Ài-hô
|
愛河 |
|---|---|
| Chhòa Khun-siú | 蔡坤守 |
|
Si Tiat-sam goân chok
|
施哲三原作 |
|
Hô-piⁿ ê lâng teh sàn-pō͘, kám-kak kap éng-pái bô kāng Beh tâm-chêng kiam soat-ài lóng ē lâi |
河邊ê人teh散步，感覺kap往擺無共 beh談情兼說愛攏會來 |
|
Hô-piⁿ ê lâng ū A-pa ū A-bú chhōa gín-á chò-hóe lâi Góa khan lí, lí khan góa, tāi-ke chò-hóe kiâⁿ-lō͘ chin sóng-khoài |
河邊ê人有阿爸有阿母chhōa囡仔做伙來 我牽你，你牽我，大家做伙行路真爽快 |
|
Hô-piⁿ ê lâng ū hok-khì chiah ē-lâi Hî-á 1-kûn 1-kûn iā tùi hái-té lâi Chúi-lāi thiàu, hōaⁿ-piⁿ thiàu, tāi-ke oa̍h thiàu-thiàu |
河邊ê人有福氣才會來 魚仔一群一群也tùi海底來 水內跳，岸邊跳，大家活跳跳 |
|
Hô-piⁿ ê lâng bô hun tóng-phài Góa m̄-chai lí óa tó 1-phài Tāi-ke tī chia chí-ū saⁿ-thiàⁿ Góa thiàⁿ lí, lí thiàⁿ góa, tāi-ke chò-hóe lâi |
河邊ê人無分黨派 我m̄知你倚tó一派 大家tī chia只有相疼 我疼你，你疼我，大家做伙來 |
|
Hô-piⁿ ê lâng, ji̍t-sî phah-piàⁿ, àm-sî lâi kiâⁿ Sin-thé chiah ē ióng-kiāⁿ Ū súi ê koa thang thiaⁿ, iā ū súi ê tô͘ thang khòaⁿ |
河邊ê人，日時扑拼，暗時來行 身體才會勇健 有súi ê歌thang聽，也有súi ê圖thang看 |
|
Hô-piⁿ ê lâng kap chúi-kng goe̍h-niû chò-phōaⁿ Kiô-thâu kiô-bóe hoat kng koh ū chúi-iáⁿ Thàn ē kiâⁿ, tāi-ke lâi kiâⁿ Sàn-chhiah lâng, hó-gia̍h lâng tāi-ke kiâⁿ-tio̍h bô su-iâⁿ |
河邊ê人kap水光月娘做伴 橋頭橋尾發光koh有水影 趁會行，大家來行 散赤人，好額人大家行著無輸嬴 |
|
Hô-piⁿ ê lâng chhiūⁿ chí-moāi, chhiūⁿ hiaⁿ-tī Kap chúi-lāi ê hî 1-bóe 1-bóe ti̍t-ti̍t kiâⁿ Chûn ē iô, chúi ē thiàu Hî-á gín-á saⁿ-kha-hoe-thiàu. |
河邊ê 人像姊妹，像兄弟 kap水內ê 魚一尾一尾直直行 船會搖，水會跳 魚仔囡仔相kha花跳 |
|
Hô-piⁿ ê lâng tī Sài-ná, tī Ài-hô Sī Pa-lê ê lâng sī Táⁿ-káu ê lâng. Chí-ū saⁿ-thiàⁿ chiah sī hó. Chûn-iô hî-thiàu hái-chiáu poe bē liáu. |
河邊ê人tī賽納，tī愛河 是巴黎ê人是打狗ê人 只有相疼才是好 船搖魚跳海鳥飛bē了 |
|
(Tâi-oân-jī cha̍p-chì tē 14 kî, 2002 nî 7 ge̍h)
|
(台灣字雜誌第14期，2002年7月) |
