Láu-si̍t ê Chúi-hīⁿ chek--á
|
老實ê水耳叔--á |
| Asia Jilimpo |
Asia Jilimpo |
|
Kiám-chhái ū lâng choan-kang chāu chok-chiá ê mâ-hoân, hiâm chit ê tê-ba̍k bô-kàu Tâi-gí kháu-gí hòa, eng-kai sī kó͘-ì iah-sī tiau-ti̍t ê Chúi-chek--á. Che ài iông-ún góa kái-soeh--1-ê, kó͘-ì, tiau-ti̍t sī tùi lōe-hâm ê lūn-tēng; láu-si̍t kan-taⁿ tùi piáu-bīn ê ìn-siōng niâ. Kóng, sī án-ni, tāi-khài iáu ū lâng sa bô siáⁿ-ū, bô iàu-kín, góa kā Chúi-hiⁿ chek--á ê tāi-chì kóng liáu, tō thang chai-iáⁿ góa kóng ê láu-si̍t kap kó͘-ì, tiau-ti̍t sī chha tī toh-ūi--a.
|
Kiám-chhái 有人專工找作者ê 麻煩，嫌這個題目無夠台語口語化，應該是kó͘ 意iah 是tiau 直ê 水耳(Chúi-hīⁿ)叔--á。Che ài 容允我解說--1 下，kó͘ 意、tiau 直是對內涵ê 論定 ，老實是kan-taⁿ 對表面ê 印象niâ。講，是án-ni，大概iáu 有人sa 無siáⁿ 有， 無要緊，我kā 水耳叔--á ê tāi-chì 講了，就thang 知影我講ê 老實kap kó͘ 意、tiau 直是差tī toh 位--a。 |
|
Chúi-hīⁿ chek--á hàn-chháu seⁿ chò sán koh é, chū sè-hàn in pē-bú tō hoân-ló i āu-pái sit-thâu bē-kham--tit, chhù--ni̍h ka-chài chhân choh chió, nā chhōa 1 ê khah giám-ngī ê bó͘, tō èng-hù ē khì--a. Tī hit ê lông-gia̍p su-iàu tōa-liōng lâng-kang lô-la̍t ê sî-tāi, cha-po͘ gín-á kàu 14, 5 hòe-á tō sǹg tōa-lâng, ài kap lâng sio pàng-phōaⁿ so chháu, pò͘ chhân, koah tiū-á. Chêng 2 hāng khang-khòe iáu bián siáⁿ khùi-la̍t, ke̍k-ke sī kha-chhiú khah sô--tām-po̍h-á niâ, bē khì hoān tio̍h lâng hiâm. Koah tiū-á tō bô kâng--a, piān nā lûn tio̍h kap i tàu 1 kâⁿ beh tā phah chhek-á ê ke-khì-tháng, pa̍t-lâng tio̍h-ài ke khah chhut-la̍t, thoa ke-khì-tháng ê sî, mā-sī lóng lēng-gōa hit ê chhut khah chē la̍t. Bóe-chhiú, chin chē lâng koah tiū-á beh cho͘ pan ê sî, lóng bô-ài hō͘ i hūn-gia̍h.
|
水耳叔--á 漢草生做sán koh 矮，自細漢in pē 母就煩惱i 後pái sit-thâu bē 堪--得，厝--ni̍h ka-chài 田作少，若娶1 個khah giám-ngī ê bó͘,就應付會去--a。Tī hit 個農業需要大量人工勞力ê 時代，cha-po͘ gín-á 到14、5 歲á 就算大人，ài kap 人相放伴so 草、播田、割稻á,前2 項khang-khòe iáu 免siáⁿ 氣力，極加是kha 手khah sô--tām-po̍h-á niâ,bē 去犯著人嫌，割稻á 就無kâng--a，便若輪著kap i tàu 1 kâⁿ beh 踏phah chhek-á ê 機器桶，別人tio̍h-ài 加khah 出力，拖機器桶ê 時，mā 是lóng 另外hit 個出khah chē 力。尾手，真chē 人割稻á beh 組班ê 時，lóng 無愛hō͘ i 份額。 |
|
Ū-iáⁿ sī “1 ki chháu 1 tiám lō͘”, chhin-chhiūⁿ Chúi-hī--á chit khoán thé-châi--ê, iû-goân ē chhōa tio̍h sù-phòe ê ke-āu. Hit sî pa̍t-chng ū 1 ê cha-bó͘ gín-á beh 20 hòe--a, iáu chò bô lâng ài, m̄-sī ū siáⁿ-mi̍h khôe-kha phòa-siùⁿ, lâng mā bô leh khiap-sì, cheng-chha thé-keh chho͘ kiam tōa-kha-pô͘, bé bô hā-su ê cha-bó͘-lâng ê thang chhēng, chāi-lâi lóng-sī chhēng cha-po͘-lâng leh chhēng ê tha-bi̍h-á. Chng-kha lâng khiàm ē choh sit ê cha-bó͘-lâng. Hàn-chháu chho͘ bô lâng ē hiâm. Hit ê ko͘-niû siōng bái-châi ê sī kóng-ōe tōa-nâ-âu-khang. Bîn-kan thoân-kóng nā chit khoán cha-bó͘ gín-á mā-sī phòa-keh, hō͘ lâng siòng kòe 5 kái, sian siòng tō bē sêng, ū lâng pò Chúi-hīⁿ--á in lāu-pē, chhím khòaⁿ--tio̍h tō kah-ì--a, nî-tiong kōaⁿ-tiāⁿ, bōe nî-bóe tō chhōa ji̍p mn̂g.
