Lō͘-teng
|
路燈--鹽鄉情 |
|---|---|
| Ông Chong-kia̍t | 王宗傑 |
|
Goán-hiong ê àm-mî Chi̍t ê chng-thâu Chi̍t ê chng-thâu Chi̍t-pha chi̍t-pha ê lō͘-teng Chi̍t-pha chi̍t-pha ê lō͘-teng |
阮鄉ê暗暝 一ê庄頭 一ê庄頭 一pha一pha ê路燈 一pha一pha ê路燈 |
|
Goán-hiong ê àm-mî Goe̍h-niû chheng-chheng Tiām-tiām ê ke-hāng Chi̍t ê lō͘-thâu Chi̍t-pha lō͘-teng |
阮鄉ê暗暝 月娘清清 恬恬ê街巷 一ê路頭 一pha路燈 |
|
Thiⁿ-chhiⁿ chò-phōaⁿ Goe̍h-niû sio-khòaⁿ Tiām-tiām ê lō͘-teng kha Chho͘-it kàu chho͘-saⁿ Chho͘-saⁿ kàu ko-saⁿ Ka-kī chi̍t-ê Chit-thâu kiâⁿ kàu hit-thâu Hit-thâu kiâⁿ kàu chit-thâu |
天星做伴 月娘相看 恬恬ê路燈腳 初一到初三 初三到高三 家己一個 這頭行kàu hit頭 Hit頭行到這頭 |
|
Lō͘-teng chiò góa Lō͘-teng chiò chheh Khòaⁿ chi̍t kù Pōe chi̍t tōaⁿ Chit-thâu kiâⁿ kàu hit-thâu Hit-thâu kiâⁿ kàu chit-thâu Chheh chi̍t-pún ōaⁿ chi̍t-pún Chhù-lāi kiâⁿ kàu chhù-gōa |
路燈照我 路燈照冊 看一句 背一段 這頭行到 hit頭 Hit頭行到這頭 冊一本換一本 厝內行到厝外 |
|
Tī a-pa hioh-khùn ê sî Tī a-bó khoán-tang khoán-sai ê sî Chhù-piⁿ thâu-bóe lóng leh khùn ê sî Thiⁿ-chhiⁿ chò-phōaⁿ Goe̍h-niû sio-khòaⁿ Chit-thâu kiâⁿ kàu hit-thâu Hit-thâu kiâⁿ kàu chit-thâu |
Tī阿爸歇睏ê時 Tī阿母款東款西ê時 厝邊頭尾攏leh睏ê時 天星做伴 月娘相看 這頭行到hit頭 Hit頭行到這頭 |
|
Lō͘-teng chiò góa Lō͘-teng chiò chheh Tī goán-hiong tiām-tiām ê àm-mî |
路燈照我 路燈照冊 Tī阮鄉恬恬ê暗暝 |
