Seⁿ-kiáⁿ sī sai-á_chhī-kiáⁿ chiah sī sai-hū
|
生子是師仔，飼子才是師父 |
| Chng Hūi-phêng |
莊惠平 |
|
Chit kúi nî sè-kài ê keng-chè in-ūi China khò lâng chē, thó͘-tē tōa ê sêng-pún iu-sè, chiām-chiām chiâⁿ-chò sè-kài ê kang-tiûⁿ, keng-chè khò ka-kang iah-sī tāi-kang chhut-kháu ê kok-ka, lóng siū-tio̍h chin tōa ê éng-hióng. Sè-kài ê keng-chè mā in-ūi mi̍h-kiāⁿ ê seng-sán-liōng chhiau-kòe su-iàu-liōng siuⁿ kòe-thâu chē, chiah ti̍t-ti̍t soe-bî. Tâi-oân mā in-ūi án-ni-siⁿ, keng-chè ti̍t-ti̍t chhu--lo̍h-khì, iû-kî sī khò thé-la̍t teh thó-thàn ê chò-kang-á-lâng koh-khah chhám, kang-tiûⁿ ti̍t-ti̍t koaiⁿ, bô thâu-lō͘ ê lâng ti̍t-ti̍t chē; choh-sit-lâng mā in-ūi lông-sán-phín ùi China hia tōa-liōng chìn-kháu kap cháu-sòe, kè-siàu it-ti̍t lo̍h, tiāⁿ-tiāⁿ liân pún-chîⁿ to siu bē tńg--lâi, koh-khah bián kóng in ê kang-chîⁿ.
|
這幾年世界ê經濟因為中國靠人濟，土地大ê成本優勢，漸漸成做世界ê工場，經濟靠加工抑是代工出口ê國家，攏受著真大ê影響。世界ê經濟mā因為物件ê生產量超過需要量siuⁿ過頭濟，才直直衰微。台灣mā因為án-ni生，經濟直直趨--落-去，尤其是靠體力teh討趁ê做工仔人koh較慘，工場直直關，無頭路ê人直直濟；作穡人mā因為農產品ùi中國hia大量進口kap走稅，價數一直落，定定連本錢都收bē轉--來，koh較免講in ê工錢。 |
|
Tī sî-ki chiah-nī bái ê sî-chūn, “BOⁿG-pò” ê siā-bū úi-oân kap koan-chîⁿ ê lâng soah tian-tó jú lâi jú chē, goân-in tī toh? Sī in ê kian-chhî chiah ū khó-lêng oa̍h kàu kin-á-ji̍t. Ū bo̍k-phiau kap jia̍t-chêng sī bô-kàu--ê, siōng tiōng-iàu--ê sī kian-chhî ê thài-tō͘ chiah ū khó-lêng sêng-kong.Tâi-oân ê seng-lí-lâng kóng, nā bô khì China chò seng-lí, bô kap in “sam-thong”, Tâi-oân ê keng-chè ē pang--khì. M̄-koh lán lâi khòaⁿ Hân-kok in ê seng-lí-lâng, in m̄ siong-sìn kóng “bô khì China tō ē hip--sí”, kam-goān hip-sí tī Hân-kok mā bô-ài khì China. Chit-má lâng Hân-kok ê keng-chè chhia-iāⁿ kah, in ê pâng-tē-sán ti̍t-ti̍t khí, lán soah kap lâng tian-tó-péng. Che mā sī kian-chhî só͘ tián-hiān ê le̍k-liōng.
|
Tī時機chiah-nī bái ê時陣，「罔報」ê 社務委員kap捐錢ê人煞顛倒愈來愈濟，原因tī toh？是in ê堅持才有可能活到今仔日。有目標kap熱情是無夠--ê,上重要--ê是堅持ê態度才有可能成功。台灣ê生理人講：若無去中國做生理，無kap in「三通」，台灣ê經濟會崩--去。M̄-koh咱來看韓國in ê生理人，in m̄相信講「無去中國tō會hip--死」，甘願hip死tī韓國mā無愛去中國。Chit-má人韓國ê經濟chhia-iāⁿ kah，in ê房地產直直起，咱煞kap人顛倒反。Che mā是堅持所展現ê力量。 |
|
Lán beh án-chóaⁿ o̍h “BOⁿG-pò” kap Hân-kok ê cheng-sîn--leh? M̄ sī chhùi kóng-kóng--leh niâ, ài tī seng-oa̍h--ni̍h lo̍h-si̍t, chhiūⁿ kóng: kam-goān ko͘-khut mā bô-ài chhōa China bó͘, kè China ang, seⁿ China kiáⁿ, bô-ài kau China ê pêng-iú, bô-ài bé China ê mi̍h-kiāⁿ, bô-ài khòaⁿ China ê tiān-sī, tiān-iáⁿ kap chheh, bô-ài thiaⁿ China ê koa kap Radio, bô-ài kóng China ōe, jīm-hô tùi China iú-lī ê tāi-chì lóng m̄-thang chò.
|
咱beh án-chóaⁿ 學「罔報」kap韓國ê精神--leh？M̄是嘴講講--leh niâ,ài tī生活--ni̍h落實，像講：甘願孤窟mā無ài娶中國某、嫁中國翁、生中國子、無ài交中國ê朋友、無ài買中國ê物件、無ài看中國ê電視、電影kap冊、無ài聽中國ê歌kap收音機、無ài講中國話，任何tùi中國有利ê代誌攏m̄-thang做。 |
|
Thâu-khí-seng chhòng-pān “BOⁿG-pò” ê sî, góa mā sī tàu seⁿ ū tio̍h--ê, m̄-koh kàu chín. tû-liáu chò siā-úi kian-chhî bô-piàn í-gōa, tâu-kó ê liōng bē chhiau-kòe 2000 jī, kóng--khí-lâi si̍t-chāi chiâⁿ kiàn-siàu, m̄-chiah kóng: “Seⁿ-kiáⁿ sī sai-á, chhī-kiáⁿ chiah sī sai-hū.”
|
頭起先創辦「罔報」ê時，我mā是鬥生有著--ê,m̄-koh到chín。除了做社委堅持無變以外，投稿ê量bē超過2000字，講--起-來實在成見笑，m̄-chiah講：「生子是師仔，飼子才是師父。」 |
|
(Tâi-bûn Bóng-pò tē 75 kî, 2002 nî 12 ge̍h)
|
(台文罔報第75期，2002年12月) |