|
有影是「1 支草1 點露」，親像水耳--á 這款體材--ê,猶原會娶著sù 配ê 家後。Hit 時別庄有1 個cha-bó͘ gín-á,beh 20 歲--a iáu 做無人愛，m̄ 是有siáⁿ-mi̍h khôe-kha 破相，人mā 無leh khiap-sì,精差體格粗兼大kha pô͘,買無合軀ê cha-bó͘ 人鞋thang 穿，在來lóng 是穿cha-po͘ 人leh 穿ê tha-bi̍h-á。庄kha 人欠會作sit ê cha-bó͘ 人，漢草粗無人會嫌，hit 個姑娘上bái-châi ê 是講話大嚨喉空，民間傳講若這款cha-bó͘ gín-á mā 是破格(phòa-keh)，hō͘ 人相過5 kái,千(sian)相都bē 成，有人報水耳--á in 老pē,chhím 看--著就kah-ì--a，年中kōaⁿ-tiāⁿ，未年尾就娶入門。 |
|
Chúi-hīⁿ só--á 1 ê cha-bó͘-lâng choh-sit téng 2 ê cha-po͘-lâng. Tú kè--lâi beh chiâⁿ kò͘ goe̍h, ū hoàn-á lâi lia̍h ti, 1 chiah kui pah kin ê ti-phoe-á, pa̍k tōa-só͘ beh kng khí-lâi kòe chhìn, ti-á it-ti̍t liòng, koh háu kah ko͘N3-ko͘N3 kiò, soh-á pháiⁿ pa̍k. Chúi-hīⁿ só kiò chiòng-lâng siám, chhiú-ńg pi̍h--1-ē, hoah 1 siaⁿ ‘ha̍i̍h-sio͘h’, ka-tī kā ti-á giâ--khì-lâi, piⁿ-á ê lâng chiah kín soh-á pa̍k hó-sè. Chng-lāi lâng hán kóng Chúi-hīⁿ--á chhōa tio̍h chit ê ióng bó͘, ún-khó͘--ê. Nah chai, chit ê cha-bó͘ sui-bóng sèng-tē bô hó, tùi ang-sài koh chin un-sûn, é-á ang kóng tang tō tang, kóng 1 sī 1, bē kap i ke̍h-ko. Ū 1 pái, chiòng-lâng tī thó͘-tē-kong biō kha ê lāu chhêng-á piⁿ ōe-hó͘-lān, Ku-lí-á chhiò Chúi-hīⁿ--á bô-lō͘-iōng, kū-nî koah tiū-á giâ chhek-pau, bô 2 chōa tō nńg-kha--khì. Ōe thoân khì kàu Chúi-hīⁿ só ê hīⁿ-khang, hit chūn i tng-teh ku̍t chhài-hn̂g, ti-thâu bōe hù pàng, chông khì chhōe Ku-lí-á, ná cháu ti thâu téng-thâu tiâu ê thô͘ koh ná lak. Ku-lí-á tú tī mn̂g-kháu-tiâⁿ teh giâ chio̍h-lián, khòaⁿ tio̍h Chúi-hīⁿ só--á lâi, chhiò-chhiò mn̄g kóng: “Chúi-hīⁿ só--á, hán kiâⁿ.”
