Goān lí an-hioh_lāu-su
|
願你安歇，老師 |
|---|---|
| Tēⁿ Ngá-î | 鄭雅怡 |
|
(Hō͘ góa Chho͘-tiong ê Tō-su, Chiu Lêng-Lêng)
|
(Hō͘我初中ê導師，周玲玲) |
|
Chi̍t-ê cha̍p-peh-nî m̄-bat kìⁿ-bīn ê tông-ha̍k, Kā góa kóng, lí Í-keng sí. |
一個18年m̄-bat見面ê同學， Kā我講，你 已經死。 |
|
Tī New Jersey Tó tī àm-àm ê thô͘-kha-tóe, Éng-kiú thiaⁿ bōe-tio̍h, Chhun-thiⁿ peng-seh pit-khui ê siaⁿ, Iáu-bōe gō͘-cha̍p-nî ê sìⁿ-miā, Hō͘ gâm ê sè-pau thun-chia̍h. |
Tī New Jersey 倒tī暗暗ê塗腳底， 永久聽bōe著， 春天冰雪pit開ê聲， Iáu未50年ê生命， Hō͘癌ê細胞吞食。 |
|
Chá-chêng góa chòe ê bāng, Kèng-jiân chiâⁿ-chòe sū-si̍t. |
早前我做ê夢， 竟然成做事實。 |
|
Chòe-āu kìⁿ-tio̍h lí, Í-keng tī cha̍p-it-nî chêng, Tī Ko-hiông-chhī kau-gōa ê liān-chhia-tiûⁿ, Chhut-ji̍t koh thàu-hong ê kôaⁿ-thiⁿ, Sì-nî bô kìⁿ-tio̍h lí, Hoaⁿ-hí iā ū tām-po̍h ùi-ùi, Koh àm-àm hoâi-gî, Lí ná ōe kā o͘-sìm-sìm ê tn̂g thâu-chang lu té-té? |
最後見著你， 已經tī 11年前， Tī高雄市郊外ê練車場， 出日koh透風ê寒天， 四年無見著你， 歡喜也有淡薄畏畏， Koh暗暗懷疑， 你那會kā烏sìm-sìm ê長頭鬃lu短短？ |
|
Āu-lâi chiah chai Lí í-keng ēng hòa-ha̍k tī-liâu, Kap gâm kau-chiàn kúi-nā-pái. |
後來才知 你已經用化學治療， Kap癌交戰幾若擺。 |
|
Chho͘-jī lí chòe góa ê tō-su. Hit-sî lí āu-khok pa̍k chi̍t-ki lî-bóe-á, Iáu-bōe saⁿ-cha̍p-hòe. Lia̍h-chún thang chòe lí ê sió-bē, Siáⁿ chai seng-ha̍k-pan ê lāu-su chhiah-pê-pê. |
初二你做我ê導師。 Hit時你後khok縛一支驢尾仔， Iáu未30歲。 掠準thang做你ê小妹， 啥知升學班ê老師chhiah-pê-pê。 |
|
kàu taⁿ iáu ōe kì-tit, Tē-it-chiat khò lí chiū soan-pò͘ “saⁿ-tiâu-kài“: Bo̍k-tit khó-chhì thau-khòaⁿ. Bo̍k-tit hō͘ thâu-mn̂g sàm-iāⁿ-iāⁿ. Bo̍k-tit kau cha-po͘-phōaⁿ. |
到今iáu會記得， 第一節課你就宣布「三條戒」： 莫得考試偷看。 莫得hō͘頭毛sàm-iāⁿ-iāⁿ。 莫得交查甫伴。 |
|
Kò-pia̍t tâm-ōe ê sî, Góa kò͘-ì kek lí siū-khì, Ēng chheng-chhun-kî ê pōe-ge̍k, Hō͘ lí ê ba̍k-bâi gia̍h-koân koh kiat kui-oân. |
個別談話ê時， 我故意激你受氣， 用青春期ê背逆， Hō͘你ê目眉gia̍h懸koh結歸丸。 |
|
