Ha̍k-hāu-piⁿ ê KTV
|
學校邊ê KTV--鹽鄉情 |
|---|---|
| Ông Chong-kia̍t | 王宗傑 |
|
Ha̍k-hāu-piⁿ ê KTV It-ti̍t leh ōaⁿ-miâ “Lâi-tiān” “Iû-ka-lī” Piàn-chò “kim-ka-lī” Si̍t-chāi sông kah beh sí |
學校邊ê KTV 一直leh換名 「來電」「油加莉」 變作「金加莉」 實在sông kah beh死 |
|
Ha̍k-hāu-piⁿ ê KTV Kū-nî hóe-sio kòe saⁿ-piàn Iû-goân sio bōe sí Tō-hēng lú ko-chhim Khan-páng piàⁿ-chò saⁿ-ūi-it-thé Tōa-tōa jī ê kóng-kò |
學校邊ê KTV 舊年火燒過三遍 猶原燒bōe死 道行愈高深 看板變作三位一體 大大字ê廣告 |
|
Phōaⁿ-chhiòⁿ ū “séng-kàn-lá-mé” Lú-jîn hoe Sù-kùi-hông Sè-gōa-thô-goân Miâ-jī lām-lām chò chi̍t-tui Hō͘ lâng khòaⁿ kah ba̍k-chiu hoe |
伴唱有「性感辣妹」 女人花 四季紅 世外桃源 名字lām-lām作一堆 Hō͘人看kah目珠花 |
|
Lí kóng i song kah beh sí Phian-phian seng-lí it-ti̍t chò--lo̍h-khì Pòaⁿ-mî nn̄g saⁿ tiám Iáu-ū eng-hiông hó-hàn chi̍t-tui Tī lāi-té leh tōa-siaⁿ kaiⁿ Kaiⁿ kah m̄-kam lī-khui |
你講伊sông kah beh死 偏偏生理一直作落去 半暝二三點 猶有英雄好漢一推 Tī內底leh大聲kaiⁿ Kaiⁿ kah m̄甘離開 |
|
Lí-tióⁿ-peh--á Kóng i tē-ūi sioⁿ sió Bô lêng-le̍k kiám-kí Būn-chèng eng-hiông-táⁿ ê gī-oân Tòng-soán liáu-āu m̄-chai cháu khì tó-ūi Chèng-gī tàu-sū ê tōa-phàu Kóng jîn-bîn nā m̄ kiaⁿ-sí I chiah ū hoat-tō͘ chhù-lí |
里長伯--a 講伊地位sioⁿ小 無能力檢舉 問政英雄膽ê議員 當選了m̄知走去tó位 正義鬥士ê大砲 講人民若m̄驚死 伊才有法度處理 |
|
Ū lâng kóng KTV lú-chōe Tāi-piáu Tâi-oân keng-chè khí-poe Siau-hùi-phín chìn-ji̍p sin sî-tāi Kong-chú “lá-mé” Ta̍k-ke nā ū-chîⁿ Lóng ē-sái bé lâi khai |
有人講KTV愈濟 代表台灣經濟起飛 消費品進入新時代 公主、「辣妹」 逐家若有錢 攏會使買來開 |
|
Ū lâng kóng Lí mài tōa-kiaⁿ-sió-koài Ha̍k-hāu-piⁿ ê KTV |
有人講 你莫大驚小怪 |
|
Chham lí ū siáⁿ-tāi Àm-sî chò seng-lí Tùi ha̍k-hāu bô hông-hāi |
學校邊ê KTV Chham你有啥代 暗時做生理 對學校無妨害 |
|
Ha̍k-hāu-piⁿ ū KTV M̄-chai tang-sî beh koh hóe-sio Ji̍t-sî ê kàu-sek lāi Gín-á chiàu-siông tha̍k-chheh Àm-sî nā kàu Lú ha̍k-seng pìⁿ kong-chú Táⁿ-pān iau-kiau hó chē-tâi Thé-hōe lán siā-hōe ê jîn-ài |
學校邊有KTV M̄知當時beh koh火燒 日時ê教室內 囡仔照常讀冊 暗頭若到 女學生變公主 打扮妖嬌好坐台 體驗咱社會ê仁愛 |
|
Ha̍k-hāu-piⁿ ê KTV M̄-chai tang-sî beh koh hóe-sio Ji̍t-sî ê kàu-sek lāi Gín-á leh siōng-khò Hāu-tióⁿ kàu-su Tōa-siaⁿ tōa-siaⁿ Chiàu-siông leh kóng Sèⁿ-miā ê chun-giâm hâm sîn-sèng |
學校邊ê KTV M̄知當時beh koh火燒 日時ê教室內 囡仔leh上課 校長教師 大聲大聲 照常leh講 生命ê尊嚴和神聖 |
|
Bí-kok ê Boston Ji̍t-pún ê Kiaⁿ-to͘ Phok-sū chhī-tióⁿ khì khó-chhat Ha̍k-chiá gē-su̍t-ka Chhá kah chiok lāu-jia̍t Kóng beh kiàn-li̍p Kàu-io̍k ê mô͘-hoān to͘-chhī Kóng beh khí-chō bûn-hòa ê siâⁿ |
美國ê波士頓 日本ê京都 博士市長去考察 學者 藝術家 炒kah足鬧熱 講beh建立 教育ê模範都市 講beh起造文化ê城 |
|
Ha̍k-hāu-piⁿ ê KTV M̄-chai tang-sî beh koh hóe-sio Tōa-koaⁿ gī-oân li̍p-úi M̄-chai tang-sî beh koh Be̍h koh lâu ba̍k-sái Chiōⁿ tiān-sī Kóng in ê lí-sióng Piáu-ián in ê chû-pi |
學校邊ê KTV M̄知冬時beh koh火燒 大官議員立委 M̄知當時 Beh koh流目屎 上電視 講in ê理想 表演in ê慈悲 |
