Góa só͘ tòa ê siâⁿ-chhī
|
我所tòa ê城市 |
| Tēⁿ Ngá-î |
鄭雅怡 |
|
Góa só͘ tòa ê siâⁿ-chhī Ko-hiông sī Tâi-oân lâm-pō͘ siōng-tōa ê to͘-chhī. Mā sī chi̍t-ê hái-káng. I ê pak-pêng ū Siū-san kap pòaⁿ-pêng-soaⁿ sio-liâm. Siū-san-kha chiū-sī Se-á-oân hái-piⁿ. Siū-san-téng kàu-taⁿ iáu ū ta-chio̍h kap lê-á-khak. Tùi che ōe tit thang chai, kú-kú í-chêng chia sī chi̍t-phiàn ê tōa-hái. Bô-tiāⁿ kui-ê Ko-hiông-chhī éng-kòe mā sī tī hái-té. Siū-san ê tē-lí, tē-chit í-ki̍p si̍t-bu̍t kap khún-teng--ê chin chhin-chhiūⁿ. Ta̍t-tit chhī-bîn hó-hó pó-chûn kap jīn-bat. Nā chē tō͘-lûn iû-káng tō ē kám-kak tio̍h káng-to͘ ê khì-bī. Ko-hiông ê lāi-hái sui-bóng lâ-sâm, m̄-kú liâm-laîm ê hái-hong lām tio̍h kiâm-kiâm ê hî-á-bī, phīⁿ-tio̍h te̍k-pia̍t phang. Nā chē-chûn kàu Kî-āu, káng-piⁿ tō ū lâng teh bē hái-sán. Ū chē-chē hi-kî ê chióng-lūi, hán-tit tī chhī-á khòaⁿ--tio̍h-ê. Kî-āu ê ke-lō͘ tn̂g-tn̂g, oan-oan, e̍h-e̍h. Chhia bô chin chē. Lō͘-piⁿ iáu ū âng-chng-á-chhù. Ín-lâng hôe-sióng kó͘-chá Ko-hiông ê bīn-māu.
|
我所tòa ê城市高雄是台灣南部上大ê都市。Mā是一個海港。伊ê北爿有壽山kap半爿山相黏。壽山腳就是西仔灣海邊。壽山頂到taⁿ iáu有礁石kap螺仔殼。Tùi che會得thang知，久久以前chia是一片ê大海。無定歸ê高雄市往過mā是tī海底。壽山ê地理，地質以及食物kap墾丁--ê真親像。值得市民好好保存kap認bat。若坐輪渡遊港就會感覺著港都ê氣味。高雄ê內海雖罔lâ-sâm,m̄-kú黏黏ê海風濫著鹹鹹ê漁仔味，鼻著特別芳。若坐船到旗後，港邊就有人teh賣海產。有濟濟稀奇ê種類，罕得tī市仔看--著-ê。旗後ê街路長長，彎彎，e̍h-e̍h。車無真濟。路邊iáu有紅磚仔厝。引人回想古早高雄ê面貌。 |
|
(“Góa ū chi̍t-ê Bāng”, Tēⁿ Ngá-î chok-phín-chi̍p)
|
（《我有一個夢》––鄭雅怡作品集） |
