Góa ū 1 ê bāng
|
我有1個夢 |
| Tân Siok-kim |
陳淑金 |
|
Góa ū 1-ê bāng, chū sè-hàn tō tiāⁿ-tiāⁿ bāng tio̍h kāng-khoán ê chêng-kéng: 1-ê ji̍t-thâu beh lo̍h-soaⁿ ê àm-thâu-á, siōng bóe--á, kui-phìⁿ âng-hê chhiō tio̍h chhiân-hn̂g, mā chhiō tio̍h chhân-phiⁿ sió-lō͘ 1-ê khiâ kha-ta̍h-chhia ê gín-á, un-loán ê kng-sòaⁿ ùi gín-á ê āu-piah-bīn siā--lo̍h-lâi, ín-khí i ê chhù-bī, siūⁿ beh chhōe kng-sòaⁿ ê goân-thâu, tō oa̍t-thâu ǹg āu-piah-bīn khòaⁿ--khì, soah hō͘ 1-ê chiâⁿ tōa ê hêng-iáⁿ hè-kiaⁿ--tio̍h──1-tòng o͘-phú ê kang-tiûⁿ chhiā tī chhân tiong-hng, hō͘ ji̍t-thâu chhiō kah kim-si̍h-si̍h, hoán-siā ê kng chiok chha̍k-ba̍k--ê, hō͘ i ba̍k-chiu peh bē kim.
|
我有1個夢, 自細hàn就tiāⁿ-tiāⁿ夢著kāng款ê情景: 1個日頭beh落山ê暗頭á, 上尾--á, kui片紅霞chhiō著田園, mā chhiō著田邊小路 1個騎kha踏車ê gín-á, 溫暖ê光線ùi gín-á ê後壁面射--落-來, 引起i ê趣味, 想beh chhōe光線ê源頭, 就oa̍t頭ǹg後壁面看--去, soah hō͘ 1個chiâⁿ大ê形影嚇驚--著──1棟烏phú ê工場chhiā tī田中央, hō͘日頭chhiō kah金si̍h si̍h, 反射ê光chiok刺目--ê, hō͘ i目chiu peh bē金. |
|
Sǹg bē chheng ê àm-mî, tī bāng tiong, chhut-hiān koh-chióng hêng-thài ê kang-tiûⁿ, kóng bē chhut-siaⁿ ê khióng-pò͘ hām thòng-khó͘, siūⁿ beh hoah “kiù-lâng”, soah hoah bē chhut--lâi; cheng-sîn liáu-āu, kui sin-khu chhèng-kōaⁿ, i chhoah bē lī koh chhoán tōa-khùi.
|
算bē清ê暗暝, tī夢中, 出現各種形態ê工場, 講bē出聲ê恐怖hām痛苦, 想beh hoah「救人」, soah hoah bē出--來; cheng-sîn了後, kui身軀chhèng汗, i chhoah bē離koh喘大氣. |
|
Gín-á ê ok-bāng tōa-pō͘-hūn lóng sī khì hō͘ kùi jiok, góa ê ok-bāng sī bāng tio̍h kang-tiûⁿ, hit-chióng kiaⁿ-hiâⁿ liān chit-má teh kóng hō͘ lín thiaⁿ ê sî, iû-goân kám-siū ē tio̍h, giah pit ê chhiú m̄ thiaⁿ khòng-chè, ti̍h phi̍h8-phi̍h8-chhoah, iū koh sī ba̍k-bâi kat-kat hām tio̍h-kiaⁿ ê gán-sîn.
|
Gín-á ê惡夢大部份lóng是去hō͘鬼jiok, 我ê惡夢是夢著工場, hit種驚惶連chit-má teh講hō͘ lín聽ê時, iû-goân感受會著, giah筆ê手m̄聽控制, ti̍h phi̍h8-phi̍h8-chhoah, 又koh是目眉結結hām著驚ê眼神. |
|
Seng-oa̍h tiong, chū-jiân ē khì siám- phiah kang-tiûⁿ. Ta̍k-pái chē chhia iah sī chē hóe-chhia keng-kòe kang-gia̍p-khu hit tōaⁿ lō͘ ê sî, ài khòaⁿ thang-á gōa hong-kèng ê góa, tō ē kā thâu àⁿ-kē-kē, kûn-thâu-bú tēⁿ-ân-ân, an-ùi ka-tī: Mài kiaⁿ! Mài kiaⁿ! 1-sî-á tō kòe--khì-a.
