Mī-pau Ki-khì
|
麵包機器 |
| A-eng |
阿櫻 |
|
Jī-ché N̄g-tang chêng sàng góa chi̍t-tâi chò mī-pau ê ki-khì. I kóng sī pêng-iú te̍k-pia̍t tī Bí-kok bé tńg-lâi sàng--i..ê. Góa chiū án-ne, kā hō͘ lâng hiâm tìn-tè ê mī-pau ki-khì chiap--kòe--lâi. The̍h chhut só͘-hù ê si̍t-phó͘ khí lâi khòaⁿ, chò mī-pau ê khài-liām iah-sī bô chìn ji̍p khì góa ê thâu-khak té. Si̍t-phó͘ kóng, nā chò bōe hó-sè, chi̍t-pái kan-taⁿ ē-tit kái-piàn chi̍t-hāng in-sò͘. Nā chò ê mī-pau bô sêng-kong, in mā lia̍t-pió hō͘ lâng chai-iáⁿ án-chóaⁿ tùi gōa-piáu phoàn-toān sī tó chi̍t-ê in-sò͘ bô hó-sè, ài án-chóaⁿ tiâu-chéng chiah ē sêng-kong. Pit-kèng sī se-hong bûn-bêng ê sán-bu̍t, liân chò mī-pau mā chin ū kho-ha̍k cheng-sîn. Khòaⁿ tio̍h chiah-n̍i̍h chē ē sit-pāi ê khó-lêng, sòa hō͘ góa tiû-tû m̄-káⁿ chhì. Chit-tâi gōa-hêng ū hiān-tāi-kám, sin-tak-tak ê chò mī-pau ki-khì tio̍h án-ne hō͘ góa koaiⁿ tī a̍p-á té.
|
二姐兩冬前送我一台做麵包ê機器。伊講是朋友特別tī美國買轉來送--伊..ê。我就án-ne,kā hō͘人嫌tìn塊ê麵包機器接--過-來。提出所付ê食譜起來看，做麵包ê概念也是無進入去我ê頭殼底。食譜講：若做bōe好勢，一擺kan-taⁿ 會得改變一項因素。若做ê麵包無成功，in mā列表hō͘人知影án-chóaⁿ tùi外表判斷是tó一個因素無好勢，ài án-chóaⁿ 調整才會成功。畢竟是西方文明ê產物，連做麵包mā真有科學精神。看著chiah-n̍i̍h濟會失敗ê可能，續hō͘我躊躇m̄敢試。這台外形有現代感，新tak-tak ê做麵包機器著án-ne hō͘我關tī盒仔底。 |
|
Kin-nî hioh-joa̍h, saⁿ-ché lâi thit-thô. I sūn-sòa kà góa i tú-á o̍h ē-hiáu, chò kah jia̍t-phut-phut ê se-tiám “cheese cake” kap “jio̍k-kùi-piáⁿ”. Bô siūⁿ--tio̍h, hō͘ i chhōa chi̍t-ê sòa chhōa-chhut góa chò se-tiám ê chhù-bī. Ông-lâi-so͘, hēng-jîn po̍h-piáⁿ, le̍k-tāu-phòng, ke-N̄g-ko....., chi̍t-hāng chhì kòe chi̍t-hāng, ná chhin-chhiūⁿ chi̍t-tiâu soh-á giú bōe soah. Sui-jiân bô chhī-bīn siōng teh chò..ê hiah-n̍i̍h hó khòaⁿ-thâu, m̄-kú chin si̍t-chāi iah ka-cheng seng-oa̍h ê chhù-bī.
|
今年hioh熱，三姐來thit-thô。伊順續教我伊tú仔學會曉，做kah熱phut-phut ê西點「Cheese Cake」kap「肉桂餅」。無想--著，hō͘伊chhōa一個續chhōa出我做西點ê趣味。Ông梨酥、杏仁薄餅、綠豆phòng、雞卵糕....，一項試過一項，那親像一條索--仔giú bōe煞。雖然無市面上teh做--ê hiah-n̍i̍h好看頭，m̄-kú真實在亦加增生活ê趣味。 |
|
Chit-tiâu soh-á chit-má giú tio̍h chit-tâi chò mī-pau ê ki-khì--ah. Góa the̍h chhut keh-piah Iû-thài-thài Tâi-chè chò mī-pau ki-khì ê si̍t-phó͘ soat-bêng kap Bí-kok-pán..ê chò pí-kàu, chân-chân kā châi-liāu khǹg--lo̍h--khì. Khiàm-khoat sú-iōng ki-khì ê soat-bêng-su, bong pòaⁿ-po͘ chiah kiò-chhíⁿ chit-tâi chêng chhut-sì tio̍h khùn kàu chit-má ê ki-khì. Chiū án-ne, góa him-sióng tio̍h chi̍t-tiûⁿ te̍k-pia̍t ê thiàu-bú piáu-ián. Bú-chiá sī tàu tī ki-khì ē-bīn, chi̍t-ki chhun--chhut--lâi ê mo͘h-tà kap chi̍t-oân mī-thoân. Khí-chho͘, siaⁿ-im sè-á-siaⁿ-á, kha-pō͘ chin bān, oáiⁿ--chi̍t--ē koh tńg--chi̍t--ē.
