Ī--ā
|
Ī--ā |
| Lah-ji̍h |
Lah-ji̍h |
|
“Ī--ā” chit-ê miâ-sû, m̄-sī beh hō͘ góa kiò--ê, sī kan-nā beh hō͘ góa chheng-ho͘, hō͘ góa siàu-liām--ê, tī góa kì-tì lāi-té, chiông-lâi tiō m̄-bat tng-bīn kiò i 1 siaⁿ “Ī--ā”. In-ūi Ī--ā i ūn-khì bái, put-hēng goe̍h-lāi-hong soah lâi kòe-sin, mā chhōa cháu tâⁿ chhut-sì bô gōa-kú ê sió-moāi, pàng-sak góa chit-ê khó͘-miā ê pháiⁿ-miā ban-á-kiáⁿ. Hit-nî góa 5 hòe, to iáu-bōe 4 chiok-hòe--leh, thiaⁿ kóng Ī--ā mā-chiah 40 thóng hòe--niâ .
|
「Ī--ā」這個名詞，m̄是beh hō͘我叫--ê,是kan-nā beh hō͘我稱呼，hō͘我數念--ê。Tī我記智內底，從來就m̄-bat當面叫伊一聲「Ī--ā」。因為Ī--ā伊運氣bái,不幸月內風煞來過身，mā chhōa走tâⁿ出世無偌久ê小妹，放sak我這個苦命ê歹命屘仔子。Hit年我5歲，都iáu未4足歲--leh。聽講Ī--ā mā-chiah 40 thóng歲--niâ。 |
|
Ūi-tio̍h beh kā Ī--ā ê hàn-chháu, bīn-bō͘, khǹg-tiàm kì-tì lāi-té, thang hó sî-sî siàu-liām, tiō khai-sí sì-kè péng toh-kūi-á, hian chhù-lāi ê hō͘-kháu-miâ-phō͘, sin-hūn-chèng, A-hiaⁿ tha̍k-kòe ê chheh, sûi-jiân bô gōa-chē mi̍h thang péng, iû-goân chhiau kúi nā piàn, lóng chhōe bô Ī--ā ê siòng-phìⁿ, mā bô Ī--ā ê kè-chng, a̍h-sī hoe-hún hit-lūi ê cha-bó͘-lâng mi̍h-kiāⁿ.
|
為著beh kā Ī--ā ê hàn-chháu、面貌，囥tiàm記智內底，thang好時時數念，就開始四界péng桌櫃仔，掀厝內ê戶口名簿、身份證、阿兄讀過ê冊。雖然無偌濟物thang péng,猶原chhiau幾若遍，攏chhōe無Ī--ā ê相片，mā無Ī--ā ê嫁妝，抑是花粉hit類ê查某人物件。 |
|
Bô siòng thang khòaⁿ, iōng mn̄g--ê, mn̄g A-pa, mn̄g A-hiaⁿ, mn̄g A-peh A-ḿ, mn̄g chhù-piⁿ keh-piah, tit-tio̍h ê kiat-lūn sī: seⁿ-chò lò-lò, hàn-chháu bē-bái, kha-chhiú liú-lia̍h, hó chò-hóe, ài pang-chān--lâng.... sêng chiâ ? Che sī góa siōng-beh chai-iáⁿ--ê: sêng jī-hiaⁿ, lâng lò-lò ; sêng lín jī-ché--lah, bīn-á îⁿ-îⁿ ; kan-ná sêng lín A-kū, ba̍k-chiu chhim-o chhim-o ; siōng-kài-sêng lín kè hái-kháu hit-ê A-î..... A-î leh A-î leh, “Sí lāu-bú, lō͘-thâu tn̄g”, hn̄g tī hái-kháu, iā m̄-bat lâi-khì. thâu-khak-lāi iû-goân bô hêng-iáⁿ, kì-tì ê chhng-khò͘, Ī--ā ê hit-keh ūi-tì, iû-goân sī khang-pe̍h, bāng-tiong ê bó-chhin, sī bông-bông chi̍t-phiàn, chí ū lêng-hûn tòe sin-piⁿ.
