷乳著斷暝時，kan-ta 日--時早暗兩擺hō͘伊食，既然食無偌濟，乳汁也tùi án-ni 那少。Kiám-chhái 囡仔m̄肯食別物，不妨等候伊枵才hō͘伊食，糜飯、麵包攏thang，獨獨囡仔tī 18月日 ê 代先，的確著用乳做根本，一概chhiⁿ臊、油膩、菜蔬、果子，要緊 m̄-thang hō͘伊食。有做父母 ê 人，不論chhìn-chhái物攏hō͘ 囡仔食，致到有時bē 消化，破病續死，或是無長歲壽。有時漏瀉 ê症頭攏是tùi 這號--出來。因為用大人 ê 食物 hō͘ 囡仔食，若親像將大人ê 工hō͘ 囡仔做，的確是做無法，的確會受傷。所以一概茶佮咖啡攏 m̄是合食乳囡仔 ê 路用。親像酒是koh 較厲害，做父母--ê佮照顧囡仔 ê 人著謹慎警戒。 |
|
(Tâi-oân Hú-siâⁿ Kàu-hōe-pò tē 113 koàn, 1894 nî 8 ge̍h)
|
(台灣府城教會報 第113卷，1894年8月) |