|
這條索--仔chit-má giú著這台做麵包ê機器--ah。我提出隔壁尤太太台製做麵包機器ê食譜說明kap美國版--ê做比較，層層kā材料囥--落-去。欠缺使用機器ê說明書，摸半晡才叫醒這台前出世著睏到chit-má ê機器。就án-ne,我欣賞著一場特別ê跳舞表演。舞者是tàu tī機器下面，一支伸--出-來ê mo͘h-tà kap一丸麵糰。起初，聲音細仔聲仔，腳步真慢，oáiⁿ--一-下koh轉--一-下。 |
|
Bô kúi hun-cheng āu, kha-pō͘ thêng--leh, hut-jiân ōaⁿ chi̍t-ê tiāu, kha-pō͘ kín koh ū la̍t. Mī-thoân chin kín tio̍h hêng-sêng ah, siang-lâng teh thiàu ê bú mā lú lâi lú sim-sek, ē-tit kóng ha̍p-chok oân-bí. Chi̍t-khùn-á ná teh thiàu îⁿ-bú, it-ti̍t se̍h kho͘-lìn, chit-niá îⁿ-kûn se̍h kah phòng-phòng-phòng. Chi̍t-khùn-á kui-oân îⁿ-lín-lín, tōng-chok khiok chin liú-lia̍h, oa̍t-thâu tńg-bīn hó chhin-chhiūⁿ choan-gia̍p ê bú-chiá, hō͘ góa khòaⁿ kah bū-sà-sà. Chi̍t-sî sī chin tâi-châi ê siok-lú, ba̍k-chi̍t-n̍i̍h koh piàn-sêng chin oa̍h-kut ê gín-á, thiàu khí mo͘h tī piah-piⁿ, kan-taⁿ giú--chi̍t--ē, koh peh khí lēng-gōa chi̍t-pêng, peh koân peh kē bô sî thêng. Góa ka-kī khòaⁿ kah jím bōe tiâu, chi̍t-ê lâng chhiò hai-hai. Hiān-tāi kho-kī chin chiàⁿ ē piàn mô͘-su̍t. Kòa nā khàm tiâu--leh, siáⁿ lâng ē chai lāi-té sī teh bú chi̍t-chhut chiah-n̍i̍h súi koh ū chhòng-ì ê bú- -leh.
|
無幾分鐘後，腳步停--leh，忽然換一個調，腳步緊koh有力。麵糰真緊著形成--ah，雙人teh跳ê舞mā愈來愈心適，會得講合作完美。khùn仔那teh跳圓舞，一直se̍h kho͘-lìn,這領圓裙se̍h kah phòng-phòng-phòng。一khùn仔歸丸圓lín-lín,動作卻真liú掠，越頭轉面好親像專業ê舞者，hō͘我看kah霧煞煞。一時是真台才ê淑女，目一n̍i̍h koh變成真活骨ê囡仔，跳起mo͘h tī壁邊，kan-taⁿ giú--一-下，koh peh起另外一爿，peh懸peh低無時停。我家己看kah忍bōe tiâu,一個人笑hai-hai。現代科技真正會變魔術。蓋若khàm tiâu--leh，啥人會知內底是teh舞一齣chiah-n̍i̍h súi koh有創意ê舞-leh。 |
|
Góa chai-iáⁿ, āu-pái góa it-tēng ē hō͘ i chin chē ê ki-hōe thiàu-bú, pó͘-sióng i kòe-khì ê ut-chut. Āu-pái góa nā bô-êng thang him-sióng i thiàu-bú ê sî, kan-taⁿ thiaⁿ tio̍h siaⁿ, góa ê thâu-khak té tio̍h ē hián chhut i teh thiàu-bú sim-sek kap khoài-lo̍k ê hêng-iáⁿ.
|
我知影，後擺我一定會hō͘伊真濟ê機會跳舞，補償伊過去ê鬱卒。後擺我若無閒thang欣賞伊跳舞ê時，kan-taⁿ聽著聲，我ê頭殼底著會顯出伊teh跳舞心適kap快樂ê形影。 |
|
(Tâi-oân-jī Cha̍p-chì tē 4 kî,2000 nî 11 ge̍h)
|
(台灣字雜誌第4期，2000年11月) |
