Âng Bêng-lí pia̍t-sè
|
洪明理別世 |
| Ô͘ Tiāu-ki |
胡兆基 |
|
Âng Bêng-lí chiū-sī Liōng-á, tùi tī 1893 nî ji̍p-kàu. I tùi chhut-sì í-lâi seng-khu siông-siông bat ū phòa-pīⁿ; kàu chiūⁿ 10 hòe í-lâi chiū khah hán-tit phòa-pīⁿ. Lūn-kàu i-ê chò lâng phoh-si̍t khiām-séng; i chò lâng ê kiáⁿ-jî ū hàu, ū gī, m̄-bián hō͘ in sī-tōa-lâng siū-khì lâi hiâm i; i sī put-chí gâu pang-chān sī-tōa-lâng. Tùi kúi-nā nî í-lâi ē hiáu kì-siàu, bé-bē put-chí ū chhù-sū. I kap chhù-piⁿ hiuⁿ-siā ê gín-ná chò-hóe, i m̄ bat kap lâng oan-ke, ia̍h m̄ bat kap lâng saⁿ-phah saⁿ-mē, chit-ho ê sū lóng m̄ bat. Góa lai Tâng-káng, i ia̍h bat chiâⁿ nî kú lâi kap góa tha̍k-chheh; tī o̍h--n̍i̍h i ia̍h sī hián-bêng hó ê khoán-sit. I bat kā goán kóng i chin ài tha̍k-chheh, bat kiû in lāu-pē kàu lâu ba̍k-sái. Lūn i thiaⁿ tō-lí ū put-chí tì-ì, i-ê sim chēng, só͘ thiaⁿ siông-siông ē kì-tit. Lūn i ài ji̍p-kàu, nn̄g pái lâi hō͘ Bo̍k-su mn7, i éng sī khah chò chêng lâi, nā ū pí i khah tōa ê lâng tī-teh, i chiū ài niū lâng tāi-seng. Tùi i ji̍p-kàu liú-āu, thiaⁿ-kìⁿ Hú-siâⁿ ū sin khí chi̍t-keng Tiong-o̍h-tn̂g, i chin tōa him-bō͘ ài khì hia tha̍k-chheh, chiū ko͘-chiâⁿ in lāu-pē lāu-bó i-ê hiaⁿ. I-ê pē ū khòa-lū i-ê sin-thé, kiaⁿ-liáu bē kham, chóng-sī i chin chhiat-ì kiû i-ê pē hiaⁿ, in nā kóng hó, i-ê sim chiū pêng-an, in nā kóng m̄ hō͘ i khì, i-ê sim iu-būn kan-khó͘ bē pêng-an. I-ê lāu-pē tiāⁿ-tio̍h ín i hó, i chiū chiong i pún-sin tùi sè-hàn ê sî só͘ lia̍p-chek ê chîⁿ hoaⁿ-hí the̍h chhut lâi, ū gō͘-kho͘ gîn, thiap o̍h--n̍i̍h ê hóe-si̍t ê só͘-hùi, iáu ū tām-po̍h chò chū-kí ê só͘-hùi. Chiaⁿ goe̍h cha̍p-sì ji̍t chiū tùi Tang-káng khí-sin; chi̍t-lō͘ góa mn̄g i kúi-nā pái, khòaⁿ i kiâⁿ-lō͘ kha ē sng á-bē, beh chē kiō á-m̄, i kóng kha bô sím-mi̍h sng, ē kiâⁿ lō͘ m̄-bián chē kiō. Cha̍p-la̍k kàu Hú-siâⁿ sin-thé pêng-an. Cha̍p-chhit khui o̍h tha̍k-chheh; kàu jī-sì ji̍t ū tām-po̍h jia̍t, jī-gō͘ ji̍t ia̍h iáu ū tām-po̍h jia̍t.Āu-lâi i-ê jia̍t ū sî khah-hó,ū sî ū tām-po̍h khah-jia̍t, chóng-sī i-ê me̍h ū put-chí khah-kín. Kim i-seng chiū phài lâng teh chiàu-kò͘ i , i-seng ū pī-pān put-chí hó-sè ê só͘-chāi hō͘ i thang khùn. In-ūi i phòa-pīⁿ ê sî chin gâu thun-lún, bô chhan bô kiò, i ka-tī ê sim siông-siông ài kap Chú kau-pôe, ta̍uh-ta̍uh ū ka-tī teh kî-tó. I só͘ chia̍h ê io̍h lóng bô sím-mi̍h èng-hāu. Kàu jī-goe̍h chhe gō͘ ē-pō͘ gō͘-tiám-gōa cheng, Chú tiàu i an-jiân kòe-óng. Ai-ah! Ū chit-hō siàu-liân lâng chīn-tiong-hō͘ ê lâng kòe-óng lah. Taⁿ tī sè-kan bô thang koh kìⁿ-tio̍h i lah, i ún-tàng hō͘ Chú chiap-la̍p, éng-éng kap Chú Iâ-so͘ saⁿ-kap tī-teh, tī hia ū thang hióng-siū Chú Iâ-so͘ só͘ èng-ún ê chun-kùi êng-kng tōa hok-khì.
