Ha-má-seng
|
哈瑪星 |
|---|---|
| Gân Sìn-seng | 顏信星 |
|
Cha-àm tī bāng tiong iū-koh khòaⁿ-kìⁿ lí, Chhin-chhiūⁿ chiú-kiⁿ-ê; Khut tī Ko-hiông ê káng piⁿ, Pôe-phōaⁿ hn̄g-hn̄g siám-si̍h ê teng-thah; Kò͘-siú o͘-àm-mî, Jit5-sî, hî-hâng ê hán-hoah í-keng thêng-chí, Ji̍p-iā, biō-kháu ê soan-hoa mā sûi hong phiau lī, Bāng tiong ê lí, chēng chēng teh tán-thāi; Tán-thāi o͘-àm-mî kòe khì, Thang ngiâ-chi̍h lēng-gōa chi̍t-ê bô-êng ê chá-khí. |
昨暗tī夢中又koh看見你， 親像守更--ê; 屈tī高雄ê港邊， 陪伴遠遠閃si̍h ê燈塔； 顧守烏暗暝， 日--時，漁行ê喊喝已經停止， 入夜，廟口ê喧嘩mā隨風飄離， 夢中ê你，靜靜teh等待； 等待烏暗暝過去， Thang迎接另外一個無閒ê早起。 |
|
Hái-éng khin-khin phah hái hōaⁿ, Put-sî kek chhut bê lâng ê lōng-hoa, Goân-sí ê chiat-chàu; Chhin-chhiūⁿ a-bú chhiú tiong ê iô-nâ, iô-à-iô, iô-à-iô, Iô cháu siâⁿ-chhī hoân-cha̍p ê sio̍k-khì, Iô chhut ná bi̍t chi̍t poaⁿ ê kam-tiⁿ, Iô goán tò-tńg-khì; Tò-tńg-khì it-seng lân-bōng ê gín-á-nî. |
海湧輕輕扑海岸， 不時激出迷人ê浪花， 原始ê節奏； 親像阿母手中ê搖籃， 搖 à 搖，搖 à 搖， 搖走城市繁雜ê俗氣， 搖出若蜜一般ê甘甜， 搖阮倒轉去； 倒轉去一生難忘ê囡仔年。 |
|
Tiò-hî, hōaⁿ-piah, biō-kháu, ji̍p-iā, Siū-san soaⁿ téng bû iu chū-chāi ê chhiò siaⁿ; Hî-hâng, chûn-chiah, Kî-āu, soa-phiâⁿ, Tō͘-lûn lāi-bīn liân-siàu chheng-chhun ê hêng-iáⁿ; Chi̍t pō͘ chi̍t kha-ìn, Chi̍t khut chi̍t-tiâu kin, Tī tui-hong-tio̍k-lōng ê ji̍t-chí, Ēng chhái-hông ōe chhut-lâi ê chi̍t phiàn thiⁿ, Kiò goán beh cháiⁿ-iūⁿ pàng-bōe-kì! |
釣魚、岸壁、廟口、入夜， 壽山山頂無憂自在ê笑聲； 漁行、船隻、旗後、沙坪， 渡輪內面年少青春ê形影； 一步一腳印， 一窟一條根， Tī追風逐浪ê日子， 用彩虹畫出來ê一片天， 叫阮beh怎樣放bōe記！ |
|
Jōa-chōe ê bîn-bāng khîⁿ lí lâi chhut-sì, Jōa-chōe ê kò͘-sū tùi lí lâi khai-sí, Sìⁿ-miā nā sī chi̍t-ê îⁿ, Chá-bān góa ōe koh tó-tńg-khì, Têng-sin lâi phīⁿ lo̍h-kin ê thô͘, bô thang thè-ōaⁿ ê phang-bī. |
偌濟ê眠夢khîⁿ你來出世， 偌濟ê故事tùi你來開始， 生命若是一個圓， 早慢我會koh倒轉去， 重新來鼻落根ê塗，無thang替換ê芳味。 |
|
Chit hūn tùi sìn lâi ê koat-chì, Hō͘ góa sim-kam-chêng-goān lī-khui lí, Thoa tio̍h liû-lông ê kha-pō͘, Tang-sai-lâm-pak sì-kòe khì, Siáⁿ chai siang-kha ta̍h chhut mn̂g; |
這份tùi信來ê決志， Hō͘我心甘情願離開你， 拖著流浪ê腳步， 東西南北四界去， 啥知雙腳踏出門； |
|
Kèng-jiân thiⁿ-piⁿ-hái-kak bô-liáu-sî, Saⁿ-cha̍p gōa ê phīⁿ bô kiâm-sip-bī ê “Jī-káu-mî, ” Múi hông chhiu hong khí, Phiàn-phiàn lo̍h-hio̍h thiam siuⁿ-si, Nî-hòe jú ke-thiⁿ, Siuⁿ-si jú kau-tîⁿ, Ah! Ha-má-seng! |
竟然天邊海角無了時， 三十外個鼻無鹹濕味ê「二九暝」， 每逢秋風起， 片片落葉添相思， 年歲愈加添， 相思愈交纏， Ah！哈瑪星！ |
|
Cha̍p-káu hòe lī-khui lí, Siáⁿ-sî chiah ōe thang koh tò-tńg-khì! Siáⁿ-sî chiah ōe thang koh tò-tńg-khì! |
十九歲離開你， 啥時chiah會thang koh倒轉去！ 啥時chiah會thang koh倒轉去！ |
|
(Gân Sìn-seng Tâi-gí Bûn-ha̍k soán, 2002 nî Chin-pêng Khì-gia̍p Chhut-pán)
|
（顏信星台語文學選，2002年真平企業出版） |
