Tang-pak-hong chhoe-kòe ê Hoa-liân
|
東北風吹過ê花蓮 |
| Tōa-thâu-liân |
王寶漣 |
|
Tang-pak-hong chhoe--kòe ê Hoa-liân, léng-ki-ki, tâm-lok-lok.
|
東北風吹過ê花蓮, 冷ki-ki, tâm-lok-lok. |
|
Tī siā-pān lāi-té, Tâi-gí lāu-koa khoaⁿ-khoaⁿ-á chhiùⁿ--chhut-lâi, góa ti̍h khòaⁿ Sam-kiap lāu-ke ê kì-lo̍k-phìⁿ, tī hit-ê pi-khó͘ ê sî-tāi, in kám ē-tàng án-ne sù-sì teh hiáng-siū?
|
Tī社辦內底, 台語老歌khoaⁿ-khoaⁿ-á唱--出-來, góa ti̍h看三峽老街ê記錄片, tī hit-ê悲苦ê時代, in kám會tàng án-ne舒適teh享受? |
|
Siūⁿ-tio̍h chhù--ni̍h ê a-pà a-bú. Ē-po͘ 3-tiám, a-pà m̄-sī koh tī kang-tiûⁿ siōng-pan, tō sī tī hn̂g--ni̍h choh-sit, a-bú khó-lêng ti̍h ka kiat-á, 4-tiám i tō koh ài khì hn̂g piⁿ--á ê gû-liâu-á siōng-pan.
|
想tio̍h厝--ni̍h ê a爸a母. Ē-po͘ 3-tiám, a爸m̄是koh tī工場上班, 就是tī園--ni̍h choh-sit, a母可能ti̍h剪桔á, 4-tiám i就koh ài去園邊--á ê牛寮á上班. |
|
Ta̍k-kài tńg khì chhù--ni̍h, a-pà tō ē kā goa“p‧2-ko”3 chhù--ni̍h ê tāi-chì----hn̂g ê kiat-á kap lāu-hoe seⁿ kah án-chóaⁿ; chit-má chhái-siu ê chêng-hêng kap kè-siàu; a-bú ê sin-thé chōng-hóng; sió-tī ê tha̍k-chheh-tāi; chng-á-lāi hoat-seng ê tāi-chì......
|
Ta̍k-kài tńg去厝--ni̍h, a爸就會kā góao報告ō厝--ni̍h ê tāi-chì──園ê桔á kap荖花生kah án-chóaⁿ; chit-má採收ê情形kap價數; a母ê身體狀況; 小弟ê讀冊tāi; 庄á內發生ê tāi-chì…... |
|
I mā ē mn̄g góa kám koh ū chîⁿ? Kiò góa aÌ hó-hó-á tha̍k-chheh. Chit-ê sî-chūn, góa ē kā i kóng 1-kóa tī Hoa-liân ê chhiò-khoe tāi-chì, án-ne i tō ē khah hòng-sim--a.
|
I mā會問góa kám koh有錢? 叫góa ài好好á讀冊. 這個時chūn, góa會kā i講 1-kóa tī花蓮ê笑詼tāi-chì, án-ne i就會khah放心--a. |
|
Kî-si̍t, góa m̄-káⁿ kā ka-tī chin-chiàⁿ ê chêng-hêng kóng hō͘ i chai, góa m̄-bat kā kóng-kòe beh chò ūn-tōng chit-hong-bīn ê tāi-chì.
|
其實, góa m̄敢kā ka-tī真正ê情形講hō͘ i知, góa m̄-bat kā講過beh做運動這方面ê tāi-chì. |
|
A-pà i chóng--sī ǹg-bāng goán pêng-an bô tāi-chì, maÌ jiá siáⁿ-mi̍h hong-pho, kā chheh tha̍k hō͘ hó tō hó--a, āu-pàiⁿ khòaⁿ ē-sái thàn kóa chîⁿ, mài koh kòe kah chiah kan-khó͘. M̄ chai-iáⁿ kan-khó͘-lâng ê ka-têng kám lóng sī án-ne?
|
A爸 i總--是ǹg望goán平安bô tāi-chì, mài惹siáⁿ-mi̍h風波, kā冊讀hō͘好就好--a, 後pàiⁿ看會sái thàn(賺)kóa錢, mài koh過kah chiah kan苦. M̄知影kan苦人ê家庭kám lóng是án-ne? |
|
Góa beh chò ūn-tōng ê 1-ê siōng ki-pún ê lí-iû, tō sī boài koh hō͘ chhù--ni̍h ê lâng kòe kah hiah kan-khó͘, m̄-bián hoân-ló seng-oa̍h-hùi, kàu-io̍k-hùi, tī hit-ê sin ê siā-hōe lāi-té, bô hó-gia̍h kap sàn-chhiah ê chha-pia̍t, ta̍k-ke lóng sī pêng-téng--ê, bô put-kong, bô put-gī.
|
Góa beh做運動ê 1個上基本ê理由, 就是boài koh hō͘厝--ni̍h ê人過kah hiah kan苦, m̄免煩惱生活費, 教育費, tī hit個新ê社會內底, bô好額kap 散赤ê差別, 大家lóng是平等--ê, bô不公, bô不義. |
|
(TGB Thong-sìn tē 7 kî, 2000 nî 4 goe̍h)
|
(TGB通訊第7期，2000年4月) |