|
水耳嫂--á 1 個cha-bó͘ 人作sit 頂2 個cha-po͘ 人，tú 嫁--來beh chiâⁿ 個月，有販á 來lia̍h 豬，1 隻kui 百斤ê 豬phoe-á,縛大索beh 扛起來過秤chhìn,豬á 一直liòng,koh háu gah kòⁿ-kòⁿ 叫，索á pháiⁿ 縛。水耳嫂叫眾人閃，手ńg pi̍h--1 下，hoah 1 聲「ha̍i̍h-sio͘h」，ka-tī kā 豬á giâ--起來，邊--á ê 人chiah 緊索á 縛好勢。庄內人hán 講水耳--á 娶著這個勇bó͘,穩苦--ê,nah 知，這個cha-bó͘ 雖 bóng 性地無好，對翁婿koh 真溫純，矮á 翁講東就東，講一是一，bē kap i ke̍h-ko。有1 pái,眾人tī 土地公廟kha ê 老chhêng-á 邊ōe-hó͘-lān,Ku-lí-á 笑水耳--á 無lō͘ 用，舊年割稻á giâ chhek 包，無2 chōa 就軟kha--去。話傳去到水耳嫂ê 耳空，hit chūn i tng-teh 掘菜園，鋤頭未赴放，chông 去chhōe Ku-lí-á,ná 走鋤頭頂頭tiâu ê 塗koh ná lak。Ku-lí-á tú tī 門口庭teh giâ 石碾，看著水耳嫂--á 來，笑笑問講：「水耳嫂--á,罕行。」 |
|
Chit ê chhiah cha-bó͘ bô-ōe bô-kù, ti-thâu pàng tiāu, ko͘-chhiú kā 2 lia̍p 40 kin ê chio̍h-lián kōaⁿ koân koh tǹg lo̍h thô͘, kan-taⁿ khòaⁿ tio̍h thô͘-kha lap 1 khang, Ku-lí-á 1 ki chhùi-á khui-khui, m̄-káⁿ ke ōe, ti̍t hōe sit-lé chhē m̄-sī. Chúi-hīⁿ só--á chū-thâu kàu-bóe bô kóng gah pòaⁿ kù ōe, ti-thâu gia̍h--leh, koh tńg khì ku̍t chhài-hn̂g, chū án-ni, thong chng bô lâng káⁿ koh chhìn-chhái phì-siùⁿ Chúi-hīⁿ--á.
|
這個chhiah cha-bó͘ 無話無句，鋤頭放掉，孤手kā 2 粒40 斤ê 石碾kōaⁿ koân koh tǹg 落塗，kan-taⁿ 看著塗kha lap 1 空，Ku-lí-á 1 支嘴á 開開，m̄ 敢加話，直會失禮chhē 不是。水耳嫂--á 自頭到尾無講gah 半句話，鋤頭gia̍h--leh，koh tńg 去掘菜園，自án-ni，通庄無人敢koh chhìn-chhái phì-siùⁿ 水耳--á。 |
|
Góa tùi Chúi-hīⁿ chek--á ìn-siōng bē bái, i bat tn̄g tio̍h góa, mn̄g góa sī siáⁿ-lâng ê kiáⁿ, koh chhut 13 ka 24 sī jōa chē chit khoán ê sǹg-siàu hō͘ góa tap, nā ka liáu bô têng-tâⁿ, ē siúⁿ góa 1 lia̍p iûⁿ-thô iah-sī kam-á chò chióng-lē. Chū sè-hàn, tī chng--ni̍h góa tō hō͘ lâng o-ló kóng sī ‘khiáu gín-á’, tiāⁿ-tiaⁿ ū lâng chhut sǹg-siàu iah-sī kán-tan ê bê-chhai hō͘ góa ioh, ū-sî, góa mā ē ké ioh liáu m̄-tio̍h--khì, tùi-hong ē chin hoaⁿ-hí, khó tó chit ê hō͘ lâng chheng-ho͘ chò ‘thian-châi’ ê gín-á sī chin iāng ê tāi-chì, liáu-āu koh chhut lēng-gōa 1 tê hō͘ góa sǹg, chit pái góa tō bô sè-jī kā sǹg--chhut-lâi-á. Chúi-hīⁿ chek--á kap pa̍t-lâng kāng-khoán, nā khó tó góa 1 pòaⁿ-pái-á tō ē sì-kòe khì tián hō͘ lâng chai.
