Góa Kiò Sím-mi̍h Miâ
|
我叫甚mi̍h名 |
| Ông Siok-chhiu |
王淑秋 |
|
E̍k
|
譯 |
|
Ū chi̍t ji̍t, chi̍t ê seng-bu̍t kàu-siū, beh kā ha̍k-seng khó-chhì. I kōaⁿ chi̍t kha chiáu-láng-á ji̍p lâi kàu-sek. Chiáu-láng-á lāi-bīn ū chi̍t chiah chiáu-á, gōa-bīn iōng chi̍t tè o͘-pò͘ khàm--leh.
|
有一日，一個生物教授，beh kā學生考試。伊kōaⁿ一腳鳥籠仔入來教室。鳥籠仔內面有一隻鳥仔，外面用一塊烏布蓋--leh。 |
|
Chit ê kàu-siū hian-khui chi̍t-sut-á o͘-pò͘, hō͘ ha̍k-seng khòaⁿ chiáu-á ê kha. Kàu-siū mn̄g ha̍k-seng kóng, "Chit chiah chiáu-á sī sím-mi̍h khoán chiáu-á, kā i ê miâ siá--chhut--lâi ".
|
這個教授掀開一屑仔烏布，hō͘學生看鳥仔ê腳。教授問學生講：「這隻鳥仔是甚mi̍h款鳥仔，kā伊ê名寫--出-來。」 |
|
Ū chi̍t ê ha̍k-seng chin siū-khì. I siūⁿ kóng kan-taⁿ khòaⁿ chiáu-á-kha, beh ná ē chai-iáⁿ sī sím-mi̍h khoán chiáu-á. Só͘-í i chiū bô ài chham-ka khó-chhì, tùi kàu-sek kiâⁿ--chhut--khì. Kàu-siū khòaⁿ--tio̍h, chiū kā kiò lâi mn̄g kóng "Lí sī án-chóaⁿ m̄-ài khó-chhì. Lí kiò sím-mi̍h miâ? "Chit ê ha̍k-seng lóng bô kóng-ōe, kan-taⁿ le̍k i ê khò͘-kha--khí--lâi hō͘ kàu-siū khòaⁿ i ê kha, kóng, " Lí khòaⁿ góa ê kha, góa kiò sím-mi̍h miâ?".
|
有一個學生真受氣。伊想講kan-taⁿ看鳥仔腳，beh那會知影是甚mi̍h款鳥仔。所以伊就無ài參加考試，tùi教室行--出-去。教授看--著，就kā叫來問講「你是án-chóaⁿ m̄-ài考試。你叫甚mi̍h名？」這個學生攏無講話，kan-taⁿ勒伊ê褲腳--起-來hō͘教授看伊ê腳，講：「你看我ê腳，我叫甚mi̍h名？」。 |
|
(Tâi-oân-jī Cha̍p-chì tē 2 kî, 2000 nî 7 ge̍h)
|
(台灣字雜誌第2期，2000年7月) |
