Soaⁿ ē háu
|
山會háu |
|---|---|
| Koa Khá-lē | 柯巧俐 |
|
Soaⁿ Ē Háu Koeh Hong-ian goân chok Siá-tī Tâi-oân 920 tōa tē-tāng liáu-āu |
山會háu 郭峰淵原作 寫tī台灣920大地動了後 |
|
Soaⁿ ē háu
|
山會哮 |
|
Che sī chi̍t ê kan-sia̍p soaⁿ ê kò͘-sū, Chi̍t ê soaⁿ-pang tē-li̍h8, Kúi-khàu sîn-háu ê kò͘-sū. |
Che是一個干涉山ê故事， 一個山崩地裂， 鬼哭神哮ê故事。 |
|
Tī Chuo-cho̍k ê sîn-ōe lāi-té: Kó͘-chá kó͘-chá í-chêng, Nivenu sîn kái-chō sè-kài, I sak-tó soaⁿ-ga̍k, thia̍p-pêⁿ soaⁿ-khàm, Soaⁿ-pang tē-li̍h8, |
Tī鄒族ê神話內底： 古早古早以前， Nivenu神改造世界， 伊sak倒山獄，疊平山khàm, 山崩地裂， |
|
Jiân-āu, I chhòng-chō chhut chi̍t tè lo̍k-thó͘, Chi̍t ê bí-lē-tó. |
然後， 伊創造出一塊樂土， 一個美麗島。 |
|
Bí-lē ê pó-tó, ū bí-lē ê sìⁿ-miā, Cháu-poe ê hoe-lo̍k, Phiau-bú ê hô͘-tia̍p, Thun-lún ê sîn-bo̍k, Ióng-kiāⁿ ê goân-chū-bîn, |
美麗ê寶島，有美麗ê生命， 走飛ê花鹿， 飄舞ê蝴蝶， 吞忍ê神木， 勇健ê原住民， |
|
Kúi chheng-nî lâi, In tī chit tè lo̍k-thó͘ téng kiōng-chûn. M̄-kú kin-á-ji̍t, Bí-lē khiok kan-taⁿ sī chi̍t ê hoàn-bāng, Thiⁿ bô koh chài chhùi-nâ, Thó͘-tē chhiong-boán ù-jiám, Khong-khì hō͘ lâng bē chhoán-khùi, Hûn-pà bô koh chài chhut-hiān tī lán ê soaⁿ-lîm, |
幾千年來， In tī這塊樂土頂共存。 M̄-kú今仔日， 美麗卻kan-taⁿ是一個幻夢， 天無koh再翠藍， 土地充滿污染， 空氣hō͘人bē喘氣， 雲豹無koh再出現tī咱ê山林， |
|
Pó-tó put-kò sī tham-hàu kòe-kheh ê thia̍p-kha..ê, Hō͘ in thâi-koah kah kui seng-khu choân siong. Chhùi-kô͘-kô͘ ê soaⁿ-hô , Chhùi-kô͘-kô͘ ê sim-tì, Chhùi-kô͘-kô͘ ê siā-hōe, |
寶島不過是tham-hàu過客ê疊腳--ê, Hō͘ in thâi割kah歸身軀全傷。 碎kô͘-kô͘ ê山河， 碎kô͘-kô͘ ê心智， 碎kô͘-kô͘ ê社會， |
|
Jiân-āu, Nivenu sîn koh chài lêng-siàⁿ, I koh chiong soaⁿ-ga̍k sak-tó, Chiong soaⁿ-khàm thia̍p-pêⁿ, Pó-tó ê soaⁿ, koh teh cháu--ah! Pó-tó ê soan, koh teh háu--ah! |
然後， Nivenu神koh再靈聖， 伊koh將山獄sak倒， 將山khàm疊平， 寶島ê山，koh teh走--ah！ 寶島ê山，koh teh哮--ah！ |
|
M̄-kú m̄-bián kiaⁿ , Soaⁿ ē háu, M̄ sī pò-ho̍k, Khiok sī Nivenu sîn ê hoah-kiò, Tāi-piáu sin sìⁿ-miā ê khai-sí, Thó͘-tē sī sìⁿ-miā ê goân-thâu , |
M̄-kú m̄免驚， 山會哮， M̄是報復， 卻是Nivenu神ê喝叫， 代表新生命ê開始。 土地是生命ê源頭， |
|
I chhin-chhiūⁿ lán ê bó-chhin, I hō͘ lán bô hān ê ài, M̄-kú mā su-iàu lán ê tùi-tiōng kap thiàⁿ-sioh, Nivenu sîn ê chí-ì, Chi̍t ê sin-siⁿ ê pó-tó, |
伊親像咱ê母親， 伊hō͘咱無限ê愛， M̄-kú mā需要咱ê tùi重kap疼惜， Nivenu神ê旨意， 一個新生ê寶島， |
|
M̄-nā sī bí-bāng, Koh sī jîn-lūi ài-sim, ióng-khì, kap tì-hūi ê kiat-chiⁿ. Sī--ah, Tī hòe-hi--n̍i̍h chò-hóe thî-khàu, Lán chhōe tio̍h koan-hoâi, le̍k-liōng , kap ǹg-bāng, |
M̄若是美夢， Koh是人類愛心、勇氣、 kap智慧ê結晶。 是--ah， Tī廢墟--nh8做伙啼哭， 咱chhōe著關懷、力量、 kap向望， |
|
Sìⁿ-miā ê bí-lē, Goân-lâi m̄ sī tī ta̍k sìⁿ-miā ê chhàn-lān, Khiok sī tī chōe-chōe biáu-siáu sìⁿ-miā ê sio-kēng sio-thīn, Chū-chi̍p só͘ chiâⁿ..ê, sī gōa-á --n̍i̍h úi-tāi. |
生命ê美麗， 原來m̄是tī逐生命ê燦爛， 卻是tī濟濟渺少生命ê 相kēng相thīn, 聚集所成--ê,是外仔--n̍i̍h偉大。 |
|
Sī--ah, Ài-sim, Ióng-khì, Tì-hūi, Chiong hō͘ pó-tó têng-thâu-siⁿ, Chiong hō͘ lo̍k-thó͘ koh chi̍t pái chhiong-móa tio̍h bí-lē ê sìⁿ-miā. |
是--ah， 愛心、 勇氣、 智慧、 將hō͘寶島重頭生， 將hō͘樂土koh一擺 充滿著美麗ê生命。 |
|
(Tâi-oân-jī cha̍p-chì tē 1 kî, 2000 nî 5 ge̍h)
|
(台灣字雜誌第1期，2000年5月) |