|
無相thang看，用問--ê。問阿爸，問阿兄，問阿伯阿姆，問厝邊隔壁。得著ê結論是：生做lò-lò,hàn-chháu bē-bái,腳手liú掠，好做伙，ài幫贊--人....Sêng chiâ ？Che是我上beh知影--ê。Sêng二兄，人lò-lò;sêng lín二姐--lah，面仔圓圓；kán-ná sêng lín阿舅，目珠深o深o;上kài sêng lín嫁海口hit個阿姨...阿姨--leh，阿姨--leh？「死老母，路頭斷」，遠tī海口，也m̄-bat來去。頭殼內猶原無形影，記智ê倉庫，Ī--ā ê hit格位置，猶原是空白。夢中ê母親，是茫茫一片，只有靈魂tòe身邊。 |
|
Ī--ā phái-miā, sè-hàn tiō hō͘ A-má phō lâi io, phiau-chún ê sim-pū-á miā, sûi-jiân bô-lâng ge̍k-thāi--i, chóng--sī bô-thang hióng-siū chò lâng cha-bó͘-kiáⁿ ê chū-iû, lâng kóng “Kam-goān chò sàn-hiong-lâng ê cha-bó͘-kiáⁿ, m̄-chò hó-gia̍h-lâng sim-pū”, hô-hóng Lán Siau--ka kāng-khoán sī sàn-phí-phí ê chng-kha-lâng.
|
Ī--ā歹命，細漢就hō͘阿媽抱來io,標準ê新婦仔命。雖然無人虐待--伊，總--是無thang享受做人查某子ê自由。人講「甘願做散hiong人ê查某子，m̄做好額人新婦」，何況咱蕭--家共款是散phí-phí ê庄腳人。 |
|
Ī--ā tī-sî kap A-pa kat-pâng sak-chò-tui, góa m̄-chai-iáⁿ, 40 thóng hòe ê jîn-seng, seⁿ la̍k-ê hāu-seⁿ, saⁿ-ê cha-bó͘-kiáⁿ, phah-sńg N̄g-ê, chhun--ê gō͘-ê hāu-seⁿ, N̄g-ê cha-bó͘-kiáⁿ lóng ū hó ke-kà, kiàn-li̍p bí-móa ka-têng, sûi-jiân m̄-sī tōa-hù tōa-kùi, chóng--sī láu-si̍t phah-piàⁿ kòe-ji̍t, m̄-bat chò pháiⁿ tāi-chì, sǹg sī ū hó ûi-thoân, bô pāi-hāi tio̍h pē-bó ê miâ-siaⁿ, Ī--ā ê it-seng, si̍t-chāi bô óng-hùi i lâi sè-kan kiâⁿ chit-choa̍h.
|
Ī--ā tī時kap阿爸結房sak做堆，我m̄知影。40 thóng歲ê人生，生6個後生，3個查某子，扑損兩個。Chhun--ê 5個後生，2個查某子攏有好家稼，建立美滿家庭，雖然m̄是大富大貴，總--是老實扑拚過日，m̄-bat做歹代誌，算是有好遺傳，無敗害著父母ê名聲。Ī--ā ê一生，實在無枉費伊來世間行這choa̍h。 |
|
Ī--ā ! Lí tī toh-ūi ? kám bē su-liām lí ê ban-á-kiáⁿ, i í-keng 60 hòe, ji̍t-ji̍t siūⁿ beh kap lí siong-hōe, ǹg-bāng Ī--ā lí lâi thok-bāng, a̍h-sī tán-thāi lí ê ban-á-kiáⁿ, sè-kan chek-jīm oân-móa, chiah lâi sio-chhōe.
|
Ī--ā!你tī toh位？Kám bē思念你ê屘仔子，伊已經60歲，日日想beh kap你相會，向望Ī--ā你來託夢，抑是等待你ê屘仔子，世間責任完滿，才來相chhōe。 |