|
我對水耳叔--á ê 印象bē bái,i bat tn̄g 著我，問我是siáⁿ 人ê kiáⁿ，koh 出13 加24 是jōa chē 這款ê 算數(sǹg-siàu)hō͘ 我答，若加了無têng-tâⁿ，會賞我1 粒楊桃iah 是柑á 做獎勵。自細漢，tī 庄--ni̍h 我就hō͘ 人o-ló 講是「khiáu gín-á」，tiāⁿ-tiāⁿ 有人出算數iah 是簡單ê 謎猜hō͘ 我ioh，有時，我mā 會假ioh 了m̄-tio̍h--去，對方會真歡喜，考倒這個hō͘ 人稱呼做「天才」ê gín-á 是真iāng ê tāi-chì,了後koh 出另外1 題hō͘ 我算，這pái 我就無細膩kā 算--出來a。水耳叔--á kap 別人kāng 款，若考倒我1 半pái-á 就會sì-kòe 去展hō͘ 人知。 |
|
Chúi-hīⁿ--á chhōa tio̍h hó bó͘, 3 tǹg khoán sio-sio, saⁿ-khò͘ chhēng chhio-chhio, chia̍h hó chò khin-khó, chho͘-tāng---ê lóng hō͘ in bó͘ chhiúⁿ khì chò, piàn thong chng siōng hó-miā ê cha-po͘-lâng, ū lâng kóng “Chia̍h ū 1 tǹg sio, tō ē siuⁿ-beh chhio”, 1 lia̍p hái-kat-á thâu chhoe gak kim-si̍h-si̍h, sì-kòe khì hong-so. Bô jōa kú, tō thiaⁿ-kóng kat tio̍h 1 ê hóe-kì. Chúi-hīⁿ só ū thiaⁿ tio̍h hong-siaⁿ, i iā bô-beh thiah phòa bīn, kā in ang phah chhiⁿ-kiaⁿ, kóng-sī siūⁿ-beh kā chháu-chhù hoan hiā-chhù, khiàm chîⁿ iōng, khì hak 1 tàⁿ cha̍p-hòe, kiò i taⁿ khì chng-thâu lō͘-bóe sì-kòe hoah-bē, án-ni khah bē chia̍h pá siuⁿ êng lōa-lōa sô, jiah hong-pho. Góa só͘ ē kì--tit, i bē tiám teng-hóe iōng ê hoan-á-iû, sé saⁿ ê so͘h-tah kap thn̂g-á piáⁿ-á chit khoán gín-á chhùi-chia̍h-mi̍h. Hit sî, goán chng iáu bô khan tiān-hóe, hoan-á-iû sī ke-ke-hō͘-hō͘ ji̍t-siông seng-oa̍h tiāⁿ-tio̍h ài iōng--ê; Sé saⁿ mā bô tê-kho͘, sat-bûn, sé-saⁿ-hún, ū lâng iōng ba-bui-chí sé, iōng so͘h-tah--ê khah chē.
|
水耳--á 娶著好bó͘,3 頓款燒燒，衫褲穿chhio-chhio，食好做輕khó,粗重--ê lóng hō͘ in bó͘ 搶去做，變通庄上好命ê cha-po͘ 人，有人講「食有1 頓燒，就會想beh chhio」，1 粒hái-kat-á 頭吹gah 金si̍h-si̍h，sì-kòe 去風騷，無jōa 久，就聽講kat 著1 個hóe-kì。水耳嫂有聽著風聲，i 也無beh 拆破面，kā in 翁phah 青驚，講是想beh kā 草厝翻瓦厝，欠錢用，去hak 1 擔雜貨，叫i 擔去庄頭路尾sì-kòe hoah 賣，án-ni khah bē 食飽siuⁿ êng lōa-lōa-sô,惹風波。我所會記--得，i 賣點燈火用ê 番á 油、洗衫ê so͘h-tah kap 糖á 餅á 這款gín-á 嘴食物。Hit 時，goán 庄iáu 無牽電火，番á 油是家家戶戶日常生活tiāⁿ-tio̍h ài 用--ê;洗衫mā 無茶kho͘、soat-bûn、洗衫粉，有人用ba-bui 籽洗，用so͘h-tah--ê khah chē。 |
|
Góa 4 hòe pòaⁿ beh 5 hòe hit kha-ta̍h-á, goán tau ū 1 loa̍h chhân kái chèng am-koe, tia̍h chí ê sî, ū khì lām tio̍h lâi-á-koe chí, am-koe hn̂g ū sî-á ē chhōe tio̍h lâi-á-koe, goán i--á khì khau koe-á chháu ê sî, góa hèng tòe i khì bóng sûn khòaⁿ ū lâi-á-koe thang chia̍h--bô. Góa sī tōa-sun, a-kong thiàⁿ--góa, choan-kang khì bé 1 téng pû-hia khok-á hō͘ góa tì chhut-mn̂g.
