Khó-chhì
|
考試 |
| Abon |
Abon |
|
“Chit-má khai-sí khó-chhì, toh-téng ê chheh lóng siu--khí-lâi!” Kàm-khó ê lāu-su tī tâi-á-téng án-ne kóng, “Ta̍k-ê toh-téng lóng ū 1-tiuⁿ khó-chhì-toaⁿ hām 1-tiuⁿ siá tap-àn ê khó-chhì-chóa.”
|
「Chit-ma開始考試, 桌頂e冊long收--起-來!」監考e老師t?台a頂an-ne講,「Tak-e桌頂long有1張考試單ham 1張寫答案e考試紙.」 |
|
A-bûn iōng ba̍k-bóe kā kàu-sek bi--1-liàn, ta̍k-ê lóng kā pit tēⁿ ân-ân, pit hō͘ in tēⁿ kah tī khó-chhì-chóa téng-thâu thò͘-hoeh thò͘ bē thêng.
|
A文用目尾ka教室瞇--1-lian(輪), tak-e long ka筆te°(掟)an-an(緊), 筆h3 in te° kah t?考試紙頂頭吐血吐be停. |
|
Tē-1-chiat khó sò͘-ha̍k, phó͘- thong-sî-á m̄-chai siá-kòe jōa chē liān-si̍p-tê, khòaⁿ-tio̍h tê-ba̍k tō chai-iáⁿ beh án-chóaⁿ chò, che í-keng piàn-choh 1-ê hoán-siā tōng-chok--a.
|
第1節考數學, 普通時a ?知寫過joa che練習題, 看tioh題目就知ia° beh an-choa°做, che已經變作1個反射動作--a. |
|
A-bûn thâu àⁿ--lo̍h, kā miâ siá siá-- leh, sòa--lo̍h-lâi teh khòaⁿ tê-ba̍k, kui-tiuⁿ khó-chhì-toaⁿ kā siòng--1-ē, bô 1-tê ū ìn-sióng--ê, koh kā siòng 1-piàn, mā sī bô hoat-tō͘, i it-ti̍t khòaⁿ, it-ti̍t siūⁿ, thâu-khak-lāi soah lóng bô mi̍h-kiāⁿ.
|
A文頭a°--落, ka名寫寫--leh, 續--落-來teh看題目, kui張考試單ka相--1-下, 無1題有印象--e, koh ka相1遍, ma是無法t3, i一直看, 一直想, 頭殼內soah long無m…h-kia°. |
|
I ê ba̍k-khang lú-lâi lú tōa, khòaⁿ--tio̍h-ê lóng bē-hiáu siá, kui-sian lâng bô-sîn bô-sîn chhāi tī í-á-téng, nā chhiūⁿ sī chhâ khek ê thó͘- tē-kong--leh.
|
I e目孔愈來愈大, 看--tioh-e long be-hiau寫, kui仙人無神無神chhai t?椅a頂, 若像是柴刻e土地公--leh. |
|
Joa̍h--lâng ê ji̍t-thâu phah-piàⁿ beh kā sio-hut-hut ê jia̍t-chêng hòng-sàng hō͘ choân-sè-kài, tī chia bô lâng ē kám-tōng, kan-taⁿ ē hiâm i kô-kô-tîⁿ.
|
熱--人e日頭phah拚beh ka燒hut-hut e熱情放送h3全世界, t? chia無人會感動, kan-ta°會嫌i ko-ko纏. |
|
A-bûn gāng--khì, pàng-khang-siâⁿ ê 2-lúi ba̍k-chiu khang-lo-lo, khian tháng-á lo̍h-khì phah mā phah bē-tio̍h pòaⁿ-ti̍h ba̍k-chúi iah sī ba̍k-iû.
|
A文gang--去, 放空城e 2-lui目chiu空lo-lo, khian桶a落去phah ma phah be-tioh半滴目水iah是目油. |
|
I chiàⁿ-chhiú chhoah--leh chhoah-- leh, bān-bān-á kā tèng tī toh-téng ê pit kā pak-lāi ê hoeh-chúi thò͘ tī chóa sái tín-tāng, khó-chhì-chóa phú- phú pe̍h-pe̍h, hông sái-kiâⁿ ê pit phah-piàⁿ téng-thâu, 1-jī 1-jī teh ōe, lú ōe lú kín.
|
I正手chhoah--leh chhoah--leh , 慢慢a ka釘t?桌頂e筆駛tin動, 考試紙phu-phu白白, hong駛行e筆phah拚ka腹內e血水吐t?紙頂頭, 1字1字teh畫, 愈畫愈緊. |
|
A-bûn ê ba̍k-chiu iáu-bōe ni̍h--tio̍h, khó-chhì-chóa í-keng pòaⁿ-tiuⁿ boán-boán, chiàⁿ-chhiú sái-pit ê sok-tō͘ bē-kín bē-bān, kui-keng kàu-sek lāi-tòe siá khó-chhì-chóa ê siaⁿ, tàu-tīn tī toh-téng bú kah khi̍h-khi̍h- kho̍k-kho̍k, tâi-á-téng ê kàm-khó lāu-su bô-liâu teh khòaⁿ pò-chóa, pò-chóa hian kah chin tōa-siaⁿ, m̄-koh khó-chhì ê ha̍k-seng bô lâng ū-êng chhap--i.
