Ko͘-toaⁿ
|
孤單--鹽鄉情 |
|---|---|
| Ông Chong-kia̍t | 王宗傑 |
|
Ko͘-toaⁿ sī goe̍h-niû Chiò tī ko͘-toaⁿ ê siâⁿ Siâⁿ-lāi ko͘-toaⁿ ê ông Tiām-chēng ê lō͘ siōng |
孤單是月娘 照tī孤單ê城 城內孤單ê王 恬靜ê路上 |
|
Ko͘-toaⁿ ê siâⁿ Ko͘-toaⁿ ê ông Bô chiòng bô peng Chhian-nî bān-nî kòe--khì Iû-goân sī Bóng-bóng ê chhian-nî bāng-nî |
孤單ê城 孤單ê王 無將無兵 千年萬年過去 猶原是 莽莽ê千萬年 |
|
Ko͘-toaⁿ ê ông Kiâⁿ ko͘-toaⁿ ê lō͘ Ko͘ -toaⁿ ê lō͘ siōng Khòaⁿ bô lâng-iáⁿ Thiaⁿ bô lâng-siaⁿ |
孤單ê王 行孤單ê路 孤單ê路上 無看人影 無聽人聲 |
|
Khin-khin ê hong Chhiⁿ-chhiⁿ ê chhiū-châng Hoe..khui hoe..siā Chiáu-siaⁿ phōaⁿ tio̍h bîn-bāng |
輕輕ê風 青青ê樹欉 花開花謝 鳥聲伴著眠夢 |
|
Ko͘-toaⁿ ê ông Khòaⁿ chhian bān nî ê chheh lāi-té Thóng-tī-chiá ì-ài ê sèng-jîn Lūn chhian-nî bān-nî ê chèng-tī Thiaⁿ chhian-nî bān-nî ê hong-hō͘ Kóng chhian-nî bān-nî ê khó-chhì Khòaⁿ chhian-nî bān-nî ê kho-ki Siá chhian-nî bān-nî ê sú-phiⁿ Gîm-chhiòⁿ chhian-nî bān-nî ê si |
孤單ê王 看千萬年ê冊內底 統治者意愛ê聖人 論千年萬年ê政治 聽千年萬年ê風雨 講千年萬年ê考試 看千年萬年ê科技 寫千年萬年ê史篇 吟唱千年萬年ê詩 |
|
Ko͘-toaⁿ ê ông Tī ko͘-toaⁿ ê siâⁿ lāi Khòaⁿ chhian-nî ê kho-kí Khòaⁿ lâng leh chò hông-tè Saⁿ-cha̍p-la̍k-kiong chhit-cha̍p-jī-īⁿ Sèng-jîn siu-sin ióng-sèng ê tō-lí Khòaⁿ jîn-kan ê kian-chhî Sam-chhùn-kim-liân ê bí-jîn Chi̍t-phō chiū-sī chi̍t-chheng-nî |
孤單ê王 Tī孤單ê城內 看千年ê科舉 看人leh作皇帝 三十六宮七十二院 聖人修身養性ê道理 看人間ê堅持 三吋金蓮ê美人 一抱就是一千年 |
|
Ko͘-toaⁿ ê ông Bô ông-hui bô thài-kàm Bô lô͘-châi bô sèng-chí Bô chiòng bô peng bô bú-khì Bô lâng hiòng i hoah kóng Ngó͘-hông bān-sòe bān-bān-sòe Chí-ū léng-léng ê hong Chhoe bô chhiôⁿ bô piah ê siâⁿ Chhe-léng ê ko͘-goe̍h Chiò bô kang-san ê thó͘ -tē |
孤單ê王 無王妃 無太監 無奴才 無聖旨 無將無兵無武器 無人向伊喝講 吾皇萬歲萬萬歲 只有冷冷ê風 吹無牆無壁ê城 淒冷ê孤月 照無江山ê土地 |
|
Ko͘-toaⁿ ê ông Koân-koân ê soaⁿ Khòaⁿ koân-koân ê hûn Chi̍t-lúi chi̍t-lúi Poe hiòng chhian-bān-nî ê kò͘-hiong |
孤單ê王 懸懸ê山 看懸懸ê雲 一蕊一蕊 飛向千萬年ê故鄉 |