|
我4 歲半beh 5 歲hit kha-ta̍h-á,goán tau 有1 loa̍h 田改種am 瓜，糴(tia̍h)籽ê 時，有去濫著梨á 瓜籽，am 瓜園有時á 會chhōe 著梨á 瓜，goán i--á 去khau 瓜á 草ê 時，我興tòe i 去bóng 巡看有梨á 瓜thang 食--無。我是大孫，a 公惜--我，專工去買1 頂pû-hia khok-á hō͘ 我戴出門。 |
|
He sī góa thâu-pái khì kàu chhân--ni̍h, ta̍k hāng mi̍h-kiāⁿ góa lóng kám-kak chin ho͘N3-hiân, i--á piān-nā i bat ê hoe-chháu chhiū-châng, lóng ē kà hō͘ góa chai. Góa iáu ē-kì-tit thâu-pái tī chhân-thâu ê kau-á khòaⁿ tio̍h chúi-ke-á, chhiò gah poa̍h-poa̍h--tó. Chāi-lâi, góa só͘ chai ê chúi-ke lóng-sī khah tōa-chiah--ê, bô lāu-á mā tio̍h thûn-á, tōa-lâng chiah ē lia̍h tńg-lâi chú thng. Hit-chūn khòaⁿ tio̍h thnghN-thnghN-chiah-á ê chúi-ke-á-kiáⁿ, bián-kóng mā khí ài chhiò. I--á kà góa kóng: “Ū chhin-chhiūⁿ lí chiah sè hàn ê gín-á, tong-jiân tō ū sè-chiah ê chúi-ké-á-kiáⁿ.”
|
He 是我頭pái 去到田--ni̍h，ta̍k 項物件我lóng 感覺真好玄，i--á piān 若i bat ê 花草樹叢，lóng 會教hō͘ 我知，我iáu 會記得頭pái tī 田頭ê 溝á 看著水ke-á,笑gah giōng-beh 跋跋--倒。在來，我所知ê 水ke lóng 是khah 大隻--ê,無老á mā tio̍h thûn-á,大人chiah 會lia̍h tńg 來煮湯，hit chūn 看著thnghN-thnghN 隻á ê 水ke-á-kiáⁿ，免講mā 會起愛笑。I--á 教我講：「有親像你chiah 細漢ê gín-á 當然就有細隻ê 水ke-á-kiáⁿ」。 |
|
I--á teh khau chháu-á ê sî, góa tī piⁿ--á koàn tō͘-peh-á, khòaⁿ tio̍h ū thô͘-èng ê só͘-chāi, thô͘-hún-á póe khui, tō ē chhōe tio̍h 1 khang, iōng tâng-kóng-á té chúi kā koàn--lo̍h-khì, bô kài kú, chúi-bīn ē khí lêng, kóng sī tō͘-peh-á teh sé bīn--a, sûi tō khòaⁿ tio̍h 2 ki chhiu chhun--chhut-lâi, án-ni tō lia̍h--tio̍h-a. Ū-sî góa ē khì lia̍h kim-ku, tng khui ê Hoan-sé hoe sī kim-ku siōng ài hioh ê só͘-chāi. Kàu beh-tàu, góa hiâm joa̍h, chhá beh tò--khì, i--á khang-khòe chò iáu-bōe soah, m̄-kam hioh, tú-hó Chúi-hīⁿ chek--á taⁿ hòe tùi chhân-thâu-á hit-pêng kòe, i--á the̍h 1 kak-gîn chhut--lâi, kiò góa khì bé kâm-á-thn̂g chia̍h.