|
A文e目chiu iau-boe ni̍h--tioh, 考試紙已經半張滿滿, 正手駛筆e速度be緊be慢, kui間教室內底寫考試紙e聲, tau-t?n t?桌頂舞kah khi̍h-khi̍h-khok-khok, 台a頂e監考老師無聊teh看報紙,報紙hian(翻)kah chin大聲, ?-koh考試e學生無人有閒chhap--i. |
|
A-bûn sin-khu chē ti̍t-ti̍t, m̄ sī siá-jī ê chu-sè, m̄-koh chiàⁿ-chhiú it-ti̍t ti khó-chhì-chóa téng-koân teh ōe.
|
A文身軀坐直直, ?是寫字e姿勢, ?-koh正手一直ti考試紙頂高teh畫. |
|
Kui-tiuⁿ khó-chhì-toaⁿ A-bûn lóng bē-hiáu siá, thiaⁿ-tio̍h lāu-su hian pò-chóa ê siaⁿ, hīⁿ-á-phôe kiōng beh hō͘ chha̍k-phòa, ba̍k-chiu-khang siu óa--lâi, kui-phiàn pe̍h-bông-bū lāi-tóe, khòaⁿ-tio̍h 1-ê lâng chē tī tâi-á-téng, o͘-pang téng-koân siá “kin-á-ji̍t khó sò͘-ha̍k”.
|
Kui張考試單A文long be-hiau寫, 聽tioh老師hian報紙e聲, 耳a皮kiong beh h3 chhak(刺)破, 目chiu孔收oa--來, kui遍白濛霧內底, 看tioh 1個人坐t?台a頂, 烏pang (黑板)頂高寫「今a日考數學」. |
|
I m̄-chai ka-tī tú-á teh chhòng siáⁿ, kā tì pió-á ê tò-chhiú giâ-khí-lâi ba̍k- chiu thâu-chêng, chhun bô 10 hun- cheng tō beh hā-khò--a, i m̄-káⁿ koh khòaⁿ toh-téng ê khó-chhì-toaⁿ, mā bô siūⁿ beh khòaⁿ bô siá pòaⁿ-jī ê khó- chhì-chóa, sim-lāi àn-sǹg kin-nî boài koh khó--a, môa-nî chiah koh lâi, tò-chhiú kā khó-chhì-chóa chhio̍k--leh, lâng khiā--khí-lâi, kiâⁿ khì beh kau khó-chhì-chóa.
|
I ?知ka-t? tu-a teh創sia°, ka ti(戴)錶a e倒手gia起來目chiu頭前, chhun無10分鐘就beh下課--a, i ?敢koh看桌頂e考試單, ma無想beh看無寫半字e考試紙, 心內an-s￠g今年boai koh考--a, moa年(明年)chiah koh來, 倒手(左手)ka考試紙chhiok--leh, 人khia--起-來, 行去beh交考試紙. |
|
Kàm-khó ê lāu-su mn̄g: “Sî-kan iáu-bōe kàu--leh, lí boài koh kiám-cha--1-ē?”
|
監考e老師問:「時間iau-boe到--leh, li boai koh檢查--1下?」 |
|
A-bûn kā ìn 1-kù “Lóng bē-hiáu siá!” tō kiâⁿ tùi mn̂g-chhùi khì, i thâu oat-kòe bi kàu-sek lāi-tóe, kui-keng kàu-sek 40~50-ê lâng lóng chē ti̍t-ti̍t, ba̍k-chiu nā-chhiūⁿ ta-khok-khok ê kó͘-chéⁿ, chiok chhim chiok àm--ê, chiàⁿ-chhiú tī toh-á-téng it-ti̍t ōe.
|
A文ka應1句「Long be-hiau寫!」就行對門chhui去, i頭oat過瞇教室內底, kui間教室40~50個人long坐直直, 目chiu若像乾khok-khok e古井, chiok深chiok暗--e, 正手t?桌a頂一直畫. |
|
A-bûn cháu--chhut-lâi, chiàⁿ-chhiú bâ-bâ, tò-chhiú chhun khì bong, bong bô mi̍h-kiāⁿ, soah bong- tio̍h pak-tó͘- piⁿ, thâu oat--kòe, khòaⁿ-tio̍h chhiú-ńg tī hia hàiⁿ--leh hàiⁿ--leh.
|
A文走--出-來, 正手麻麻, 倒手chhun(伸)去摸, 摸無m…h-kia°, soah摸tioh腹肚邊, 頭oat--過, 看tioh手!g(袖) t? hia hai°--leh hai°--leh. |
|
Kàm-khó ê lāu-su ùi kàu-sek tòe-chhut-lâi kā hoah: “Oeh! 『同學』, lí ê chhiú bē-kì--ê the̍h--ô͘!”
|
監考e老師ui教室toe出來ka hoah:「Oeh! 『同學』, li e手be記--e thch(提)--2!」 |
|
(TGB Thong-sìn tē 9 kî, 2000 nî 6 goe̍h)
|
(TGB通訊第9期，2000年6月) |