|
生活中, 自然會去閃避工場. Ta̍k-pái坐車iah是坐火車經過工業區hit段路ê時, ài看窗á外風景ê我, 就會kā頭àⁿ kē-kē, 拳頭母tēⁿ-ân-ân, 安慰ka-tī: Mài驚! Mài驚! 1時á就過--去-a. |
|
Tha̍k kok-tiong ê sî-chūn, in-ūi kiaⁿ khì kang-tiûⁿ chò-kang, góa it-ti̍t chiok phah-piàⁿ tha̍k-chheh, m̄ sī kiaⁿ chò- kang sin-khó͘, mā m̄ sī kiaⁿ chò-kang ē hō͘ lâng khòaⁿ bē khí, sī kiaⁿ “kang-tiûⁿ”, m̄ káⁿ khòaⁿ, mā m̄ káⁿ óa kīn. Tōa-hàn liáu-āu, chiok ài khiâ chhia tī chit-má ê tōa-lō͘ sió-hāng sì-kè loa̍h-loa̍h-sô, kan-taⁿ m̄ káⁿ keng-kòe kang-tiûⁿ, i ti̍h siám-phiah hit-tiâu lō͘.
|
讀國中ê時chūn, 因為驚去工場做工, 我一直chiok phah拚讀冊, m̄是驚做工辛苦, mā m̄是驚做工會hō͘人看bē起, 是驚「工場」, m̄敢看, mā m̄敢óa近. 大hàn了後, chiok ài騎車tī chit-má ê大路小巷sì-kè loa̍h-loa̍h-sô, kan-taⁿ m̄敢經過工場, i ti̍h閃避hit條路. |
|
Gín-á sî-chūn tùi kang-tiûⁿ ê kiaⁿ-hiâⁿ, khó-lêng sī 1-chióng tùi『巨大型像』kiaⁿ-hiâⁿ ê phó͘-phiàn sim-lí, tō chhin-chhiūⁿ khòaⁿ tio̍h ko-soaⁿ tōa- hái ē kiaⁿ-hiâⁿ kāng-khoán; tōa-hàn liáu-āu, iû-goân hiah-nī kiaⁿ-hiâⁿ, khó-lêng sī 1-chióng lâng tùi seng-oa̍h khoân-kéng kám-kak put-an ê sim-lí piáu-hiān, tō chhin-chhiūⁿ kó͘-chá-lâng ê seng-oa̍h siū tio̍h soaⁿ-iá hó͘-pà ê ui- hia̍p kāng-khoán, hiān-tāi-lâng ê seng-oa̍h siū tio̍h in ka-tī chhòng-chō ê hiān-tāi iá-siù──kang-gia̍p kho-ki ê ui-hia̍p.
|
Gín-á時chūn對工場ê驚惶, 可能是 1種對『巨大型像』驚惶ê普遍心理, 就親像看著高山大海會驚惶kāng款; 大hàn了後, iû-goân hiah-nī驚惶, 可能是 1種人對生活環境感覺不安ê心理表現, 就親像古早人ê生活受著山野虎豹ê威脅kāng款, 現代人ê生活受著in ka-tī創造ê現代野獸──工業科技ê威脅. |
|
Chit-chióng kiaⁿ-hiâⁿ mā sī hiān-tāi-lâng tùi kang-gia̍p kho-ki hoat-tián ê bô-nāi: i siūⁿ beh kòe khah hó ê seng-oa̍h, siūⁿ beh chó͘-tòng chū-jiân khoân-kéng kap soaⁿ-iá hó͘-pà ê siong-hāi, soah bô chún-sǹg--tio̍h, tian-tó khí-chō 1-phìⁿ koh khah tōa ê『現代都市叢林』, lâng kāng-khoán tòa tī chhiū-nâ-á lāi-tóe, siū tio̍h iá-siù──kang-tiûⁿ ê hè-kiaⁿ.
|
這種驚惶mā是現代人對工業科技發展ê無奈: i想beh過khah好ê生活, 想beh阻擋自然環境kap山野虎豹ê傷害, soah無準算--著, 顛倒起造 1片koh khah大ê『現代都市叢林』, 人kāng款tòa tī樹林á內底, 受著野獸──工場ê嚇驚. |
|
Eng-àm siūⁿ tio̍h che kang-tiûⁿ ê tāi-chì, koh sī 1 ê bô hó-bîn ê àm-mî--a, khó-o ê kang-tiûⁿ, iū koh ti̍h ko-ko-tîⁿ, sái-lāng góa ê nńg-chiáⁿ, hō͘ lâng án-chóaⁿ bi̍h mā bi̍h bē lī.
|
Eng暗想著che工場ê tāi-chì, koh是 1個無好眠ê暗暝--a, 可惡ê工場, 又koh ti̍h ko-ko纏, sái弄我ê nńg-chiáⁿ, hō͘人án-chóaⁿ bi̍h mā bi̍h bē離. |
|
Góa ū 1 ê bāng, 1 ê éng-oán ê ok-bāng.
|
我有 1個夢, 1個永遠ê惡夢. |
|
(TGB Thong-sìn tē 25 kî, 2001 nî 10 goe̍h)
|
(TGB通訊第25期，2001年10月) |
