Koan-im-soaⁿ
|
觀音山 |
| Tân Chiau-hông |
陳昭宏 |
|
Chit-tè thó͘-tē ū siáⁿ-mi̍h bô kāng-khoán ê só͘-chāi? Tām-chúi-hô tī pêⁿ-tē leh lâu, tān-sī lí ē khòaⁿ-tio̍h chiok chē koài-chhiú ó͘ lâi ó͘ khì, lí bong bē tio̍h Tām-chúi-hô ê chúi, beh khòaⁿ Koan-im-soaⁿ ài tùi kang-têng ûi-chhiûⁿ-á ê khang thau-thau kā khòaⁿ, tō ná chhin-chhiūⁿ koaiⁿ tī kaⁿ-ga̍k tán pàng-hong kāng-khoán.
|
這tè土地有siáⁿ-mi̍h無kāng款ê所在? 淡水河tī平地leh流, 但是lí會看tio̍h chiok chē怪手ó͘來ó͘去, lí摸bē tio̍h淡水河ê水, beh看觀音山ài tùi工程圍牆á ê孔偷偷kā看, 就ná親像關tī監獄等放風kāng款. |
|
10-goe̍h chhe-7 hit-kang, TGB kap Tâi-bûn-siā 1-tīn lâng chē tō͘-chûn chhoe hái-hong, ta̍k-ê thâu-mo iāⁿ-iāⁿ-poe, chhùi-kak tam-tio̍h hái-chúi leh bî-bî-á chhiò, chiàⁿ-káng sī teh pàng-hong ê khoán.
|
10月初7 hit工, TGB kap台文社1-tīn人坐渡船吹海風, ta̍k-ê頭毛iāⁿ-iāⁿ飛, 嘴角tam tio̍h海水leh bî-bî-á笑, 正港是teh放風ê款. |
|
Lâi-kàu Koan-im-soaⁿ kha, sì-kè lóng sī bōng-tē kap lêng-kut-thah, khak-si̍t kap ùi Tām-chúi hit-thâu khòaⁿ--kòe-lâi bô-kâng. Tī chia, khòaⁿ khah chē khah chheng-chhó͘.
|
來到觀音山kha, sì-kè lóng是墓地kap靈骨塔, 確實kap ùi淡水hit頭看--過-來無kâng. Tī chia, 看khah chē khah清楚. |
|
Pòaⁿ-tiong-hôaⁿ hioh-khùn, chē tī chhêng-á kha lim-chúi nà-liâng, chhêng-á piⁿ sī 1-keng kan-tan ê kám-á-tiàm, 2-ê tōa-lâng tī tiàm-thâu “Hun-chiú Kong-bē” pâi-á kha tuh-ku, 1-tūn gín-á thuh tiàm lō͘-piⁿ sńg sè-tâi koài-chhiú, gín-á ki-ki-chhiò ê sî, goán chit-tīn lâng kè-sio̍k tùi soaⁿ-téng kiâⁿ--khì.
|
半中hôaⁿ hioh-khùn, 坐tī chhêng-á kha lim水nà涼, chhêng-á邊是1間簡單ê kám-á店, 2-ê大人tī店頭「菸酒公賣」牌á kha tuh-ku, 1-tūn gín-á thuh tiàm路邊sńg細台怪手, gín-á ki-ki笑ê時, goán這tīn人繼續tùi山頂行--去. |
|
Ná ǹg soaⁿ-téng peh góa ná teh siūⁿ, tú-chiah hit-tīn gín-á kám chai-iáⁿ, chin-chiàⁿ ê koài-chhiú tī soaⁿ-kha leh ó͘ in ê ka-hn̂g, tuh-ku ê a-peh kám ū tì-kak tio̍h thó͘-tē teh siau-sit?
|
Ná ǹg山頂peh góa ná teh想, tú-chiah hit-tīn gín-á kám知iáⁿ, 真正ê怪手tī山kha leh ó͘ in ê家園, tuh-ku ê a伯kám有致覺tio̍h土地teh消失? |
|
1-pak chiâⁿ hō͘ lâng hoâi-liām ê chêng-kéng, soah ū chiah chē thó͘-tē ê siau-sit beh hō͘ lán chai-iáⁿ.
|
1幅chiâⁿ hō͘人懷念ê情景, soah有chiah chē土地ê消失beh hō͘ lán知iáⁿ. |
|
(TGB Thong-sìn tē 26 kî, 2001 nî 11 goe̍h)
|
(TGB通訊第26期，2001年11月) |
