Khai-san-lō͘ Chhéng-á-kha
|
開山路松仔腳--鹽鄉情 |
|---|---|
| Ông Chong-kia̍t | 王宗傑 |
|
Pêng-iú Lí nā àn Khai-san-lō͘ kiâⁿ--kòe Chhêng-á-kha Chhiū-ńg chōe Hong liâng-liâng Sió-chē--chi̍t-ê Góa chiok hoaⁿ-hí |
朋友 你若按開山路行過 松仔腳 樹蔭濟 風涼涼 小坐一下 我足歡喜 |
|
Kūn-ông chò chhù-piⁿ Tiàm-thâu sui-jiân ū khah-sè Phòa-toh-á chi̍t-tè Chhâ-í-á nn̄g-saⁿ liâu Í-thâu-á saⁿ-sì chiah Bô-hiâm só͘-chāi e̍h Chhiáⁿ lí sió-chē--chi̍t-ê Khai-káng phàu-tê Kóng-thiⁿ ōe-tē |
郡王作厝邊 店頭雖然有較細 破桌仔 一塊 柴椅仔 二三條 椅頭仔 三四隻 無嫌所在隘 請你小坐一下 開講泡茶 講天話地 |
|
Kūn-ông chò chhù-piⁿ Beh thiaⁿ Tâi-oân ê kòe-khì Lāu sian-siⁿ chham lí Bān-bān lâi kóng-khí Chi̍t-tè chng-á chi̍t-kháu chéⁿ Chi̍t-keng biō-á chi̍t-tiâu ke Chi̍t-chō siâⁿ-mn̂g chi̍t-tó͘ piah Chhiong-boán le̍k-sú ê thó͘-tē |
郡王作厝邊 Beh聽台灣ê過去 老先生chham你 慢慢來講起 一塊磚仔 一口井 一間廟仔 一條街 一座城門 一堵壁 充滿歷史ê土地 |
|
Pêng-iú--á Han-chû chi̍t-tiâu-á-kiáⁿ Tâi-oân sī i ê miâ M̄-thang hiâm i sè Chit-tè thó͘-tē lán tio̍h-ài thiàⁿ Chi̍t-chō siâⁿ-mn̂g chi̍t-tó͘ piah Chhiong-boán le̍k-sú ê thó͘-tē |
朋友--a 蕃薯一條仔子 台灣是伊ê名 M̄-thang嫌伊細 這塊土地咱著愛疼 子孫leh生澶 有緣來做伙拍拚 |
|
Chhiáⁿ-chē chhiáⁿ-chē Chhêng-á-kha ê só͘-chāi Bô ka-pi bô phòng-í Tùi-bīn Kim-ku-chhiū Chho͘-chho͘ ê lāu-phôe Hio̍h-á chhiⁿ-chhiⁿ-chhiⁿ Khòaⁿ--khí-lâi sèng-keh sèng-keh |
請坐 請坐 松仔腳ê所在 無咖啡 無膨椅 對面金龜樹 粗粗ê老皮 葉仔青青青 看起來性格性格 |
|
Pêng-iú--á Lâi lâi Chē--chi̍t-ê Kóng lán ài kóng ê ōe-tê Khòaⁿ lán ài khòaⁿ ê chheh Phàu lán ài phàu ê tê Siōⁿ beh lim chi̍t poe |
朋友--a 來 來 坐一下 講咱愛講ê話題 看咱愛看ê冊 泡咱愛泡ê茶 想beh lim一杯 |
|
Bô koan-hē Lí khì bé chiú Góa khoán mi̍h-phòe Chóng-phâng tùi m̄-chhut Pat-sian tàu káu-koài Tan-chhau tùi nn̄g-ê siong-hó--ê Kiâⁿ-kòe Khai-san-lō͘ |
無關係 你去買酒 我款物配 總捧對m̄出 八仙鬥九怪 單操對二個相好ê 行過開山路 |
|
Nā bô khì-hiâm Chhêng-á-kha Chhiū-ńg chōe Hong liâng-liâng Sió-chē--chi̍t-ê Khòaⁿ lán ài khòaⁿ ê chheh Phàu lán ài phàu ê tê |
若無棄嫌 松仔腳 樹蔭濟 風涼涼 小坐一下 看咱愛看ê冊 泡咱愛泡ê茶 |