|
I--á teh khau 草á ê 時，我tī 邊--á 灌tō͘-peh-á,看著有塗èng ê 所在，塗粉á póe 開，就會chhōe 著1 空，用銅管(kóng)á té 水kā 灌--落去，無kài 久，水面會起漣(lêng)，講是tō͘-peh-á teh 洗面--a，隨就會看著2 支鬚伸--出來，án-ni 就lia̍h--著a。有時我會去lia̍h 金龜，tng 開ê 番sé 花是金龜上愛hioh ê 所在。到beh 晝，我嫌熱，吵beh tò--去，i--á khang-khòe 做iáu 未煞，m̄ 甘hioh，tú 好水耳叔--á擔貨tùi 田頭á hit pêng 過，i--á the̍h 1 角銀出--來，叫我去買含á 糖食。 |
|
Góa 1 kak-gîn gīm tī chhiú--ni̍h, tìm-tìm, sim-thâu chin sio-lo̍h. Hit chūn ê gín-kak-á ū 4 khoán, 1 kak--ê ū 2 chióng, âng-tâng kap khin-gîn-á chò--ê; Âng-tâng--ê khah tāng, góa chhiú the̍h ê hit ê tō-sī. 2 kak--ê mā-sī khin-gîn-á--ê, khah tōa-ê, m̄-koh bô kiat-ta̍t-kám. 5 kak--ê siōng ū gia̍h, chiàⁿ-tâng--ê, chin tāng. He sī góa chit sì lâng thâu-pái iōng chîⁿ, chin hoaⁿ-hí. Góa ná cháu ná hoah: “Chúi-h?° chek--á, kā lí bé thn̂g-á !”
|
我1 角銀gīm tī 手--ni̍h，tìm-tìm,心頭真燒lo̍h。Hit chūn ê 銀角á 有4 款，1 角--ê 有2種，紅銅kap『鎳』做--ê;紅銅--ê khah 重，我手the̍h ê hit 個就是。2 角--ê mā 是『鎳』--ê,khah 大個，m̄-koh 無價值感。5 角--ê 上有額，正銅--ê,真重。He 是我這世人頭pái 用錢，真歡喜。我ná 走ná hoah：「水耳叔--á ，kā 你買糖á!」 |
|
Chúi-hīⁿ chek pún-té bīn iu-iu, khòaⁿ tio̍h góa chiah tńg chhiò, kā góa ê 1 kak siu--khì, kiò góa ka-tī kéng 1 lia̍p thn̂g-á, koh hoan-hù kóng ài kā goán i--á kóng i ū hō͘ góa 1 lia̍p kâm-á-thn̂g. Góa ba̍k-chiu kim-kim khòaⁿ i é-é ê sin-iáⁿ tī ji̍t-thâu kha jú sóa jú sè--khì.
|
水耳叔本底面憂憂，看著我chiah tńg 笑，kā 我ê 1 角收--去，叫我ka-tī 揀1粒糖á,koh hoan 咐講ài kā goán i--á 講i 有hō͘ 我1 粒含á 糖。我目chiu 金金看i 矮矮ê 身影tī 日頭kha 愈徙愈細--去。 |
|
Goán i--á iáu teh bô êng, khòaⁿ tio̍h góa chhùi--ni̍h kâm 1 lia̍p thn̂g-á, mn̄g góa lēng-gōa hit lia̍p tī toh-ūi. Góa kóng Chúi-hīⁿ chek--á chiah hō͘ góa 1 lia̍p niâ, goán i--á chin siūⁿ-khì, kóng Chúi-hīⁿ--á tōa-lâng tōa-chéng--a, soah pián thâu-pái iōng tio̍h chîⁿ ê gín-á, chin bô 1 ê khoán. Kóng hoan-tńg-kang chiah koh tòe lâi koe-á-hn̂g, tng-tán Chúi-hīⁿ--á kā thó hit lia̍p thn̂g-á.
|
Goán i--á iáu teh 無êng,看著我嘴--ni̍h 含1 粒糖á,問我另外hit 粒袋tī toh 位。我講水耳叔--á chiah hō͘ 我1 粒niâ,goán i--á 真siūⁿ-khì,講水耳--á 大人大種--a，soah 騙(pián)頭pái 用著錢ê gín-á,真無1 個款。講翻tńg 工chiah koh tòe 來瓜á 園，tng 等水耳--á kā 討hit 粒糖á。 |
|
Hit àm, góa chá-chá tō khì khùn, thiⁿ iáu-bōe kng tō peh khí chhn̂g, tán i--á chhōa góa khì koe-á-hn̂g. I--á kóng góa ‘khong-kiáⁿ’, beh khì hn̂g--ni̍h mā tio̍h tán i óaⁿ-tī sé hó, ti-chhài khoán hó, ti-á chhī pah, hit sî tō 8 tiám gōa--á, chit chūn chiah 5, 6 tiám niâ, ē-sái koh khì khùn. Góa kiaⁿ khùn kòe-thâu, i--á thau cháu khì hn̂g--ni̍h, tō chiú tī chàu-kha kā i tàu long chháu-in ji̍p khì hiâⁿ.