|
洪明理就是Liōng仔！對tī 1893年入教。伊對出世以來身軀常常bat有破病，到上10歲以來就較罕tit破病。論到伊ê做人樸實儉省，伊做人ê子兒有孝、有義，m̄免 hō͘ in 序大人受氣來嫌伊，伊是不止gâu 幫贊序大人。對幾若年以來，會曉記數不止有次序。伊kap厝邊鄉社ê 囡仔做伙，伊m̄-bat kap人冤家，亦m̄-bat kap人相扑、相罵，這號ê事攏m̄-bat。我來東港，伊bat 成年久來kap我讀冊；tī學--n̍i̍h伊亦是顯明好ê款式。伊bat kā 阮講真ài讀冊，bat 求in老父到流目屎。論伊聽道理有不止致意，伊ê心靜，所聽常常會記。論伊ài入教，兩擺來hō͘牧師問，伊往是較做前來，若有比伊較大ê 人tī--leh，伊就ài讓人代先。對伊入教了後，聽見府城有新起1間中學堂，伊真大欣慕ài去hia 讀冊，就ko͘-chiâⁿ in 老父、老母、伊ê兄。伊ê父有掛慮伊ê身体，驚了bē堪，總--是伊真切意求伊ê父兄，in 若講好，伊ê心就平安，in若講m̄-hō͘伊去，伊ê身憂悶艱苦bē平安。伊ê老父定著允伊好，伊就將伊本身對細漢ê時所粒積ê錢歡喜提--出來，有5箍銀，貼學--n̍i̍h ê伙食ê所費，iáu有淡薄做自己ê所費。正月14日就對東港起身，一路我問伊幾若擺，看伊行路腳會酸抑bē,beh坐轎抑m̄,伊講腳無甚mi̍h酸，會行路m̄免坐轎。16 到府城身体平安。17開學讀冊，到24日有淡薄熱，25日亦iáu有淡薄熱。後--來伊ê熱有時較好，有時有淡薄較熱，總--是伊ê脈有淡薄較緊。金醫生就派人teh 照顧--伊。醫生有備辦不止好勢ê所在hō͘伊thang 睏。因為伊破病ê時真gâu吞忍，無呻無叫，伊家己ê心常常ài kap主交陪，ta̍uh ta̍uh有家己teh祈禱。伊所食ê藥攏無甚mi̍h應效，到二月初五e晡5點外鐘，主召伊安然過往。Ai--ah！有這號少年盡忠厚ê人過往--lah！今tī世間無thang koh見著伊--lah，伊穩當hō͘主接納，往往kap主耶穌相kap tī--leh，tī hia 有thang享受主耶穌所應允ê尊貴榮光大福氣。 |
|
Cha̍p-jī ji̍t sī lé-pài-ji̍t, thoân Chú Iâ-so͘ ê tō-lí, bē bián-tit tio̍h lio̍h-lio̍h-á kóng Liōng-á ê tāi-chí; só͘-í chi̍t-ē thiaⁿ-kìⁿ hiaⁿ-tī chí-moāi bô m̄ siong-sim lâu ba̍k-sái, i-ê pē-bó siong-sim iu-būn éng bē-bián-tit. Tùi án-ni sòa lâi bián-lē hiaⁿ-tī chí-moāi.
|
12日是禮拜日，傳主耶穌ê道理，bē免tit著略略仔講量仔ê代誌；所以一下聽見，兄弟姊妹無m̄傷心流目屎，伊ê父母傷心憂悶往未免--tit。對án-ni 續來勉勵兄弟姊妹。 |
|
1.Lán thang iu-būn i bô tòa tī sè-kan thang lâi chò Chú ê kang, in-ūi i pún-sin só͘ him-bō͘ tāi-seng ji̍p Tiong-o̍h, ǹg-bāng āu-lâi ē ji̍p Tōa-o̍h, ha̍k-si̍p tō-lí, ài chò Chú ê kang, ài kui êng-kng Chú ê miâ.
|
1.咱thang憂悶伊無tòa tī世間thang 來做主ê工，因為伊本身所欣慕代先入中學，向望後--來會入大學，學習道理，ài做主ê工，ài歸榮光主ê名。 |
|
2.Lán tāi-ke chiū kā i hoaⁿ-hí, in-ūi i hō͘ Chú tiàu i kàu thian-tông, lóng bē thang giâu-gî, i sī tùi chèng-lâng ê tiông-ng thâi-iâⁿ, i ū chīn i-ê khùi-la̍t lâi pháu-cháu kàu tit-tio̍h kiù, tit-tio̍h pò-siúⁿ ê hok-khì. Thiaⁿ-kìⁿ i kòe-óng m̄-nā kàu-hōe-lāi ê lâng siong-sim, chiū hōe-gōa ê lâng ia̍h ū siong-sim lâu ba̍k-sái. Chit-ê tāi-chì thang bián-lē lán tāi-ke tio̍h chò hó lâng. In-ūi lán ê sìⁿ-miā bô tiāⁿ-tio̍h; siàu-liân ê lâng ē kòe-óng, hô-hòng lán khah ū hòe ê lâng mah? Kiám m̄ tio̍h kéng-séng pī-pān? Chú nā lâi beh kiò lán tò-khì, lán chiū hoaⁿ-hí thiaⁿ. Kiù-chú tiàu lán lī-khui sè-kan tò-khì Pē ê ke, chiū hoaⁿ-hí kàu bē-kò͘--tit.
|
2.咱逐家kā伊歡喜，因為伊hō͘主召伊到天堂，攏bē thang giâu疑，伊是對眾人ê 中央thâi贏，伊有盡伊ê氣力跑走到得著救，得著報償ê福氣。聽見伊過往，m̄但教會內ê人傷心，就會外ê人亦有傷心流目屎。這個代誌thang 勉勵咱逐家著做好人。因為咱ê性命無定著，少年ê人會過往，何況咱較有歲ê人mmah5?Kiám m̄著警醒備辦？主若來beh叫咱倒--去，咱就歡喜聽。救主召咱離開世間倒去父ê家，就歡喜到bē顧--tit。 |
|
(Tâi-oân-hú-siâⁿ Kàu-hōe-pò tē 108 koàn,1894 nî 4 ge̍h)
|
(台灣府城教會報第108卷，1894年4月) |
