Kî-thāi
|
期待 |
| Tân Tek-hôa |
陳德樺 |
|
Í-keng beh 60 hòe--a, i ta̍k-kang iû-goân thàu-chá 6-tiám-pòaⁿ tō chhut-mn̂g, thang hó hù tī 7-tiám chìn-chêng kàu kong-si, àm-sî mā lóng tio̍h kòe 7-tiám liáu-āu, chiah ē-tàng hā-pan tńg chhù chia̍h-pn̄g.
|
Beh 60歲--a, i ta̍k工猶原thàu早 6點半就出門, thang好赴tī 7點chìn前到公司, 暗時mā lóng tio̍h過 7點了後, chiah會tàng下班tńg厝食飯. |
|
Tī chit-keng hòe-ūn kong-si chia̍h thâu-lō͘ beh óa 25 nî--a, ùi sái-chhia ùn-chiàng kàu chit-má seng kàu khò- tiúⁿ ê chit-bū, kang-chok sî-kan soah pí kòe-khì koh khah tn̂g, pòaⁿ-mî put-sî koh ē chiap tio̍h tiān-ōe, sūi-sî to ài chún-pī chhut-mn̂g chhú-lí kong-sū.
|
Tī這間貨運公司食頭路beh óa 25冬--a, ùi駛車運匠到chit-má升到課長ê職務, 工作時間soah比過去koh khah長, 半暝不時koh會接著電話, 隨時都ài準備出門處理公事. |
|
Kúi kò goe̍h chêng, kong-si ùi Ji̍t-pún chhiàⁿ 3-ê “kò͘-būn” lâi, kóng beh chéng-tùn kong-si ê keng-êng. Chit 3-ê Ji̍t-pún kò͘-būn lâi kàu tè, tō tēng chin chē sin kui-tēng, iû-kî sī koán-lí kàn-pō͘, lóng hông iàu-kiû thàu-chá 7-tiám tō ài kàu kong-si, àm-sî iáu-bōe kòe 7-tiám bē-tàng lī-khui kong-si, ài kā kong-si tòng-choh “chhù” kāng-khoán khòaⁿ-thāi.
|
幾月日前, 公司ùi日本chhiàⁿ 3個「顧問」來, 講beh整頓公司ê經營. 這 3個日本顧問來到地, 就訂真chē新規定, 特別是管理幹部, lóng hông要求thàu早 7點就ài到公司, 暗時iáu-bōe過 7點bē-tàng離開公司, ài kā公司當作「厝」kāng款看待. |
|
Kū-nî, chèng-hú soan-pò͘ “kun kong kàu ùi kin-nî khai-sí 1 lé-pài hioh 2-kang”, kong-si pún-té mā soan-pò͘『比照辦理』. M̄-koh, Ji̍t-pún kò͘-būn lâi kàu chia, m̄-tāⁿ bô thang 1 lé-pài hioh 2-kang, lé-pài koh tiāⁿ-tiāⁿ ài lîm-sî khì kong-si chhú-lí tāi-chì, pêng-siông-sî-á siōng-pan ê sî-kan mā piàn-tn̂g, ke--chhut-lâi-ê lóng bô sǹg sī “ka-pan”, Ji̍t-pún kò͘-būn kóng “nā ū kā kong-si tòng-choh ka-tī ê chhù, seⁿ-sêng ài hù-chhut chit-kóa khùi-la̍t!”
|
舊年, 政府宣佈「軍公教ùi今年開始 1禮拜hioh 2工」, 公司本底mā宣佈『比照辦理』. M̄-koh, 日本顧問來到chia, m̄-tāⁿ無thang 1禮拜hioh 2工, 禮拜koh tiāⁿ-tiāⁿ ài臨時去公司處理tāi-chì, 平常時á上班ê時間mā變長, 加--出-來-ê lóng無算是「加班」, 日本顧問講「若有kā公司當作ka-tī ê厝, 生成ài付出這kóa氣力!」 |
|
I ū kúi-lō-ê 20 gōa nî ê lāu tông-sū, koh bô jōa kú tō ē-sái pān thè-hiu--a, chòe-kīn soah 1-ê 1-ê hō͘ kong-si sî thâu-lō͘, i kang-chok lêng-le̍k khah kiông chiah hông lâu--lo̍h-lâi, m̄-koh khang-khòe-liōng soah lú lâi lú tāng. In tī kong-si lāi-té mā ū cho͘ kang-hōe, m̄-koh kang-hōe ū ná bô--leh, ū siáⁿ-mi̍h lō͘-iōng? pn̄g-óaⁿ chóng--sī khah tiōng-iàu, tō sǹg sī kang-hōe kàn-pō͘, mā kan-taⁿ ē-tàng tiām-tiām phòe-ha̍p kong-si ê “chí-sī”.
