Chhiah-kha--ê jiok lo̍k chhēng-ê--ê chia̍h bah
|
赤腳--ê jiok鹿穿鞋--ê食肉 |
| Tân Ui-chì |
陳威志 |
|
Tī leh kó͘-chá kó͘-chá ê sî-chūn, lán chò jōa chē chiah ū thang hó chia̍h jōa chē iōng jōa chē, seng-oa̍h chin kan-khó͘ mā chin pháiⁿ kòe, it-ti̍t kàu 18 sè-kí, jîn-lūi hoat-bêng ki-hâi thè-tāi jîn-kang, ín-tōng kang-gia̍p kek-bēng, jîn-lūi ê seng-oa̍h chiah hiòng chiân 1 tōa pō͘.
|
Tī leh古早古早ê時chūn, lán做jōa chē chiah有thang好食jōa chē用jōa chē, 生活真艱苦mā真pháiⁿ過, 一直到18世紀, 人類發明機械替代人工, 引動工業革命, 人類ê生活chiah向前1大步. |
|
Ki-chân ê lô-tōng-chiá siūⁿ kóng èng-tong ē khah hó kòe--a, éng-kòe khò jîn-kang, 1 kang kan-taⁿ ū châi-tiāu chò 5 siang ê-á, chit-má khò ki-hâi, pòaⁿ-kang tō chò beh 50 siang, án-ne èng-kai ē-tàng chò khah chió hioh khah chē, ta̍k-ê mā lóng ū ê-á thang chhēng chiah tio̍h--a, nah ē lô- tōng-chiá ê seng-oa̍h soah lú lâi lú pháiⁿ kòe?
|
基層ê勞動者想講應當會khah好過--a, éng過靠人工, 1工kan-taⁿ有才tiāu做5雙鞋á, chit-má靠機械, 半工就做beh 50雙, án-ne應該會tàng做khah少hioh khah chē, ta̍k-ê mā lóng有鞋á thang穿chiah tio̍h--a, nah會勞動者ê生活soah愈來愈pháiⁿ過? |
|
Lâng sī tiān-náu ji̍h-ji̍h--ê tō ū thang chia̍h, sin ê-á 1 siang kòe 1 siang teh ōaⁿ, ah lán sī ji̍t iā chò mî iā chò, chiah bián-kióng tō͘ 3 tǹg, koh kóng kah ōaⁿ sin ê-á, chia̍h khah bái--ê!
|
人是電腦ji̍h-ji̍h--ê就有thang食, 新鞋á 1雙過1雙teh換, ah lán是日也做暝也做chiah勉強度3 tǹg, koh講kah換新鞋á, 食khah bái--ê! |
|
Chiàu-lí kóng, chò hiah chē, chia̍h bô 7 siâⁿ mā ài ū 5 siâⁿ, chit-má mài kóng 5 siâⁿ, liān 3 siâⁿ to bô--a, ah chhun-ê 7 siâⁿ sī lóng hō͘ siáng pō͘--khì?
|
照理講, 做hiah chē, 食無7成mā ài有5成, chit-má mài講5成, 連3成都無--a, ah chhun-ê 7成是lóng hō͘ siáng pō͘--去? |
|
Tō sī ū 1-kóa lâng bô teh seng-sán, choan-bûn khò bē lán ê lô-tōng le̍k choán-chia̍h, chit tô͘ koh chiâⁿ hó thio, m̄ bián jiok lo̍k tō ū bah thang chia̍h, ah lán sī bú kah tōa-lia̍p-kōaⁿ sè-lia̍p kōaⁿ, chin-chiàⁿ sī “chhiah-kha--ê jiok lok, chhēng-ê--ê chia̍h bah”, ū kàu bô kong-pêⁿ!
|
就是有1-kóa人無teh生產, 專門靠賣lán ê勞動力賺食, 這途koh chiâⁿ好thio, m̄免jiok鹿就有肉通食, ah lán是舞kah大粒汗細粒汗, 真正是「赤腳--ê jiok鹿, 穿鞋--ê食肉」, 有夠無公平! |
|
(TGB Thong-sìn tē 21 kî, 2001 nî 6 goe̍h)
|
(TGB通訊第21期，2001年6月) |
