San-pan-hî
|
San-pan魚 |
| Lîm Hō͘-chō͘ |
林互助 |
|
Sè-hàn ê sî, goán tau thâu-chêng hit-tiâu khe--ni̍h, lóng sī san-pan-hî teh siû. San-pan-hî sèⁿ-miā-la̍t chiâⁿ kiông, iū-koh kiò-chò “sio-phah hî-á”.
|
細漢ê時, goán tau頭前hit條溪--ni̍h, lóng是san-pan魚teh siû(泅). San-pan魚性命力chiâⁿ強, 又koh叫做「相phah魚á」. |
|
M̄-koh, chit-má tī goán tau thâu-chêng ê khe-á-té, sī án-chóaⁿ lóng khòaⁿ bē tio̍h san-pan-hî--a-leh?
|
M̄-koh, chit-má tī goán tau頭前ê溪á底, 是án-chóaⁿ lóng看bē著san-pan魚--a-leh? |
|
Góa siūⁿ, khoân-kéng phò-hoāi sī siōng tōa ê goân-in.
|
我想, 環境破壞是上大ê原因. |
|
Lán nā beh kiám-thó Tâi-oân ê khoân-kéng būn-tê, ū-iáⁿ sī kiám-thó bē liáu. soaⁿ-pho-tē loān khai-hoat, hō͘ hō͘-chúi kā soaⁿ-téng ê lok-kô͘-á-môe lóng lâu lo̍h-lâi khe-té, hāi hî-á bô hoat-tō͘ kè-sio̍k seng-chûn--lo̍h-khì; koh ū chi̍t-hāng, tō-sī choh-sit-lâng loān iōng lông-io̍h, chō-chiâⁿ khe--ni̍h ê san-pan-hî giōng beh tn̄g-chéng.
|
Lán若beh檢討台灣ê環境問題, 有影是檢討bē了. 山坡地亂開發, hō͘雨水kā山頂ê lok-kô͘-á-môe lóng流落來溪底, 害魚á無法tō͘繼續生存--落-去; koh有1項, 就是作sit人亂用農藥, 造chiâⁿ溪--ni̍h ê san-pan魚giōng beh斷種. |
|
San-pan-hî sui-jiân chiâⁿ sè-bóe, m̄-koh kong-kek-la̍t chiâⁿ tōa, koh khah tōa-bóe ê hî-á mā chi̍h-chat bē tiâu. Chhiūⁿ kóng chháu-hî-á, tōa-thâu-liân ah-sī tai-á, lóng sī san-pan-hî kong-kek ê bo̍k-phiau. Ba̍k-chiu sī hî-á siōng jio̍k ê só͘-chāi, san-pan-hî lóng iōng siōng kín ê sok-tō͘ kong-kek tōa-bóe hî-á ê ba̍k-chiu, soah hāi tōa-bóe hî-á khòaⁿ-tio̍h san-pan-hî tō seng chhoah leh tán, kín siám--khui niū hō͘ i kòe.
|
San-pan魚雖然chiâⁿ細尾, m̄-koh攻擊力chiâⁿ大, koh khah大尾ê魚á mā chi̍h-chat bē tiâu. 像講草魚á, 大頭鰱ah是tai-á(鯉魚), lóng是san-pan魚攻擊ê目標. 目chiu是魚á上弱ê所在, san-pan魚lóng用上緊ê速度攻擊大尾魚á ê目chiu, soah害大尾魚á看著san-pan魚就先chhoah leh等, 緊閃--開niū hō͘ i過. |
|
Khó-sioh, lán ê khoân-kéng pāi-hāi kah siuⁿ giâm-tiōng, chit-má siūⁿ beh tī khe-té khòaⁿ-tio̍h san-pan-hî, í-keng chin oh--a!
|
可惜, lán ê環境敗害kah siuⁿ嚴重, chit-má想beh tī溪底看著san-pan魚, 已經真oh--a! |
|
(TGB Thong-sìn tē 19 kî, 2001 nî 4 goe̍h)
|
(TGB通訊第19期，2001年4月) |