|
I有幾lō個20外冬ê老同事, koh無jōa久就會sái辦退休--a, 最近soah 1個 1個hō͘公司辭頭路, i工作能力khah強chiah hông留--落-來, m̄-koh khang-khòe量soah愈來愈重. In tī公司內底mā有組工會, m̄-koh工會有ná無--leh, 有siáⁿ-mi̍h lō͘用? 飯碗總--是khah重要, 就算是工會幹部, mā kan-taⁿ會tàng tiām-tiām配合公司ê「指示」. |
|
I sim-koaⁿ-té chiâⁿ m̄ kam-goān, m̄- koh chhùi-kí-kin kā--leh, mā tio̍h ngē thun-lún--lo̍h-lâi, i iû-goân khòa-liām i ê hāu-siⁿ. I 2-ê hāu-siⁿ lóng tāi-ha̍k chhut-gia̍p--a, mā lóng thè-ngó͘--a, m̄-koh thâu-lō͘ iáu-bē ún-tēng, mā lóng iáu-bē sêng-ke, i chit-ê thâu-lō͘, siōng bô mā koh ū ún-tēng ê siu-ji̍p thang î-chhî ka-têng.
|
I心肝底chiâⁿ m̄甘願, m̄-koh嘴齒根kā--leh, mā tio̍h硬吞忍--落-來, i猶原掛念i ê後生. I 2個後生lóng大學出業--a, mā lóng退伍--a, m̄-koh頭路iáu-bōe穩定, mā lóng iáu-bōe成家, i這個頭路, 上無mā koh有穩定ê收入thang維持家庭. |
|
Tú-tio̍h lú lâi lú chē bô ha̍p-lí ê iàu-kiû, tông-sū ke-kiám ē put-boán, Ji̍t-pún kò͘-būn chóng--sī án-ne khau-sé: “Lín Tâi-oân-lâng nah lóng chiah-nī pháiⁿ khoán-thāi?” Piān-nā thiaⁿ-tio̍h Ji̍t-pún kò͘-būn án-ne teh siau-khián Tâi-oân-lâng, kòe-khì tiāⁿ-tiāⁿ thè tông-sū chhut-thâu ê i, chóng--sī chiâⁿ bē-sóng, m̄-koh mā bô in hoat-tō͘, kan-taⁿ ē-tàng ìn kóng: “Goán Tâi-oân-lâng chiah m̄ sī án-ne--leh!”
|
Tú著愈來愈chē無合理ê要求, 同事加減會不滿, 日本顧問總--是án-ne khau洗:「Lín台灣人nah lóng chiah-nī pháiⁿ款待?」便若聽著日本顧問án-ne teh消遣台灣人, i總--是chiâⁿ bē爽, 雖bóng過去tiāⁿ-tiāⁿ替同事出頭, m̄-koh chit-má i mā無hiah-ê日本á法tō͘, kan-taⁿ會tàng應講:「Goán台灣人chiah m̄是án-ne--leh!」 |
|
I tùi hiān-si̍t bô siáⁿ-mi̍h kî-thāi--a, ùi kòe-khì tóng-gōa sî-tāi khai-sí, i tō it-ti̍t chi-chhî giâ chhiⁿ-kî-á--ê, chit-má i chi-chhî ê lâng cho͘-sêng sin chèng-hú--a, i soah tian-tó kám-kak ka-tī lú lâi lú bô-la̍t kái-piàn siáⁿ-mi̍h.
|
I對現實無siáⁿ-mi̍h期待--a, ùi過去黨外時代開始, i就一直支持giâ青旗á--ê, chit-má i支持ê人組成新政府--a, i soah顛倒感覺ka-tī愈來愈無力改變siáⁿ-mi̍h. |
|
I iû-goân ē koan-sim tiān-sī pò-chóa téng-thâu ê chèng-tī-tāi, m̄-koh sim-koaⁿ-té chá tō khòaⁿ-phòa chèng-kheh ê kha-chhiú, i kan-kaⁿkoh ū tām-po̍h-á kî-thāi, kî-thāi chit-chióng bô kong-pêⁿ ê siā-hōe, koh ē ū ki-hōe thang kái-piàn, kî-thāi i ê 2-ê hāu-siⁿ m̄-bián chhiūⁿ i kāng-khoán hō͘ lâng chau-that!
|
I猶原會關心電視報紙頂頭ê政治tāi, m̄-koh心肝底早就看破政客ê kha手, i kan-taⁿ koh有tām-po̍h-á期待, 期待這種無公平ê社會, koh會有機會thang改變, 期待i ê 2個後生m̄免像i kāng款hō͘人蹧躂! |
|
(TGB Thong-sìn tē 21 kî, 2001 nî 6 goe̍h)
|
(TGB通訊第21期，2001年6月) |