Ti̍t kàu chhut-gia̍p-chêng chiah kap lí “hô-hó“, Hit-sî góa phah-sǹg khì Tâi-pak tha̍k ko-tiong, Siūⁿ beh thoat-lī pē-bú ê “koán-hat“. Lí pòaⁿ kiông-pek pòaⁿ khó͘-khǹg, Kiò góa lâu tī Ko-hiông. |
直到出業前才kap你「和好」， Hit時我扑算去台北讀高中， 想beh脫離父母ê「管轄」。 你半強迫半苦勸， 叫我留tī高雄。 |
|
Ko-tiong ta̍k ha̍k-kî soah, Chiū khì khòaⁿ lí. Kiâⁿ pòaⁿ-tiám-cheng ê âng-chng-á lō͘, Keng-kòe chhàu-ko͘N-ko͘N ê ūn-hô, Ji̍t-kng siám-si̍h tī o͘-lô ê chúi-bīn. |
高中逐學期煞， 就去看你。 行半點鐘ê紅磚仔路， 經過臭ko͘N-ko͘N ê運河， 日光閃si̍h tī烏濁ê水面。 |
|
Kàu-tī lí ê sòe-sòe ê kheh-thiaⁿ, Kui ē-po͘, lí thiaⁿ góa hun-sò͘, Chheng-chhun-kî chòe-āu ê pōe-poān, Sīm-chì chū-sat ê ì-goān, Khó-tio̍h tāi-ha̍k ê sî, lí sàng hō͘ góa chi̍t-pún si-chi̍p, |
到tī你ê細細ê客廳， 歸e晡，你聽我分訴， 青春期最後ê背叛， 甚至自殺ê意願， 考著大學ê時，你送hō͘我一本詩集， |
|
Tagore siá--ê, âng-âng ê chheh-phôe, Kàu-taⁿ iáu pâi tī chheh-tû--ni̍h, Hō͘ góa tha̍k-kòe chōe-chōe-pái, Lāi-ia̍h hoán-n̂g, jī iáu goân-chāi, Chóng-sī lí í-keng bô tī chit-ê sè-kài. |
Tagore寫--ê,紅紅ê冊皮， 到今iáu排tī冊櫥--ni̍h， Hō͘我讀過濟濟擺， 內頁反黃，字iáu原在， 總是你已經無tī這個世界。 |
|
Lí tī ī-kok ê thô͘-tóe, kiám bat thiaⁿ--kòe, Lán chho͘-chho͘ kò-pia̍t tâm-ōe ê kàu-sek, Í-keng hō͘ lâng thiah-húi, têng-khí kàu-ha̍k tōa-lâu. |
你tī異國ê塗底，kiám bat聽--過， 咱初初個別談話ê教室， 已經hō͘人拆毀，重起教學大樓。 |
|
Ūn-hô iû-goân chhàu koh lô, M̄-kú khoe-piⁿ ê chhiū-ńg, Ná hoat ná ba̍t, ná chhun ná khui-khoah. Keng-kòe bû-sò͘ ê hong-éng, Góa it-ti̍t pó-sioh, Sim-koaⁿ-tóe ū chi̍t-tè chhiū-nâ, Bat lâu-kòe chi̍t-tiâu sòe-sòe, chheng-khì ê hô, Ū lí kap góa saⁿ-kiâⁿ ê chúi-iáⁿ, Jī-cha̍p-nî āu, iáu phû tī góa ê kì-tî. |
運河猶原臭koh濁， M̄-kú溪邊ê樹蔭， 那發那密，那伸那開闊。 經過無數ê風湧， 我一直保惜， 心肝底有一塊樹林， Bat流過一條細細、清氣ê河， 有你kap我相行ê水影， 20年後，iáu浮tī我ê記池。 |
|
Tī bô ba̍k-sái ê àm-mî , Chí-ū ēng hôe-sióng siàu-liām lí. Goān lí an-hioh, Góa ê lāu-su, góa ê pêng-iú, Goān lí an-bîn tī thiⁿ-téng, Bōe koh ū pīⁿ-thiàⁿ ê lo̍k-hn̂g--ni̍h. |
Tī無目屎ê暗暝， 只有用回想數念你。 願你安歇， 我ê老師，我ê朋友， 願你安眠tī天頂， Bōe koh有病痛ê樂園--ni̍h。 |
