Choan-gia̍p hâng-ōe_Ti-bah-tiam
|
專業行話－－豬肉砧 |
| A-jîn |
阿仁 |
|
Ū chi̍t-ê bē ti-bah--ê,in tau kúi-tāi lóng sī chò bah-tiam--ê,i tú tòe in lāu-pē o̍h chò seng-lí ê sî-chūn,lāu-pē tō kà i khó͘-liān bián iōng chhìn-á kap pōng-á hit khoán ê ke-si ē-tit chām-chat ti-bah jōa-tāng ê hoat-tō͘。Kó͘-chá sî-tāi chhìn-á kap pōng-á lóng iáu chin hán-mi̍h,bô chit-pé kang-hu bē-tàng chiâⁿ-chò bah-hoàn-á。Sui-bóng sî-tāi bô-kāng--a,chit-ê hoàn-á iáu-sī koàn-sì bô iōng chhìn-á,beh tok chi̍t-kin ti-bah tō-sī chún-chún chi̍t-kin,chi̍t-niú to bē hō͘ cháu-cheng--khì。
|
有一個賣豬肉--ê,in兜幾代攏是做肉砧--ê,伊tú tòe in老爸學做生理ê時陣，老爸tō教伊苦練免用秤仔kap磅仔hit款ê ke-si會得chām-chat豬肉偌重ê 法度。古早時代秤仔kap磅仔攏iáu真罕物，無一把功夫bē當成做肉販仔。雖罔時代無共ah，這個販仔iáu是慣勢無用秤仔，beh剁一斤豬肉tō是準準一斤，一兩tō bē hō͘走cheng--去。 |
|
Ū chi̍t-pái,chi̍t-ê lâng-kheh kóng beh phah kin-pòaⁿ ê sam-chân,i kāng-khoán iōng to liâu chi̍t-tè,bô chhìn tō hō͘--i,kòe bô-jōa-kú,lâng-kheh tò-tńg--lâi,khêng-hun kóng i tńg-khì koh pōng--kòe,hit-tè sam-chân chiah kin-la̍k niâ,chiok-chiok kiám N̄g-niú。Bah-tiam--ê liān thâu-khak to bô gia̍h--khí-lâi,sòa-chhùi tō ìn kóng：「Lín tau ê pōng-á ài kín khì hō͘ lâng siu-lí。」
|
有一擺，一個人客講beh扑斤半ê三層，伊共款用刀liâu一塊，無秤tō hō͘--伊，過無偌久，人客倒轉--來，khêng-hun講伊轉去koh磅--過，hit塊三層才斤六niâ,足足減二兩。肉砧--ê連頭殼都無gia̍h--起來，續嘴tō 應講：「Lín兜ê磅仔ài緊去hō͘人修理。」 譯者 李鑾英 |
|
(Tâi-bûn Bóng-pò tē 26 kî, 1998 nî 11 goe̍h)
|
（台文罔報第26期，1998年11月） |
