M̄-sìn--ê
|
M̄ 信--ê |
| Phian-chip-sek |
編輯室 |
|
Tī bó͘-kok ū chi̍t-ê hū-jîn-lâng ji̍p pài- tn̂g thiaⁿ Bo̍k-su tha̍k Má-thài 17:20. Thiaⁿ-liáu chiū iô-thâu, kóng,Che ōe sī bô iáⁿ, beh thài-ē án-ni leh ! I chiū thèng-hāu lé-pài soah, āu--lâi khì kìⁿ Bo̍k-su iû-goân kā i kóng, Só͘ tha̍k ê sū bô iáⁿ liáu-liáu. Bo̍k-su chi̍t-ē khòaⁿ, chiū ìn i kóng, Siōng-tè kiám ē kóng pe̍h-chha̍t ōe mah ? Tú-á só͘ tha̍k chiū- sī Iâ-so͘ pún-sin ê ōe, I chin-chiàⁿ ū chhim-sìn I-ê Thiⁿ-pē.
|
Tī某國有一個婦人人入拜堂聽牧師讀馬太 17: 20。聽了就搖頭，講：「Che話是無影，beh thái 會án-ni--leh !」伊就聽候禮拜煞，後--來去見牧師猶原kā伊講：「所讀ê事無影了了。」牧師一下看，就應講：「上帝kiám會講白賊話--mah？Tú仔所讀就是耶穌本身ê話，伊真正有深信伊ê天父。」 |
|
Hū-jîn-lâng koh kóng, Lī goán tau āu-piah ū chi̍t-ê tōa soaⁿ koân-koân-koân; tò--tńg-khì ê sî góa nā pek-chhiat kiû Siōng-tè hō͘ hit-ê soaⁿ ē-tit thang sóa- khì pa̍t-ūi; lí phah-sǹg àn-chóaⁿ-iūⁿ ? Bo̍k-su chiū kóng, Nā bô chi̍t-tiám-á ê giâu-gî, chóng tek-khak ē sóa-khì. Hū- jîn-lâng chhiò-chhiò kap i saⁿ-sî, chiū tò--khì in chhù. Teh-beh àm phak--teh kiû Siōng-tè hō͘ āu-piah ê soaⁿ sóa-khì pa̍t-ūi, khí--lâi beh koaiⁿ-mn̂g kia̍h ba̍k chi̍t-ē khòaⁿ, kóng, Taⁿ chit-ê soaⁿ kàu bîn-á chá-khí m̄ chai àn-chóaⁿ-iūⁿ; sim- lāi ū teh siūⁿ káⁿ bē-tit thang sóa-khì.
|
婦人人koh講：「離阮兜後壁有一個大山懸懸懸；倒--轉去ê時我若迫切求上帝hō͘ hit 個山會tit thang徙去別位；你扑算àn-chóaⁿ 樣？」牧師就講：「若無一點仔ê giâu疑，總的確會徙去。」婦人人笑笑kap伊相辭，就倒--去in 厝。Teh-beh暗仆--teh求上帝hō͘ 後壁ê山徙去別位，起--來beh關門kia̍h目一下看，講：「今這個山到明仔早起 m̄ 知àn-chóaⁿ 樣」；心內有teh想betitthāng徙--去。 |
|
Bîn-á-ji̍t chá-chá khí--lâi koh khui- mn̂g chi̍t-ē khòaⁿ, soaⁿ iû-goân tī--teh, chiū kóng, Kó-jiân chiàu góa ê sim-lāi teh phah-sǹg to bô sóa-khì.
|
明仔日早早起--來koh開門一下看，山猶原tī--teh，就講：「果然照我ê心內teh扑算to無徙--去。」 |
|
Chiàu chit-ê hū-jîn-lâng só͘ kiû Siōng- tè bêng-bêng ē ín i , khiok sī in-ūi i sim- ì iáu teh giâu-gî, che sū chiah bē tit chiâⁿ.
|
照這個婦人人所求上帝明明會允--伊，卻是因為伊心意iáu teh giâu疑，che事才bē得成。 |
|
(Tâi-oân Hú-siâⁿ-kàu-hōe-pò tē 81 tiuⁿ,1892 nî 1 ge̍h)
|
(台灣府城教會報第81張，1892年1月) |