|
Hit 暗，我早早就去睏，天iáu 未光就peh 起床，等i--á chhōa 我去瓜á 園。I--á 講我「khong kiáⁿ」，beh 去園--ni̍h mā tio̍h 等i 碗箸洗好，豬菜款好，豬á 飼飽，hit 時都8 點外--a，這chūn chiah 5、6 點niâ,會sái koh 去睏。我驚睏過頭，i--á 偷走去園--ni̍h，就守(chiú)tī 灶kha kā i tàu long 草in 入去hiâⁿ。 |
|
Hit kang, Chúi-hīⁿ chek--á khah chá lâi kàu chhân-thâu-á lō͘, góa kín cháu khì chhōe--i, i--á mā tòe āu-piah jiok--lâi, khòaⁿ tio̍h Chúi-hīⁿ--á tō kā i lé, mē i put-eng-kai su̍t gín-á ê chîⁿ, bêng-bêng 1 kak-gîn ē-tàng bé 2 lia̍p kâm-á-thn̂g, nah ē chiah the̍h 1 lia̍p hō͘--góa niâ. Chúi-hīⁿ chek--á bīn-á âng-kì-kì, it-ti̍t hōe sit-lé, kóng-sī i 1 sî hô͘-tô͘ hut m̄-tio̍h--khì, i ē pó͘ góa 1 lia̍p. Goán i--á m̄ pàng i kan-hiu, kiò i ài sêng-ì 1--ē, khòaⁿ án-chóaⁿ pôe--góa chiah ē-sái.
|
Hit 工，水耳叔--á khah 早來到田頭á 路，我緊走去chhōe--i，i--á mā tòe 後壁jiok--來，看著水耳--á 就kā i lé,罵i 不應該su̍t gín-á ê 錢，明明1 角銀會tàng 買2 粒含á 糖，ná會chiah the̍h 1粒hō͘--我niâ。水耳叔--á 面á 紅kì-kì,一直會失禮，講是i 1 時糊塗hut m̄-tio̍h--去，i 會補我1 粒。Goán i--á m̄ 放i 干休，叫i ài 誠意--1 下，看án-chóaⁿ 賠--我chiah 會sái。 |
|
Chúi-hīⁿ chek--á siūⁿ-siūⁿ--leh kóng beh thong chng kā lâng chhiáⁿ hun chhiáⁿ pin-ⁿ̂g, kong-khai hōe sit-lé. Goán i--á soah siūⁿ pháiⁿ-sè, kóng bián hiah kang-hu, sió-khóa-á ì-sù--1-ê tō hó. I tek-khak beh án-ni, kóng nā bô, i 1 sì lâng ji̍t-chí pháiⁿ kòe.
|
水耳叔--á 想想--leh 講beh 通庄kā 人請薰請檳榔，公開會失禮。Goán i--á soah 想pháiⁿ-sè,講免hiah 工夫，小khó-á 意思--1 下就好。I 的確beh án-ni，講若無，i 1 世人日子pháiⁿ 過。 |
|
Thong chng chhiáⁿ lâng chia̍h hun kap pō͘ pin-ⁿ̂g sī chin kiàn-siàu ê tāi-chì, chū-lâi ū 2 chióng lâng chiah tio̍h án-ni: chò chha̍t-á hō͘ lâng lia̍h--tio̍h iah-sī thó-khè-hiaⁿ kat hóe-kì chhut-phòa. Chúi-hīⁿ chek ūi 1 lia̍p thn̂g-á niâ, pâi chit khoán tiûⁿ-bīn, si̍t-chāi ū khah siong-tiōng. Hoan-tńg-kang, Chúi-hīⁿ chek--á thâu lê-lê, phâng hun kap pin-ⁿ̂g se̍h chng-lāi lō͘, tú tio̍h lâng tō kā hun kap pin-ⁿ̂g tiām-tiām tu hō͘--lâng, lóng bô kóng kah 1 kù ōe. Chhù-piⁿ mn̄g kóng “Chúi-hīⁿ--á sī hoān tio̍h toh 1 tiâu”, goán i--á tō kā kiám hō͘ góa 1 lia̍p thn̂g-á ê tāi-chì kóng hō͘ lâng chai. Chúi-hīⁿ só--á thiaⁿ--tio̍h liáu-āu, kan-taⁿ chhiò-chhiò kóng: “Tōa-lâng su̍t gín-á, hông hoa̍t sī eng-kai.”
