Pòaⁿ-au Ka-pi ê Chu-bī
|
半au咖啡ê滋味 |
| Sun Kiàn-tì |
孫健智 |
|
Góa chē tī chhan-thiaⁿ lāi-té, toh-téng sī chi̍t-au ka-pi kap chi̍t-tui chheh. Gōa-kháu teh lo̍h-hō͘, thiaⁿ kóng sī hong-thai beh lâi, ta̍k-ê lóng giah hō͘-sòaⁿ.
|
Góa坐tī餐廳內底, 桌頂是1 au咖啡kap 1堆冊. 外口teh落雨, 聽講是風颱beh來, ta̍k-ê lóng giah雨傘. |
|
Ùi tōa-mn̂g ji̍p--lâi, tò-chhiú-pêng sī pa-tâi, chiàⁿ-chhiú-pêng pa-tâi tùi-bīn ê piah, tiàu chi̍t-tè chiok tōa-tè ê kiàⁿ. Góa chē tī chit-ê ūi, tú-á-hó ē-tàng thàu-kòe kiàⁿ ê hoán-siā, khòaⁿ-tio̍h pa-tâi, mā khòaⁿ-tio̍h i tī pa-tâi āu-piah.
|
Ùi大門入--來, tò手pêng是吧台, 正手pêng吧台對面ê壁, 吊1 tè chiok大tè ê鏡. Góa坐tī這個位, tú-á好會tàng透過鏡ê反射, 看著吧台, mā看著i tī吧台後壁. |
|
Ū tang-sî-á, i teh bô-êng, thâu lê-lê, khòaⁿ bē tio̍h i ê bīn; êng ê sî-chūn, i khiā tī hia m̄-chai teh siūⁿ siáⁿ. Nā chún-kóng, i teh khòaⁿ tùi-bīn piah-téng ê kiàⁿ, góa thâu tō khah kín oa̍t tùi piⁿ--á khì, kiaⁿ hō͘ i chai-iáⁿ góa teh thau-khòaⁿ.
|
有tang時á, i teh無閒, 頭lê-lê, 看bē著i ê面; 閒ê時chūn, i khiā tī hia m̄知teh想siáⁿ. 若準講, i teh看對面壁頂ê鏡, góa頭就khah緊oa̍t tùi邊--á去, 驚hō͘ i知影góa teh偷看. |
|
Chit-má i teh chú ka-pi, toh-téng chit-au èng-kai mā sī i chú--ê. Chē tī kiàⁿ ē-kha hit-toh ê sió-chiá kā góa gîn, ún-tàng tòng-chò góa sī teh khòaⁿ--i.
|
Chit-má i teh煮咖啡, 桌頂這au應該mā是i煮--ê. 坐tī鏡下kha hit桌ê小姐kā góa gîn, 穩當當作góa是teh看--i. |
|
I ū khòaⁿ--góa? I bô khòaⁿ--góa? Toh-téng ê ka-pi koh chhun pòaⁿ-au iáu-bōe lim. Tùi i lâi kóng, chit-au kap pa̍t-au sio-siâng, kan-taⁿ sī i ê khang-khòe, hō͘ siáng lim lóng bô chha, hoâiⁿ-ti̍t chú ê lâng pòaⁿ-mî a̍h bē sit-bîn--a.
|
I有看--góa? I無看--góa? 桌頂ê咖啡koh chhun半au iáu未lim. 對i來講, 這au kap別au相siâng, kan-taⁿ是i ê khang-khòe, hō͘ siáng lim lóng無差, 橫直煮ê人半暝a̍h bē失眠--a. |
|
Chú-hó ê ka-pekhǹg tī pa-tâi téng, Waiter ē phâng khì hō͘ siáng--leh? Phâng hō͘ siáng lóng kāng-khoán, sî-kan kàu i tō hā-pan--a. I tha̍h chi̍t-niá hiû-á, hō͘-sòaⁿ the̍h--leh, lī-khui pa-tâi, lī-khui chhan-thiaⁿ.
|
煮好ê咖啡khǹg tī吧台頂, Waiter會phâng去hō͘ siáng--leh? Phâng hō͘ siáng lóng kāng款, 時間到i就下班--a. I tha̍h 1領裘á, 雨傘the̍h--leh, 離開吧台, 離開餐廳. |
|
Gōa-kháu ê hō͘ khai-sí kiò, léng--khì ê ka-pi tang-sî ē cháu-bī--leh? Góa chi̍t-chhùi lim hō͘ ta, giah chi̍t-ki pit, khai-sí o͘-pe̍h chu̍t.
|
外口ê雨開始叫, 冷--去ê咖啡tang時會走味--leh? Góa 1嘴lim hō͘乾, giah 1枝筆, 開始烏白chu̍t. |
|
(TGB Thong-sìn tē 27 kî, 2001 nî 12 goe̍h)
|
(TGB通訊第27期，2001年12月) |
