Khuh-loh
|
Khuh-loh |
| Tōa-thâu-liân |
王寶漣 |
|
Goán tau khah chá ū 1-chiah káu-á kiò chò Khuh-loh, I sī tī goán tau seng-oa̍h siōng kú ê káu-á.
|
Goán tau khah早有1隻狗á叫做Khuh-loh, i是tī goán tau生活上久ê狗á. |
|
Chha-put-to tī góa kok-hāu-á 3.4 nî ê sî-chūn, goán a-peh chái-khí khì cháu-kiāⁿ, Khuh-loh tō tòe tī a-peh āu-piah it-ti̍t kàu chhù , kóaⁿ mā kóaⁿ bē cháu, tō án-ne, Khuh-loh tō tòa--lo̍h-lâi, m̄-chai-iáⁿ i sī án-chóaⁿ siūⁿ--ê?
|
差不多tī góa國校á 3.4 年ê時chūn, goán a伯早起去走健(慢跑), Khuh-loh tō tòe tī a伯後壁一直到厝, 趕mā趕bē走, tō án-ne, Khuh-loh tō tòa--落-來, m̄知影i是án-chóaⁿ想--ê? |
|
I chin chū-jiân tō piàn-chò chhù--ni̍h seng-oa̍h ê 1-pō͘-hūn, goán nā sī khì siōng-khò, chhit-thô, bé mi̍h-kiāⁿ......, piān nā chhut-mn̂g, i tō tòe tiâu-tiâu.
|
I chin自然tō變做厝--ni̍h生活ê 1部份, goán若是去上課, chhit-thô, 買mi̍h-kiāⁿ…, piān若出門, i tō tòe tiâu-tiâu. |
|
I tú-lâi hit-chūn, nā tòe goán chhut--khì, góa lóng ē hoân-ló i chhōe bô-lō͘ tńg--khì, ah sī kiaⁿ i tòe siuⁿ kú ē bô-la̍t, lō͘--ni̍h koh bô chúi thang lim......
|
I tú來 hit-chūn, 若tòe goán出--去, góa lóng會煩惱i chhōe無路tńg--來, ah 是驚i tòe siuⁿ久會無力, 路--ni̍h koh無水thang lim… |
|
Ē-kì--ê ū 1-pàiⁿ i tó ti̍h khùn, góa bô sè-jī tah-tio̍h i ê bóe-liu-á, i kan-taⁿ giah-thau khí--lâi, kā góa khòaⁿ khòaⁿ--ê, bô chhiūⁿ chhù--ni̍h ê tī- bóe-á, kā tah--tio̍h, soah hō͘ i kā--neh!
|
會記--ê有 1-pàiⁿ i倒 ti̍h khùn, góa無細膩踏tio̍h i ê尾溜á, i kan-taⁿ giah頭起--來, kā góa看看--ê, 無像厝--ni̍h ê 弟尾á, kā踏--tio̍h, soah hō͘ i咬--neh! |
|
Che kám ē-sái sǹg sī i tùi góa ū sìn-jīm? In-ūi tû-liáu goán a-peh, góa kap i siōng hó!
|
Che kám會sái算是i對góa有信任? 因為除了goán a伯, góa kap i上好! |
|
Bóe--á, góa tāi-ha̍k 1-nî-á ê sî, ū 1-pàiⁿ pàng-ká tńg--khì, soah bô khòaⁿ-tio̍h Khuh-loh, mn̄g a-bú chiah chai-iáⁿ i sí--a, m̄-koh góa soah bô pi-siong ê chêng-sû, góa teh siūⁿ kong, i tī lēng-gōa 1-ê sè-kài, iû-goân ē kòe kah chiok hó--ê.
|
尾--á, góa大學 1年á ê時, 有 1-pàiⁿ放假tńg--去, soah無看tio̍h Khuh-loh, 問a母chiah知影i死--a, m̄-koh góa soah無悲傷ê情緒, góa teh想kong, i tī另外 1個世界, 猶原會過kah chiok好--ê. |
|
Chit-phiⁿ beh siá hō͘ góa siōng hó ê pêng-iú----Khuh--loh.
|
這篇beh寫hō͘ góa上好ê朋友──Khuh--loh. |
|
(TGB Thong-sìn tē 8 kî, 2000 nî 5 goe̍h)
|
(TGB通訊第8期，2000年5月) |