|
通庄請人食薰kap pō͘ 檳榔是真kiàn-siàu ê tāi-chì,自來有2 種人chiah tio̍h án-ni，做賊á hō͘ 人lia̍h--著iah 是討契兄kat hóe-kì 出破。水耳叔為1 粒糖á niâ,排這款場面，實在有khah 傷重。翻tńg 工，水耳叔--á 頭lê-lê,捧薰kap 檳榔se̍h 庄內路，tú 著人就kā 薰kap 檳榔tiām-tiām tu hō͘--人，lóng 無講gah 1 句話。厝邊問講「水耳--á 是犯著toh 1 條」，goán i--á 就kā 減hō͘ 我1 粒糖á ê tāi-chì 講hō͘ 人知。水耳嫂--á 聽--著了後，kan-taⁿ 笑笑講：「大人su̍t gín-á,hông 罰是應該。」 |
|
Kòe 2 kò͘ goe̍h, goán a-pa khì keh-piah chng kā lâng tàu tah siông-jiông liâu-á, tńg--lâi, hit mê beh khùn, kap goán a-i sè-siaⁿ kóng-ōe, góa tō khùn tī in sin piⁿ, ké khùn--khì, thau thiaⁿ in kóng, góa m̄-sī thiaⁿ chin ū, chóng--sī, chai-iáⁿ in teh kóng Chúi-hīⁿ`chek--á ê tāi-chì. I tī keh-piah chng kap 1 ê cha-bó͘ thau-lâi-àm-khì, cha-bó͘ in ang m̄-chai án-choán soah chai-iáⁿ, m̄ pàng Chúi-hīⁿ--á soah, beh khì tâu Chúi-hīⁿ--á in bó͘. Chúi-hīⁿ kā lâng kiû-chêng, kóng beh thong chng chhiáⁿ hun chhiáⁿ pin-ⁿ̂g, tùi-hong kóng bē-sái tī chit chng chhiáⁿ, nā bô, kui chng tō lóng chai--a, iau-kiû i tńg khì ka-tī ê chng-lāi chhiáⁿ. Chúi-hīⁿ--á thâu-khak chin hó, lī-iōng góa thâu-pái bé thn̂g-á m̄-chai hâng-chêng, kiám hō͘ góa 1 lia̍p, thàn ki-hōe ké hōe sit-lé, án-ni, tùi keh-piah chng hit pêng mā ū 1 ê kau-tài. Góa kap goán i--á hō͘ i siat-kè--khì, koh leh thè i pháiⁿ-sè.
|
過2 個月，goán a-pa 去隔壁庄kā 人tàu 搭siong-jiông 寮á,tńg--來，hit 暝beh 睏，kap goán a-i 細聲講話，我就睏tī in 身邊，假睏--去，偷聽in 講，我m̄ 是聽真有，總--是，知影in teh 講水耳叔--á ê tāi-chì。I tī 隔壁庄kap 1 個cha-bó͘ 偷來暗去，cha-bó͘ in 翁m̄ 知án-chóaⁿ soah 知影，m̄ 放水耳--á 煞，beh 去tâu 水耳--á in bó͘。水耳kā 人求情，講beh 通庄請薰請檳榔，對方講bē -sái tī 這庄請，若無，kui 庄就lóng 知--a，要求i tńg 去ka-tī ê 庄內請。水耳--á 頭殼真好，利用我頭pái 買糖á m̄ 知行情，減hō͘ 我1 粒，趁機會假會失禮，án-ni，對隔壁庄hit pêng mā 有1 個交帶。我kap goán i--á hō͘ i 設計--去，koh leh 替i pháiⁿ-sè。 |
|
Chng-lāi lâng hong-phêng kóng “Chúi-hīⁿ--á chò lâng láu-si̍t, liân su̍t gín-á 1 lia̍p thn̂g-á tō liông-sim bē-tit-kòe, chhiáⁿ hun chhiáⁿ pin-ⁿ̂g thong chng kā lâng hōe si̍t-lé.” Góa m̄-chiah ē kóng sī ‘Láu-si̍t ê Chúi-hīⁿ chek--á’.
|
庄內人風評講「水耳--á 做人老實，連su̍t gín-á 1 粒糖á 都良心bē 得過，請薰請檳榔通庄kā 人會失禮。」我m̄ chiah 會講是「老實ê 水耳叔--á」。 |
