Chhiⁿ-mî-o̍h
|
青瞑學 |
| Kam Bo̍k-su |
甘牧師 |
|
Téng-pòaⁿ-nî ū gō͘ ê gín-ná ta̍k-ji̍t siū kà-sī. Kū-nî-bóe chi̍t-ê ha̍k-seng lio̍h- á phòa-pīⁿ tò--khì Gû-taⁿ-oan bô koh- lâi, m̄-kú tī-hia ē chò tām-po̍h lō͘-ēng, chiū-sī khì chng-n̍i̍h tha̍k Sèng-keng, kóng tō-lí, ia̍h teh kà chi̍t-ê chhiⁿ-mî hiaⁿ-tī tha̍k-chheh siá-jī.
|
頂半年有5個囡仔逐日受教示。舊年尾一個學生略仔破病tò--去牛擔灣無koh來，m̄-kú tī hia會做淡薄路用，就是去庄--n̍i̍h讀聖經，講道理，亦teh教一個青瞑兄弟讀冊寫字。 |
|
Kīn-lâi ū ke-siat chi̍t-hāng ê hoat-tō͘ lâi lī-ek chiah-ê kan-khó͘ lâng. In kan-ta bat-jī sī bô kàu-gia̍h, iàu-kín tio̍h-ū sím-mi̍h kang-gē hō͘ in thang thàn-chia̍h; nā-bô , pún-tē chhiⁿ-mî lâng chha-put-to lóng-chóng tio̍h khì chò khit-chia̍h á-sī o̍h khòaⁿ-miā.
|
近來有加設一項ê法度來利益chiah-ê 艱苦人。In kan-tabat 字是無夠額，要緊著有甚物工藝hō͘ in thang趁食；若無，本地青瞑人差不多攏總著去做乞食抑是學看命。 |
|
Hó-kai-chài ! Î sian-seⁿ-niû tùi chó͘-ke tò-tńg-lâi hián-chhut chin thé-thia̍p ê sim, chhiáⁿ chhiⁿ-mî ha̍k-seng ta̍k-ji̍t kàu Sin-lâu, m̄-nā kap in tha̍k-chheh siá jī sǹg-siàu, koh kà in chhiah ām-kún tòa. Taⁿ in í-keng se̍k-chhiú, ē khoài-khoài- o̍h chhiah pa̍t-mi̍h, chhin-chhiūⁿ bō-á, chhiú-sok, kah-á, saⁿ, boe̍h. Lūn chit-ê tāi-chì, phah-sǹg koh bô lōa-kú ū hó ê siau-sit thang pò hō͘ lín chai.
|
好佳哉！余先生娘tùi祖家tò--轉來顯出真體貼ê心，請青瞑學生逐日到新樓，m̄ -nā佮in讀冊寫字算數，koh教in刺頷頸帶。今in已經熟手，會快快學刺別物，親像帽仔、手束、裌仔、衫、襪。論這個事誌，扑算koh無偌久有好ê消息thang報hō͘ lín 知。 |
|
Kīn-ji̍t góa tùi Choân-chiu chi̍h-tio̍h Lé ko͘-niû ê phoe lio̍h-á teh kóng-khí chit-ê ì-sù. Hiān-sî hit keng ê chhiⁿ- mî-o̍h ū peh-ê ha̍k-seng; in iā teh o̍h kúi-nā hāng ê chhiú-gē,chhin-chhiūⁿ phah-bāng, so chîⁿ-kǹg, hit-hō.
|
近日我對泉州接著禮姑娘ê批略仔teh講起這個意思。現時hit間ê青瞑學有8個學生；in也teh學幾若項ê手藝，親像扑網、so 錢貫，hit號。 |
|
Goán put-chí ài hiaⁿ-tī chí-mōe ū-sî siàu-liām hiah-ê chhiⁿ-mî lâng. Tī lán tiong-kan í-keng ū jī-saⁿ-cha̍p-ê, kàu- hōe-gōa sī chám-jiân chē, in-ūi ta̍k só͘- chāi ū. Lán bô kiû Siōng-tè thè in khui chi̍t-tiâu lō͘, kiaⁿ-liáu kàu lō͘-bóe in-ê sim chin o͘-àm, kéng-gū chhi-chhám. Iâ- so͘ bô tek-khak siông-siông thèng-hāu kan-khó͘ lâng chhōe i, khah tiāⁿ-tio̍h sī i seng chhut-thâu ín-chhōa bô thang ǹg-bāng ê lâng siū an-ùi.
|
阮不止ài兄弟姊妹有時數念hiah ê青瞑人。Tī 咱中間已經有2、30個，教會外是嶄然濟，因為逐所在有。咱無求上帝替in開一條路，驚了到路尾in ê心真烏暗，境遇悽慘。耶穌無的確常常聽候艱苦人chhōe伊，較定著是伊先出頭引chhōa無thang向望ê人受安慰。 |
|
Lūn-kàu sim-lāi chhiⁿ-mî ê lâng Í-sài-a ū kóng; "Hiah-ê chhiⁿ-mî--ê, Góa tio̍h khan--i; m̄-bat lō͘, Góa tio̍h chhōa--i ; hō͘ àm chò kng, khiau chò ti̍t."
|
論到心內青瞑ê人以賽亞有講：「Hiah ê青瞑--ê,我著牽--伊；m̄-bat路，我著chhōa--伊；hō͘ 暗做光，曲做直。」 |
|
(Tâi-oân Hú-siâⁿ Kàu-hōe-pò tē 100 koàn, 1893 nî 7 ge̍h)
|
(台灣府城教會報第100卷，1893年7月) |
