Beh Chèⁿ Siáⁿ
|
Beh Chèⁿ Siáⁿ |
| Tân Phek-thêng |
陳柏婷 |
|
E-po͘, khiā tī châi-keng ha̍k-īⁿ, tùi Chin-lí ê tōa-mn̂g khòaⁿ--kòe, bi-bi ê hong chhoe--lâi, tāi-ha̍k-seng teh khai-káng, gín-á teh chhit-thô, koh ū hún-chiáu tī thô͘-kha kiâⁿ. Chiah-nī súi ê kong-kéng, hō͘ góa chiām-sî bōe-kì chi̍t-kóa hoân-ló.
|
E-po͘, khiā tī財經學院, tùi真理ê大門看--過, 微微ê風吹--來, 大學生teh開講, gín-á teh chhit-thô, koh有粉鳥tī塗kha行. Chiah-nī súi ê光景, hō͘ góa暫時bōe記1 kóa煩惱. |
|
Lâi chia chò kang-chok jîn-oân tē-jī-kang--a, sui-bóng chin thiám, m̄-koh, ū chi̍t-tīn koan-sim Tâi-gí-bûn ê siân-pái kap siàu-liân-lâng, tī chia teh jīn-chin ha̍k-si̍p phah-piàⁿ, ta̍k-ê lóng tàu-tīn iōng Tâi-gí teh ko-thong, chin chū-jiân ê kám-kak.
|
來chia做工作人員第2工--a, 雖bóng真thiám, m̄-koh, 有1 tīn關心台語文ê siân-pái kap少年人, tī chia teh認真學習phah-piàⁿ, ta̍k-ê lóng tàu-tīn用台語teh溝通, 真自然ê感覺. |
|
Tng teh hiáng-siū bí-hó ê khì-hun hām khong-kan ê sî-chūn, ba̍k-chiu chêng hoat-seng chi̍t-chân kau-thong sū-kò͘, nn̄g-ê lâng ūi-tio̍h chin iù-chat ê tāi-chì kóng bōe hó-sè, khì-chhia sió-khóa khê--tio̍h tō siáng lóng boài niū siáng, m̄-chai teh kò͘-chip sáⁿ?
|
Tng teh享受美好ê氣氛hām空間ê時chūn, 目chiu前發生1 chân交通事故, 2 ê人為tio̍h真細節ê tāi-chì講bōe好勢, 汽車sió-khóa khê--tio̍h就siáng lóng boai讓siáng, m̄知teh固執sáⁿ? |
|
Kóng bú-gí sī chin chū-jiân ê tāi-chì, m̄-bat khòaⁿ-kòe bú-gí koh su-iàu lâng chiah sin-khó͘ teh chhui-sak--ê. Sī án-chóaⁿ chhiūⁿ kóng Tâi-gí chiah tiōng-iàu ê tāi-chì, kian-chhî ê lâng bô-kàu chōe?
|
講母語是真自然ê tāi-chì, m̄-bat看過母語koh需要人chiah辛苦teh chhui-sak--ê. 是án-chóaⁿ像講台語chiah重要ê tāi-chì, 堅持ê人無夠chōe? |
|
E-po͘ ê ji̍t-thâu chin un-jiû, ǹg-bāng chit-chióng tiⁿ-tiⁿ ê kám-kak, ē hòa-kái só͘-ū ê būn-tê.
|
E-po͘ ê日頭真溫柔, ǹg望chit種tiⁿ-tiⁿ ê感覺, 會化解所有ê問題. |
|
(TGB Thong-sìn tē 24 kî, 2001 nî 9 goe̍h)
|
(TGB通訊第24期，2001年9月) |
