Tī hn̄g-hn̄g ê só͘-chāi
|
Tī遠遠ê所在--鹽鄉情 |
|---|---|
| Ông Chong-kia̍t | 王宗傑 |
|
Tī hn̄g-hn̄g ê só͘-chāi Góa ū thiaⁿ-kìⁿ Gín-á ê khàu-siaⁿ Siaⁿ-siaⁿ ê pi-ai Khàu bô hoaⁿ-hí ê sè-kài |
Tī遠遠ê所在 我有聽見 囡仔ê哭聲 聲聲ê悲哀 哭無歡喜ê世界 |
|
Tī lāu-jia̍t ê chhī-lāi Góa ū khòaⁿ Chhiū-á bô lâng ài Chhiⁿ-âng-teng sì-kè chai Ū chhia bô ba̍k-chiu Lāu-lâng gín-á Kiâⁿ kòe ke-á-lō͘ Lóng-sī kiaⁿ-hiâⁿ ê kha-pō͘ |
Tī鬧熱ê市內 我有看 樹仔無人愛 青紅燈四界chai 有車無目珠 老人 囡仔 行過街仔路 攏是驚惶ê腳步 |
|
Tī pò-chóa tiān-sī Góa ū thiaⁿ--kìⁿ Ū lâng leh tōa-siaⁿ Ū lâng chông khì thiaⁿ Biō-sī ián-káng-thiaⁿ Thiaⁿ bē-liáu ê hó ōe Hiàn hō͘ lán ê thó͘-tē |
Tī報紙電視 我有聽見 有人leh大聲 有人chông去聽 廟寺 演講廳 聽勿會了ê好話 獻hō͘咱ê土地 |
|
Hoat-su sèng-jîn bû-siōng-jîn Chi̍t phiⁿ chi̍t phiⁿ ê boán-chiok Chi̍t tiôⁿ chi̍t tiôⁿ ê an-ùi |
法師聖人無上人 一篇一篇ê滿足 一場一場ê安慰 |
|
Ùi chháu-tē kàu to͘-chhī Góa ū khòaⁿ Soán-kú chi̍t-piàn ko̍h chi̍t-piàn Chhiáⁿ-kheh chia̍h-toh bō͘-khoán Chi̍t-thoaⁿ koh chi̍t-thoaⁿ Chiàn-pò soan-toân-toaⁿ Chi̍t-tioⁿ chi̍t-tioⁿ Pun hō͘ lán ê thô͘-kha |
Ùi草地到都市 我有看 選舉一遍koh一遍 請客 食桌 募款 一攤koh一攤 戰報 宣傳單 一張一張 分hō͘咱ê塗腳 |
|
Tī siū-siong ê thó͘-tē Góa ū thiaⁿ--kìⁿ Choan-ka ha̍k-chiá Kóng bîn-chú chèng-tī Kóng kong-pêⁿ chèng-gī Tōa jîn-bu̍t Pian ū-sǹg Chē chìn-kháu-chhia chiok chhù-bī Tóng-êng-sū-gia̍p chiok thàn-chîⁿ Ha̍p-hoat it-chhè lóng-sī |
Tī受傷ê土地 我有聽見 專家學者 講民主政治 講公平正義 大人物 編預算 坐進口車足趣味 黨營事業足趁錢 合法 一切攏是 |
|
Thàu-chá kàu àm-mî Lâi-lâi khì-khì Hāng-bóe ke-thâu Ha̍k-seng-gín-á phāiⁿ chheh-pau Khiâ kha-ta̍h-chhia Hō͘ tōa-lâng chài Ji̍t..piàⁿ mî..piàⁿ Hō͘ lâng chhiò su-tai |
透早到暗暝 來來去去 巷尾街頭 學生囡仔背冊包 騎腳踏車 Hō͘大人載 日拚暝拚 Hō͘人笑書呆 |
|
Tī hn̄g-hn̄g ê só͘-chāi Góa ū khòaⁿ Chiap Má-chó͘ ngiâ hu̍t-gê Jîn san jîn hái Chò ū ì-gī ê tāi-chì Khah chē chîⁿ to leh khai Kóng sī ē pó-pì Kiáⁿ-sun hó io-chhī Āu-tāi ū hok-khì Ē pêng-an tōa thàn-chîⁿ |
Tī遠遠ê所在 我有看 接媽祖 迎佛牙 人山人海 作有意義ê代誌 較濟錢都leh開 講是會保庇 子孫好io飼 後代有福氣 會平安大趁錢 |
|
Tī hn̄g-hn̄g ê só͘-chāi Góa ū khòaⁿ Tùi-bīn hōaⁿ phah hui-tôaⁿ Tiān-sī mûi-thé ū lâng leh kóng “Tû-lí chiú-sú chhú-chi thaⁿ” Chia̍h chi̍t-sì-lâng Tâi-oân bí Lim chi̍t-sì-lâng Tâi-oân chúi Niá chi̍t-sì-lâng ê hok-lī Kóng tio̍h Tâi-oân i tō oàn Kam-goān khòaⁿ lâng phah Tâi-oân |
Tī遠遠ê所在 我有看 對面岸拍飛彈 電視媒體有人leh講 「獨立就是刺激他」 食一世人台灣米 飲一世人台灣水 領一世人ê福利 講著台灣伊都怨 甘願看人扑台灣 |
|
Tī hn̄g-hn̄g ê só͘-chāi Góa ū thiaⁿ--kìⁿ Bí-kok tńg--lâi ê phok-sū tōa-koaⁿ-hó͘ Chiap hu̍t-gê ngiâ Má-chó͘ Pò-chóa tiān-sī tōa-siaⁿ pūi Kóng tāi-su ū tì-hūi Kóng chong-kàu hó chû-pi Khí-chhù hō͘ lâng khiā Ba̍k-chiu kim-kim Khòaⁿ lâng beh thun beh chia̍h |
Tī遠遠ê所在 我有聽見 美國轉來ê博士大官虎 接佛牙 迎媽祖 報紙電視大聲吠 講大師有智慧 講宗教好慈悲 起厝hō͘人企 目珠金金 看人beh吞beh食 |
